Yohana 20 - Sumu Yedi ya Isa Masiya 1906 Kitamo 1897 Malumbo 1905

¹ Musi wa keri yakwe Sabato, Maryamu Magdalene akaza kerre, kikioka kija, mtano hena mbira. Akawona ibwe lawushijwa ghati ya mbira.

² Akamatuka, akaza hena Siman Petro na mwanalosha ula ungi emkundie Isa, akawawurra, Wambushija Bwana ghati ya mbira nete totuhatisiwe handu wembikieho.

³ Akawuka Petro, na mwanaloshwa ula wa keri wakaza ghati ya mbira.

⁴ Wakasara wose weri, naye mwanaloshwa wa keri akatonga wangu kukela Petro, akarongora kufika hena mbira.

⁵ Akakuinama akajiwonasi nguo, na teingie.

⁶ Akaza Siman Petro ekimratera, akaingia ghati ya mbira, akajiyoa nguo jiohosi,

⁷ Na kidami kioho mtwini hakwe, si hamwe na nguo, kake kikodiwe hae handu hakwe.

⁸ Akaingia na mwanaloshwa ula erongora kufika hena mbira akawona akaitikija.

⁹ Amu mtano musi ula tewametisiwe matamo, ti yambe awukewa ghati ya wefwie.

¹⁰ Wakatongawa waanaloshwa hawo.

¹¹ Maryamu akaimuka msongorana mbira shigati ekiiya.

¹² Ekioka ekiiya, akakuinama mbereni, akawona malaika weri wedokie nyewa wekiikaa mwe mtwini, mwe mawuni, handu weyedjweho muri wakwe Isa.

¹³ Wakamburra awa, Mche, waiyakini? Akawawurra, Wambushijie Bwana wangu na sihatisiwa handu wembikieho.

¹⁴ Ekiteta ama akagharuka, akambona Isa ekiimuka, na temtisiwe ti niye Isa.

¹⁵ Akamburra Isa, Mche, waiyakini? Ukundiekini? Naye ekighamba niye mrinda ngonde akamburra, Bwana, idje umtikie, niwurre handu umbikieho, nami ninemwushija.

¹⁶ Akamburra Isa, Maryamu! Akagharuka, akamburra, Rabboni! (ichi Mlosha)

¹⁷ Akamburra Isa, Usinigure, amu simekwea hena Apa wangu, Tonga hena wandwetu wangu, uwawurre, Natonga wanga hakwe Apa wangu na Apa wenyu, na Izuwa wangu na Izuwa wenyu.

¹⁸ Akaza Maryamu Magdalene akawawurra waanaloshwa ti embonie Bwana na ti etetie ama.

¹⁹ Ikioka chamageri musi ulaula, juma a pili, mbenge jikifungwa handu wetoranie waanaloshwa hena elwa kuondoka Wayahudi, akaza Isa ekiimuka ghati, akawawurra, Luworo henyu.

²⁰ Ekiteta ama akawawondja mikono yakwe na msawajo wakwe. Wakaizihirwa waanaloshwa wekimbona Bwana.

²¹ Akawawurrawa Isa, Luworo henyu. Sandu Apa eniingija mi huwo nami namwingija unwi.

²² Ekiteta ama akawahemia, akawawurra. Uheni Ngoma Yedi,

²³ Wala mnewawushijia kutekwa, wenewushijwa, wala mnewachungia, wenechungwa.

²⁴ Tomaso, mwe wa wala kumi na weri, eitangwa Maza, teokie hamwe nawo ekinaza Isa.

²⁵ Wakamburra waanaloshwa weingi, Tumbonie Bwana. Akawawurra, Nisiwone mikononi hakwe arata ja misomari, nigere kichaa changu ghati ya arata ja misomari, nigere mkono wangu ghati ya msawajoni, sineitikija.

²⁶ Kutera misi minane weokieho waanaloshwa, na Tomaso hamwe nawo. Akaza Isa, mbenge jikifingwa, akaimuka ghati, akateta, Luworo henyu.

²⁷ Akamburra Tomaso, Ete aha kichaa chako, na yoa mikono yangu na ete aha mkono wako, na gera hena msawajo wangu, na usioke esiitikija, nde eitikija.

²⁸ Akatalwa Tomaso, akamburra, Bwana wangu na Izuwa wangu.

²⁹ Akamburra Isa, Amu uniwona, Tomaso, uitikija, wetasiwa wala weitikija, wesiwonie.

³⁰ Na vindu vibaha viingi vingi akaareha Isa songorana waanaloshwa wakwe, visitamiwe ghati ya kitamo iki.

³¹ Ama metamiwa mwone kuitikija ti Isa niye Masiya, mwana wakwe Izuwa, na mkiitikija mbone moo hena izina lakwe.