Yohana 4 - Sumu Yedi ya Isa Masiya 1906 Kitamo 1897 Malumbo 1905

¹ Bwana ekitisiwa ti Mafarisayo wasikia ti Isa earehe waanaloshwa wengi ekibatiza kukela Yohana,

² (Ekioka Isa tebatize, kake waanaloshwa wakwe),

³ Akafuma ghati ya Uyahudi akatongawa mtano Galilaya.

⁴ Ikambe kuvetia ghati ya Samaria.

⁵ Akaza kaa ya Samaria, iitangwa Sukar, afuhi na mtemi ula emwingie Yakobo mwana wakwe Yusuf;

⁶ Hena ikongo lakwe Yakob. Isa akaremwa na kuzoka akaikaasi na ikongo, sandu saa ya katandatu.

⁷ Mche wa Samaria akaza atahe mbombe. Isa akamburra, Uniinge ninywe.

⁸ Amu waanaloshwa wakwe watonga kaa wazore kidjo.

⁹ Mche Msamaria akamburra, Nikini we, Myahudi ukundie kunywa hangu mche wa Samaria? Amu Wayahudi teweteta na Wasamaria.

¹⁰ Akatalwa Isa akamburra, Idje watisiwe wuzuri wakwe Izuwa, nianiye ekuwurra, niinga ninywe, we idje unemwomba naye ekikwinga mbombe ya moo.

¹¹ Akamburra mche, Bwana, tuhena cha kutahia, na ikongo latonga si muno, wawonaze mbombe ya moo?

¹² We mbaha kukela apa wetu Yakobo, etwingie ikongo ili, akanywa uko, ye na waana wakwe na mafyo makwe?

¹³ Akatalwa Isa, akamburra, Ula enywa mbombe ii enewonawa ngiru.

¹⁴ Ula enywa mbombi ila ninemwinga tewona ngiruye tendarasi, kake mbombi ila ninemwinga ineoka ndeni hakwe ejisso la mbombi ikisherukiasherukia mtano moo wa tendarasi.

¹⁵ Akamburra mche, Bwana uniinge mbombe ii nisiwone ngiru kana nisize aha nitahe.

¹⁶ Akamburra Isa, Tonga, umwitange mume wako uze aha.

¹⁷ Akatalwa mche, akaghamba, Sina mume, Akamburra Isa, Waghamba nezo, Sina mume:

¹⁸ Amu weokie na wome wasanu, naye una ngeriaha si mume wako, ama wamaghamba kididi.

¹⁹ Akamburra mche, Bwana, nakuwona u nabii,

²⁰ Weapa wetu wetasie ghati ya nduwi ii, na unwi mwaghamba, ti ghati ya Yerusalem niho handu hewe kutasa.

²¹ Akamburra Isa, Mche, uniitikije, misi yaza wesimtasia Apa ghati ya nduwi ii kana ghati ya Yerusalemi.

²² Unwi mutasa musimaije, uswi tumtasia tumwaiji, amu kukija kuoho ghati ya Wayahudi.

²³ Kake misi yaza, na yoo, wetasa kididi wenemtasia Apa hena ngoma na kididi; amu Apa ewaenda awa wetasa huwo.

²⁴ Izuwa ni Ngoma, nawo wemtasia kiwe wemtasia hena ngoma na kididi.

²⁵ Akamburra mche, Natisiwa ti Masiya eza, niye Egeriwe mafuta (Khristo), enekaze ye niho enetuwurra vyose.

²⁶ Akamburra, Nimi, niteta nawe.

²⁷ Chwii ila wakaza waanaloshwa wakwe, wakarighiwa amu ateta naye mche, kake tetetie mundu ti Ukundie kini? kana uteta kini naye.

²⁸ Mche akaishigha nyungu yakwe, akatonga kaa, akawawurra wome,

²⁹ Orazoni, mbone mundu eniwurrie niviarehe vyose, Siye uu niye Masiya?

³⁰ Wakafuma ghati ya isanga, wakaza hakwe.

³¹ Nawo waanaloshwa weokie wekimburra, Mlosha, ula.

³² Akawawurra, Nina kidjo kila msikitisiwe unwi.

³³ Waanaloshwa wakateta wonawo, Mundu tamwetie kidjo?

³⁴ Isa akawawurra, Kidjo changu nicho nikiareha ekikunda eniingije, mifishe ndima yakwe.

³⁵ Tomteta ti kutera mieji minne na kufindika kuneza? Nami namburra, Ushijeni meso, yoeni mboweni, te yazera ya kufindika yoo huwo.

³⁶ Efindika euha makwe, ewunganya mawono ma moo wa tendarasi, ehanda eizihirwe sa efindika.

³⁷ Huwo na mfanano ula wa kididi, Mwe ehanda, na ungi efindika.

³⁸ Mi namwingija mfindike, mwasawihiria ndimi, weingi wehira ndima, unwi mwaingia ghati ya ndima jawo.

³⁹ Wengi wa kaa ii wakamwitikija, Wasamaria, hena kiteto chakwe mche, ekiwondja mburi, Aniwurra niviareha vyose.

⁴⁰ Wekiza hakwe Wasamaria wakamwomba aikae nawo, akaikaa uko misi miri.

⁴¹ Wengiwa muno wakaitikija na kiteto chakwe, wakamburra mche,

⁴² Totuitikija ngeriaha hena kiteto chako, amu na uswi twasikia, twatisiwa ti kididi uu niye Mkija wa masanga, eiye Masiya.

⁴³ Kutera misi ii miri akafuma uko, akaza ghati ya Galilaya.

⁴⁴ Na ye Isa akawondja mburi ti nabii ghati ya isanga lakwe tena nganyi.

⁴⁵ Ekinaze ghati ya Galilaya, Wagalilaya wakamkunda wekioka weviwona vyose eviarehe ghati ya Yerusaleni ghati ya itasi, amu wetonga awa ghati ya itasi.

⁴⁶ Akazawa Isa mtano Kana ya Galilaya, ekinaoshe mbombe mvinyo. Heokie na njama, mwana wakwe eokie ewadjua ghati ya Kapernaum.

⁴⁷ Un ekisikia ti Isa eza ghati ya Uyahudi kufika Galilaya, akamzia akamsemba asee, amkije mwana wakwe, amu afuhi na kufwa.

⁴⁸ Akamburra Isa, Msiwone maluano na vindu vibaha, tomwitikija.

⁴⁹ Njama akamburra, Bwana, usee, mwana wangu esimefwa.

⁵⁰ Akamburra Isa, Tonga hako, mwana wako eoho na moo. Mundu uu akakiitikija kiteto kila emburra Isa, akatonga.

⁵¹ Ekioka ghati ya kusea masinga makwe wakamtorana, wakamburra mburi, wekiteta, Mwana wako eoho na moo.

⁵² Akawawujanya saa aikasha. Wakamburra, Iwuo, saa ya ka fungate, kidedema kikamshigha.

⁵³ Akatisiwa wawee ti saa ii niyo emburra Isa, Mwana wako eoho na moo, Akaitikija, ye na nyumba yakwe yose.

⁵⁴ Ii niyo luano lwa keri eareha Isa; ekiza ghati ya Uyahudi mtano Galilaya.