Yohana 5 - Sumu Yedi ya Isa Masiya 1906 Kitamo 1897 Malumbo 1905

¹ Kutera ama itasi la Wayahudi, Isa akakwea mtano Yerusalemi.

² Ioho ghati ya Yerusalem hena magonji idingirri, itangwa Kiebrania Bethesda, ina mbenge sano.

³ Uko wakaikaa matorano mengi ma wandu wewadjua, webajikameso, wemawu, wedusuke, wekiinda mbombe isherukie.

⁴ Amu malaika esea misi yakwe ghati ya idingirri, akaisherusha mbombe. Naye esea kuwoka kutera ya kusherukia mbombe akawona zinya ghati ya ndwari yakwe yo yose.

⁵ Heokie na mundu uko eokie na ndwari miaka makumi matatu na minane.

⁶ Isa ekimbona eyejwe, akatisiwa ti misi yafika mingi, akamburra, Ukundie kuhoa?

⁷ Akamtalwa ewadjua, Bwana, sina mundu, mbombe ikisherukia, aniviritie hena idingirri, kake nikioka ghati ya kuza mi, ungi esea kuwoka hangu.

⁸ Akamburra Isa, Wuka, ushije iseto lako, utonge.

⁹ Chwii ila akahoa mundu ula, akaushija iseto lakwe, akatonga, Niwo wa Sabato musi ula.

¹⁰ Wayahudi wakamburra ula ehoa, Sabato yoo: tekiwe ukuwushije iseto.

¹¹ Akawatalwa, Ula enihodja niye eniwurre, Kuurishije iseto lako, utonge.

¹² Wakambujanya, Niani ekuwurra, Ukushije iseto lako, utonge.

¹³ Naye ehoa temtisiwe niani, amu Isa awetia, wandu wehoho weokie wengi.

¹⁴ Kutera Isa akambona ghati ya hekalu, akamburra, Yoa, wahoa, usitekwewa kiokie kiwiwi kisikuwone.

¹⁵ Mundu ula akafuma, akawawurra Wayahudi ti Isa niye emhodja.

¹⁶ Huwo Wayahudi wakamratera Isa, wakakunda kumkoma, amu ameareha ama musi wa Sabato.

¹⁷ Isa akawawurra, Apa wangu ehira ndima mtano yoo, nami nihira.

¹⁸ Huwo Wayahudi wakaneta kukunda kumkoma, amu teibaie Sabato tiki, kake akamteta Izuwa wawee wakwe, akakuosha kuringana na Izuwa.

¹⁹ Akatalwa Isa, akawawurra, Amin, amin, namburra, Mwana teidima kuteta kitetomwenye, nde kila ewona Apa eareha; amu vindu vyose eareha ye, ivi na Mwana eareha huwo.

²⁰ Amu Apa emkundie Mwana, embondja vyose eviareha, naye eneneta kumbondja vindu vibaha unwi mwone kurigiwa.

²¹ Sandu Apa ewushie wefwie, ewaareha wehoho na moo, ni huwo na Mwana ewaareha na moo ewakundie.

²² Nete na Wawee techilia mundu, kake emwinga Mwana uchili wose,

²³ Wose wemgurie Mwana nganyi sandu wemgurie Apa nganyi. Esimgurie Mwana nganyi temguria Apa nganyi emwingije.

²⁴ Amin, amin, namburra, ekisikia kiteto changu, ekimwitikija ula eniingija, ena moo wa tendarasi, nete teneingia ghati ya kuchiliwa, kake awetia ghati ya kufwa kuoka na moo.

²⁵ Amin, amin, Namburra, saa yaza na ngeriaha yoho, wefwie wenelisikia ighonda lakwe Mwana wa Izuwa, nawo wesikia weneoka na moo.

²⁶ Amu sandu Wawee ena moo hakwe, nihuwo amwinga Mwana kuoka na moo hakwe.

²⁷ Akamwinga zinya earehe na uchili, amu ni Mwana wa Adamu.

²⁸ Musirigiwa ama, saa yaza wose weoho hena mbira wenelisikia ighonda lakwe,

²⁹ Wenewuka, wala weareha vyedi hena kuwushwa kwa moo, nawo weareha viwiwi hena kuwushwa kwa uchili.

³⁰ Mi siidima kuteta kiteto mi mwenye. Sandu nisikiawo nachilia, na uchili wangu niyo una vyedi, amu sivienda nivikundie mi, nde evikundie eniingije.

³¹ Nikikuwondjie mburi mwenye, mburi wangu sio wa kididi.

³² Ungi ula eniwondjia mburi; natisiwa ti mburi eniwondjie nio wa kididi.

³³ Mwamwingijia Yohana, akawondja mburi ya kididi.

³⁴ Kake mi sikundie mburi yakwe mwana Adamu, namaghamba ama mwone unwi kukia.

³⁵ Ye eokie taa eyakie, ikalimika, makakunda hadongo kuizihirwa na changaji chakwe.

³⁶ Mi nina mburi mbaha kukela mburi ya Yohana, amu viareho niviingiwe na Apa nivifishe, viareho niviareha mi viniwondjia mburi ti Apa eniingije.

³⁷ Naye Apa eniingija niye eniwondjia mburi. Tomusikia ighonda lakwe pia, nete tomwambona mfwana.

³⁸ Nete tomna kiteto chakwe kikiikaa ndeni henyu, ikioka tomumwitikije ula emwingija.

³⁹ Endeni ghati ya matamo, amu mwawona unwi kuoka moo wa tendarasi, nama nimo meniwondjia mburi.

⁴⁰ Na tomukundie kunizia muwone kuoka na moo.

⁴¹ Sikundie kuisiswa na wandu.

⁴² Kake namtisiwe unwi, ti kumkunda Izuwa tomna ndeni henyu.

⁴³ Mi nizie na izina la Apa wangu, na tomukundie; ungi ekiza na izina lakwe mwenye, uu mnemkunda.

⁴⁴ Muwoneze unwi kuitikija, mkikunda kuisiswa, msikundie luisiso lwafuma hakwe Izuwa ye wa mwenye?

⁴⁵ Musighambe ti mi ninemulinganya hakwe Apa: eoho emulinganya, Musa, mwemung’endie.

⁴⁶ Amu idje mumwitikija Musa, idje mukiniitikija na mi, amu enitamie mi.

⁴⁷ Musiviitikije evitamie ye, muwoneze kuviitikija niviteta mi.