Yohana 19 - Sumu Yedi ya Isa Masiya 1906 Kitamo 1897 Malumbo 1905

¹ Amu ii Pilato akamwuha Isa, akambigha.

² Njama wakaiwita taji ya mivwa, wakamgera mtwini, na nguo ngundu.

³ Wakateta, Luworo, Mfumwa wa Wayahudi! Wakambigha luhi.

⁴ Akafuma Pilato, akawawurra, Yoeni, namwete some mtisiwe ti siwona kutekwa hakwe.

⁵ Akafuma Isa ekidoka taji ya mivwa na nguo ngundu. Akawawurra, Yoeni, niye.

⁶ Wekinambona wakohani wabaha na wandu wawo, wakang’ola ighonda wekiteta, Banike, mbanike! Akawawurra Pilato, Mwuheni unwi, mmbanike, mi siwone kutekwa hakwe.

⁷ Wakamtalwa Wayahudi, Uswi tuna kiteto, na hena kiteto chetu iwe kufwa, amu akakuareha Mwana wa Izuwa.

⁸ Ekisikia Pilato kiteto iki akaneta kuondoka;

⁹ Akaingiawa ghati ya Pretorio, akamburra Isa, Wafumahi? Kake Isa temng’olia matalwa.

¹⁰ Akamburra Pilato, Tuteta nami? Tutisiwa ti nina zinya kukubanika na kukuchungua?

¹¹ Akatalwa Isa, Idje tukioka na zinya wanga yangu pia, idje usiingwe ghati ya wanga, amu ii, ula ening’ola hako aneta kuoka na kutekwa.

¹² Na kutera ama Pilato akakunda kumchungua, kake Wayahudi wakaiya wekiteta, Ukimchungua uu, we tombuyae Kaisari; ula ekuosha mfumwa amtetia Kaisari.

¹³ Pilato ekimasikia mateto ama, akamwete Isa some akaikaa lumunguni, handu heitangwa handu ha mabwi, hena Kiebrania Gabbatha.

¹⁴ Ikaoka musi wa kuarehia Pasaka, sandu saa ya katandatu: akawawurra Wayahudi, Yoa, Mfumwa wenyu.

¹⁵ Wakaiya, Mbushije, mbushije, mbanike. Pilato akawawurra, Nimbanike mfumwa wenyu? Wakatalwa wakohani wabaha, Totuna mfumwa nde Kaisari.

¹⁶ Akam’ngola hawo, abanikwe, Wakamwuhia Isa wakambusha.

¹⁷ Naye ekitika msalaba wakwe akafuma mtano handu heitangwa ha mtwi, hetetwa hena Kiebrania Golgotha.

¹⁸ Wakambanika uko na hamwe naye weingi weri, uko na uko, na Isa ghati.

¹⁹ Akatama matamo Pilato, akawikia ghati ya msalaba, ikatamiwa, ISA MNAZARETI, MFUMWA WA WAYAHUDI.

²⁰ Wakamasoma matamo ama Wayahudi wengi, amu handu ha afuhi na kaa ehabanikwe Isa, makatamwa hena Kiebrania, Kiyonani, Kirumi.

²¹ Wakohani wabaha na Wayahudi wakamburra Pilato, Usitame, Mfumwa wa Wayahudi, kake ti etetie, Ni mfumwa wa Wayahudi.

²² Akatalwa Pilato, Nivitamie navitama.

²³ Njama, wekinambanika Isa, wakauha nguo jakwe, wakaareha ’ngata nne, njama jose ngata mwe, na kanzu yakwe, na kanzu yakwe teitungiweyo, to wanga ichumiwe pia.

²⁴ Wakatetana, Tusiighawe, tuisekie ioke yakweni; mafike matamo metetie, Wakaghawa suke yangu, wakaisekia nguo yangu. Wakaareha ama njama.

²⁵ Wakaimuka msalabeni ha Isa mee wakwe na mundwawo wa mee wakwe, Maryamu wa Klopa, na Maryamu Magdalene.

²⁶ Amu ii Isa ekimbona mee wakwe naye mwanaloshwa emkundie ekiimuka, akamburra mee wakwe, Mche, yoa, mwana wako.

²⁷ Akamburra mwanaloshwa, Yoa, mamako. To saa ila akamwuha mwanaloshwa hakwe.

²⁸ Ekuade ekitisiwa Isa, ti ngeriaha vyose vyafika, matamo maidivike, akateta, Nina ngiru.

²⁹ Nyungu ikaoka ina siki, wakaizujya sifongo, wakagera hena husopo wakamwetea momoni.

³⁰ Ekinauhe siki Isa, akateta, Yasia, Akainamija mtwi akang’ola ngoma.

³¹ Nawo Wayahudi miuri isiikae msalabeni musi wa Sabato, ikioka maarehio, na mbaha musi ula wa Sabato, wakamwomba Pilato mawu mawo mabawe, wakawushijwe.

³² Wakaza njama, wakambaa mawu ma ula kuwoka na ma ula wa keri ebanikwe hamwe naye.

³³ Kake wekiza hena Isa, wakambona ti aidiwe kufwa, tewembaie mawu.

³⁴ Kake njama mwe na ichumo akamsoma msawajo, chwii ikafuma sakami na mbombe.

³⁵ Naye ewonie akawondja mburi, na mburi yakwe wa kididi, naye atisiwa ti aviteta vya kididi, mwone kuitikija.

³⁶ Makaoka ama matamo maidivike, Tenebaika iwindi.

³⁷ Na itamowa la keri liteta, Wenemyoa ula wemsomie.

³⁸ Kutera ya ama akamwomba Pilato Yusuf wa Arimathaya (ekioka mwanaloshwa wakwe Isa, kake na kuweweda hena elwa kuondoka Wayahudi), auwushije muri wakwe Isa; akakunda Pilato. Amu ii akaza, akauwushija muri wakwe Isa.

³⁹ Akaza na Nikodemo (ula emzia kuwoka kio) ekiete marunganyiko ma manemane na undi sandu ratli ighana.

⁴⁰ Wakamcha muri wakwe Isa, wakauchunga na nguo hamwe na mabungu, sandu huwo hawo Wayahudi wekijika.

⁴¹ Iho handu ewanikwe ngonde, na ghati ya ngonde mbirasha, esimejikwa mundu.

⁴² Uko, amu ya maarehio ma Wayahudi, amu mbira afuhi, wakambika Isa.