Yohana 2 - Sumu Yedi ya Isa Masiya 1906 Kitamo 1897 Malumbo 1905

¹ Musi wa katatu heokie na ngasu ghati ya Kana ya Galilaya, mee Isa eokieho.

² Isa akaitangwa na waanaloshwa wakwe ha ngasu.

³ Na mvinyo ukiduhuka, mee Isa akamburra, Tewena mvinyo.

⁴ Isa akamburra, Mi nina nikini nawe, mche, saa yangu temefikayo.

⁵ Mee wakwe akawawurra wainda, Sandu enemburra, mwarehe.

⁶ Heokie mawere matandatu ma mabwe hena kuzerrija kwawo Wayahudi, ma vighesho viri kana vitatu.

⁷ Isa akawawurra, Izujeni mawere ma mbombe; wakamaizuja pia.

⁸ Akawawurra, Taheni mmtike hena mbaha wa meza. Wakatika.

⁹ Mbaha wa meza ekinachame mbombe ikaoka mvinyo, na tetisiwa handu ufumicho (kake wainda wakatisiwa wetahie mbombe), mbaha wa meza akamwitanga mwenyi ngasu,

¹⁰ Akamburra, Wandu wose wawoka kung’ola mvinyo ula wedi, na wandu wekinywa, ula mbiwi; kake we wawika ula wedi mtano ngeriaha.

¹¹ Kuwuka uku kwa vindu vya kurighia akaareha Isa ghati ya Kana ya Galilaya, akauwonyanya ubaha wakwe, waanaloshwa wakwe wakamwitikija.

¹² Kutera akasea, akafika Kapernaum, ye na mee wakwe, na wandwawo na waanaloshwa wakwe, wakaikaa uko misi si mingi.

¹³ Ikasongeria Pasaka ya Wayahudi, Isa akakwea, akafika Yerusalemi.

¹⁴ Akawona ghati ya hekalu wetagha ng’ombe, na mabeta, na wekoranya fetha wakaikaasi.

¹⁵ Akaarehe msenge wa luzige, akawakinya ghati ya hekalu, najo magonji na ng’ombe, akaitisha pesa ja wekoranya fetha, akagharusha meza yawo.

¹⁶ Akawawurra wala wetagha mabeta, Tikeni ama, msioshe nyumba ya Apa wangu nyumba ya zora.

¹⁷ Waanaloshwa wakakumbuka ti itamiwe, Luneng’o lwa nyumba yako lwanla.

¹⁸ Wayahudi wakatalwa wakamburra, Nikini utuwondja, waareha ama?

¹⁹ Isa akatalwa, akawawurra, Nyamareni hekalu ili, nami misi mitatu nineliareha.

²⁰ Wayahudi wakateta, Miaka makumanne na mitandatu hekalu ili leokie ghati ya kujengwa, na wee uneliareha na misi mitatu?

²¹ Naye etetie hekalu la muri wakwe.

²² Na ekinawuka hena kufwa waanaloshwa wakwa wakakumbuka ti etetie ama, wakaitikija matamo na kiteto ekitetie Isa.

²³ Ekinaoka ghati ya Yerusalemi hena Pasaka hena musi mbaha wengi wakaliitikija izina lakwe wekiwona vindu eviarehie.

²⁴ Isa teitikijishie hawo, amu akatisiwa wose,

²⁵ Na tekundie mundu amtetie mundu, amu emaije meoho na wandu.