Yohana 3 - Sumu Yedi ya Isa Masiya 1906 Kitamo 1897 Malumbo 1905

¹ Heokie na mundu wa Mafarisayo, izina lakwe Nikodemo, mbaha wa Wayahudi.

² Uu akamzia Isa kio, akamburra, Rabbi, tukutisiwe mlosha wafuma hakwe Izuwa, amu teidima mundu kuviareha vindu eviareha we, esi‐oke Izuwa naye.

³ Isa akamburra, Amin, amin, nakuwurra, esiwonwa ghati ya wanga, teidima mundu kuwona ufumwa wa Izuwa.

⁴ Akamburra Nikodemo, Aketeze awonwe ekioka mughosi? teidima kuingia keri ndeni ha mee kana kuwonwa.

⁵ Isa akamburra, Amin, amin, nakuwurra, esiwonwa na mbombe na Ngoma, teidima kuingia ghati ya ufumwa wa Izuwa.

⁶ Ewoniwe na muri ni muri, na ewoniwe na Ngoma ni ngoma.

⁷ Usirigiwe nikikuwurra, tumna huwo mbonwe wanga.

⁸ Ngungu iruruma sandu ikundie, usikia ighonda lakwe, kake tutisiwe handu ifuma kana itonga. Ni huwo na ula ewonwa na Ngoma.

⁹ Nikodemo akatalwa, akamburra, Meidimaze kuoka ama?

¹⁰ Isa akatalwa akamburra, Niwe mlosha wa Israeli na tumetisiwe ama.

¹¹ Amin, amin, nakuwurra, tuviteta tuvimaidjie, tuwondja mburi ja vindu tuviwonie, na tomujikundi mburi jetu.

¹² Usiitikije nikikuwurra viteto vya masanga, uidimeze kuitikija nikikuwurra viteto vya wanga?

¹³ Tehena ye ekwie wanga nde ula eseie wanga, niye Mwana wa Adamu eoho wanga.

¹⁴ Sandu Musa ewanike nyoka ghati ya shigati, nihuwo yambe na Mwana wa Adamu awanikwe,

¹⁵ Wemwitikije wose wasiteke nde wawone moo wa tendarasi.

¹⁶ Izuwa emakundie masanga, mtano akamng’ola Mwana wakwe mwenye, wemwitikija wose wasiteke, nde wawone moo wa tendarasi.

¹⁷ Izuwa temwingijie Mwana wakwe ghati ya masanga amachilie masanga, kake masanga mawone kukia hena yee.

¹⁸ Emwitikija techiliwa, esimwitikija aidiwa kuchiliwa, amu teitikije na izina la Mwana mwenyi wa Izuwa.

¹⁹ Nio kuchiliwa, changaji kyaza masangeni, nawo wandu wakunda kija kukela changaji, amu vindu vyawo viwiwi.

²⁰ Ula eareha visiwi ereghijwa na changaji, na teza hena changaji, vindu vyakwe visitetwe.

²¹ Ula eareha kididi eza hena changaji kuteta kwakwe kuwonwe, ti kutetika hena Izuwa.

²² Kutera ezie Isa na waanaloshwa wakwe ghati ya isanga la Uyahudi, akaikaa uko hamwe nawo, ekibatiza.

²³ Akaoka na Yohana ekibatiza hena Enon, afuhi na Salim, amu hena mbombe pacha, wakaza wakabatizwa,

²⁴ Amu Yohana temegerwa gerezani.

²⁵ Makaoka mawujanyo ghati ya waanaloshwa wakwe Yohana na Wayahudi wanga ya kuzerrija.

²⁶ Wakaza hakwe Yohana wakamburra, Rabbi, ula eokie hamwe nawe sela ya Yardeni, umwondjia mburi, uu ebatiza na wose wemzia.

²⁷ Yohana akatalwa akaghamba, Teidima mundu kuuhia kiteto asiingwa wanga.

²⁸ Nunwi watisiwa ti nitetie, Mi siye Masiya, kake niingijwa kuwoka kwakwe.

²⁹ Mwenye mwasu ni mwenye ngasu, mbuyai wakwe mwenye ngasu, eimuke ekimsikia, eizihirwa muno hena ighonda lakwe mwenye ngasu, niye kuizihirwa kwangu kunigurie.

³⁰ Ye eneneta, nami nineduhuka.

³¹ Eza wanga ni wanga ya vyose; eoho ghati ya isanga ni wa isanga, eviteta vyoho vya isanga; ula eza wanga ni wanga ya vyose.

³² Ejiwondja mburi ja vindu eviwonie na evisikie, na mburi jakwe mundu tejikundie.

³³ Ejikunda mburi jakwe awenga ti Izuwa niye mwenye kididi.

³⁴ Emwingije Izuwa eghamba viteto vya Izuwa; amu Izuwa teng’ola Ngoma na kighesho.

³⁵ Apa emkundie Mwana, amwinga vyose mikononi hakwe.

³⁶ Emwitikija Mwana ena moo wa tendarasi; esimwitikija Mwana tenewona moo, kake kuregija kwakwe Izuwa kuikaa hakwe.