Yohana 6 - Sumu Yedi ya Isa Masiya 1906 Kitamo 1897 Malumbo 1905

¹ Kutera Isa akatonga sela ya keri ya Ndiwa ya Galilaya ya Tiberia.

² Matorano mengi wakamratera wekimawona maluano ewaarehie wewadjua.

³ Akakwea Isa ghati ya nduwi, akaikaa uko hamwe na waanaloshwa wakwe.

⁴ Ikafikia Pasaka itasi lawo Wayahudi.

⁵ Isa ekiwushija meso akawawona ti matorano mengi memzia, akamburra Filipo, Tuzoriehi mikate awa wawone kula.

⁶ Akateta ama ekimughesha, ekitisiwa mwenye enearehaze.

⁷ Filipo akamtalwa, Mikate ya dinari maghana meri teiwafika wose wauhe kadongo.

⁸ Akamburra mwe wa waanaloshwa wakwe, Andrea, mundwawo Siman Petro.

⁹ Ewaha kamwana ena mikate misano ya shayiri na nguluma mbiri, kake iji nikini hena awa wengi?

¹⁰ Isa akateta, Ikajeni wandu si. Mani mengi meoho uko, wandu wakaikaasi, hena kutara maghana makumi masano:

¹¹ Isa akauha mikate, akaghamba haika, akawang’olia waanaloshwa, na waanaloshwa wala weikeesi, na nguluma huwo sandu wekundie.

¹² Wekinawute akawawurra waanaloshwa wakwe, Unganyeni malumong’o mashigajika, kindu kisiteke.

¹³ Wakawunganya, wakajizuja mbinda ikumi na mbiri na vidongo vya mikate wevishigaje wekila.

¹⁴ Wandu wala wekinawona luano eareha Isa, wakateta, Uu niye nabii eokie eneza masangeni.

¹⁵ Isa ekitisiwa ti weneza wamgure wamwoshe mfumwa, akafumawa mtano ndiwa ye mwenye.

¹⁶ Magheri mekivetia waanaloshwa wakwe wakasea na ndiwa,

¹⁷ Wakaingia ngalawa, wakele ghati ya ndiwa mtano Kapernaum. Chaoka kija na tewafikia Isa.

¹⁸ Ndiwa ikaruruma amu yaoka ngungu nyingi yeruruma.

¹⁹ Wekiidima kujuta sandu stadio makumeri na sano au makumi matatu, wakambona Isa ekisela wanga ya ndiwa, aifikia ngalawa, wakaondoka.

²⁰ Akawawurra, Nimi, musiondoke.

²¹ Wakakunda kumwuhia ngalaweni, kamwe ngalawa ikafikasi sela ya keri.

²² Musi wa keri wakwe matorano meikee sela ya keri ya ndiwa, wekinawona ti tehena ngalawa ingi uko, nde ila imwe weokie waanaloshwa wakwe, na ti Isa teingia ghati ya ngalawa hamwe na waanaloshwa wakwe, kake waanaloshwa wakwe watongie hawo wenye.

²³ (Nde ngalawa jingi jaza ghati ya Tiberia, afuhi na handu weilie mikate, Bwana ekighamba haika).

²⁴ Matorano mekinawona ti Isa tehoho, kana waanaloshwa wakwe, wakakwea ghati ya ngalawa wakaza Kapernaum, wekimwenda Isa.

²⁵ Mtano wekimbona sela ya keri ya ndiwa, wakamburra, Rabbi, wazaze aha?

²⁶ Isa akawatalwa, akateta, Amin, amin, namburra, munienda si amu mwamawona maluano, kake amu mweila mikate, mkaiwuta.

²⁷ Musihire ndima hena kidjo kiteka, kake hena kidjo kiikaa mtano moo wa tendarasi, enemwinga Mwana wa Adamu, amu Apa eiye Izuwa emgera luano.

²⁸ Wakamburra, Tuareheze tuhire ndima yakwe Izuwa?

²⁹ Isa akatalwa akawawurra, Ii niyo ndima yakwe Izuwa, mwamwitikije ula emwingije.

³⁰ Wakamburra, Luano ani uluareha, tuwone tukuitikije? Waarehaze?

³¹ Waapa wetu welie mana ghati ya mashigati, sandu vitamiwe, Akawang’olia kidjo cha wanga, wakala.

³² Isa akawawurra, Amin, amin, namburra, Musa si emung’olie kidjo kila cha wanga, kake Apa wangu niye emwingie kidjo cha wanga cheokie cha kididi.

³³ Amu kidjo cha Izuwa nicho ula esee wanga, eng’ola moo ghati ya masanga.

³⁴ Wakamburra, Bwana utwinge misi ose kidjo ichi.

³⁵ Akawawurra Isa, Mi nimi kidjo cha moo; ula eza hangu tewona nzaa, naye eniitikija tewona nete ngiru.

³⁶ Kake namburra, mwaniwona na tomuniitikija.

³⁷ Na ula eniingie Apa, eza hangu, naye eza hangu simkinya hena some.

³⁸ Amu niseie wanga nisiviarehe nivikundie, nde avikundie ula eniingije.

³⁹ Nivyo evikundie eniingije, ti ula niingiwe asiteke pia, nde ninembusha musi wa kuidiwa.

⁴⁰ Nivyo evikundie eniingije, ula emyoa Mwana, ekimwitikija, awone moo wa tendarasi, na ninembusha mi musi wa kuidiwa.

⁴¹ Wakamununuwikia Wayahudi amu ateta, mi ni kidjo keseie wanga.

⁴² Wakateta, Siye Isa mwana wakwe Yusuf? Totuwatisiwe wawee na mee? Atetaze ti niseie wanga?

⁴³ Isa akatalwa, akawawurra, Musininunuwikie.

⁴⁴ Teidima mundu kuniratera, Apa eniingije esimjutie, nami ninembusha musi wa kuidiwa.

⁴⁵ Vitamwa na nabii, Wose weneeloshwa na Izuwa. Ula esikie ekulosha hena Apa eza hangu.

⁴⁶ Tehena embonie Apa, nde ula ena moo hena Izuwa, uu embonie Apa.

⁴⁷ Amin, amin, namburra, eniitikija ena moo wa tendarasi.

⁴⁸ Mi ni kidjo kila cha moo.

⁴⁹ Wawaweeo wenyu welie mana ghati ya mashigati, wakafwa.

⁵⁰ Nicho kidjo kiseie wanga ekila asifwe.

⁵¹ Mi ni kidjo kenye moo kiseie wanga, ekila kidjo iki ena moo mtano tendarasi. Na kidjo nineking’ola nicho muri wangu, nineng’olia moo wa masanga.

⁵² Wakakanana Wayahudi wohenawo, wekiteta, Eidimaze uu kutwinga muri wakwe tule?

⁵³ Akawawurra Isa, Amin, amin, namburra, musikaule muri wakwe Mwana wa Adamu, mkainywa sakami yakwe, tomna moo henyu.

⁵⁴ Ela muri wangu na enywa sakami yangu ena moo wa tendarasi nami ninembusha musi wa kuidiwa.

⁵⁵ Amu muri wangu nicho cheokie kidjo, na sakami yangu nicho cheokie kinywa.

⁵⁶ Ela muri wangu na enywa sakami yangu eikaa ndeni hangu nami ndeni hakwe.

⁵⁷ Sandu Apa eoho na moo, sandu eniingije, nami nina moo hena Apa, ni huwo ula enila mi eneoka na moo hena mi.

⁵⁸ Nicho kidjo kiseie wanga; si sa wawaweeo wenyu welie mana, wakafwa, ula ela kidjo ichi eneoka na moo mtano tendarasi.

⁵⁹ Akateta ama ghati ya sunagogi, ekielosha ghati ya Kapernaum.

⁶⁰ Wengi wevisikie, waanaloshwa wakwe, wakateta, Kiteto iki kidindie, ninani eidima kukisikia?

⁶¹ Ekitisiwa Isa na ndeni ti waanaloshwa wakwe weokie wekiwinunuwika iwi, akawawurra, Iki kyamregija?

⁶² Nikini mukimbona Mwana wa Adamu ekikwea uko eokie kuwoka?

⁶³ Ngoma niyo iareha na moo, muri towe kindu. Viteto nimburrie nivyo ngoma na moo. Kake weoho henyu wesiitikija.

⁶⁴ Amu Isa etisiwe to kuwoka niani wesiitikija, naye niani enemng’ola.

⁶⁵ Akateta, Na huwo, namburra, ti teidima mundu kuniratera esiingwa na Apa wangu.

⁶⁶ Toaho wengi waanaloshwa wakwe wakafuma ghati ya nyuma yakwe, na teweseliewa kumratera.

⁶⁷ Isa akawawurra wala kumi na weri, Na unwi mkundie kutonga henyu?

⁶⁸ Akamtalwa Siman Petro, Bwana, tumtongie ani? We una viteto vya moo wa tendarasi;

⁶⁹ Na uswi tuitikija, tukatisiwa ti niwe Masiya, Mwana wakwe Izuwa ena moo?

⁷⁰ Akamtalwa Isa, Mi simsawurie unwi kumi na weri, na wenyu mwe ena Shetani.

⁷¹ Akamtetia Yuda wa Siman Iskariota, niye enemng’ola, ekioka mwe wa wala kumi na weri.