Yohana 21 - Sumu Yedi ya Isa Masiya 1906 Kitamo 1897 Malumbo 1905

¹ Ekuade akakuwonyanyawa Isa hena waanaloshwa ghati ya ndiwa ya Tiberia akakwondja huwo.

² Weokie hamwe Siman Petro na Tomaso (eitangwa Maza) na Natanael wa ghati ya Kana ya Galilaya, nawo waana wa Zebedayo, na weingi waanaloshwa wakwe weri.

³ Akawawurra Siman Petro, Natonga kureloa nguluma. Wakamburra, Na uswi tuneraterana nawe. Wakaingia chwii ngalaweni, wesiuhe kindu kio kila.

⁴ Mtano heyawo kerre akaimuka Isa kiwambara, na tewetisiwe ti niye Isa.

⁵ Akawawurra Isa, Waana, mna kidjo? Wakamtalwa, Totuna.

⁶ Akawawurra, Tagheni nyavu mondo wa kuume wa ngalawa, mnewona. Wakatagha, na teweidime kujuta amu nguluma kuoka nyingi.

⁷ Akamburra Siman Petro mwanalosha ula emkundie Isa, Niye Bwana. Siman Petro ekisikia ti niye Bwana, akakuchungia nguo, amu eho tuhu, akakuwiritia nduweni.

⁸ Waanaloshwa weingi wakaza ngalaweni ndongo, amu teweho hae ya teri, nde sandu thiraa maghana meri wekijuta nyavu ya ngaluma.

⁹ Wekisea ghati yasi, wakawona moto uko na mbogha igeriwe, na mabu‐mu‐nda.

¹⁰ Akawawurra Isa, Eteni nguluma mjing’olie ngeriaha.

¹¹ Akakwea Siman Petro akaijuta nyavu ghati yasi, izwe nguluma mbaha, ighana, makumi masano, na tatu, najo jikioka nyingi sandu iji, nyavu teyachika.

¹² Akawawurra Isa, Nzoni, leni. Tekarie mundu wa waanaloshwa kumbujanya, Niani we? wekitisiwa ti niye Bwana.

¹³ Akaza Isa, akauha mabu‐mu‐nda, akawainga, na nguluma huwo.

¹⁴ Hii niyo ya katatu Isa ekinawonwa na waanaloshwa wakwe, ekioka awuka ghati ya wefwie.

¹⁵ Wekinaidiwa kula, Isa akamburra Siman Petro, Siman wa Yuda, Unikundie kukela awa? Akamburra, Kididi, Bwana, wanitisiwa nakukunda; Akamburra, Virishe vigonji vyangu.

¹⁶ Akamburrawa ya keri, Siman wa Yuda, wanikunda mi? Akamburra, Kididi, Bwana, wanitisiwa nakukunda. Akamburra, Marishe magonji mangu.

¹⁷ Akamburra ya katatu, Siman wa Yuda, wanikunda mi? Akaregija Petro amu amburre ya katatu ti wanikunda mi; akamburra, Bwana, niwe wavitisiwa vyose, wanitisiwa ti nikukundie. Akamburra Isa, Marishe magonji mangu.

¹⁸ Amin, amin, nakuwurra, ukioka mbwange ukuchunga utonga ukundie, ukioka mughosi uneronga mikono yako, ungi enekuchunga, enekutika handu usikundie.

¹⁹ Akateta ama kuwondja na kufwa ani enemgura nganyi Izuwa. Ekiteta ama akamburra, Niratere.

²⁰ Petro ekigharuka akambona mwanaloshwa emkundie Isa, eratera, eyajwa ghati ya kidjo cha chamagheri mbafuni hakwe, akateta, Bwana niani ekung’ola.

²¹ Ekimbona uu Petro akamburra Isa, Bwana, na uu nikini.

²² Akamburra Isa, Nikimkunda uu aikae mtano nikaneze, yakuweze? Uniratere mi we.

²³ Kikatetwa kiteto iki ghati ya waghenji, ti mwanaloshwa ula tenefwa. Kake temburrie Isa, Tenefwa, kake, nikikunda aikae mtano nikaneze, yakuweze?

²⁴ Niye mwanaloshwa ewondja mburi ja ama, akamatama, na uswi tutisiwa ti mburi jakwe jana kididi.

²⁵ Henawa mengi meingi emaarehie Isa, namo mekitamwe mose, nahamba ti na masanga mose temefika hena vitamo vinetamwa. Amen.