Yohana 18 - Sumu Yedi ya Isa Masiya 1906 Kitamo 1897 Malumbo 1905

¹ Ekiteta ama Isa akafuma na waanaloshwa wakwe, ekibocha lunyonyo lwa Kedron, ioho ngonde, akaingia uko na waanaloshwa wakwe.

² Akahatisiwa Yuda, ula emng’olie, handu, amu Isa misi mingi etongie uko na waanaloshwa wakwe.

³ Amu ii Yuda, ekiuha njama na wandu wawo wakohani wabaha na Mafarisayo, akaza uko na kulangara, na viyaya, na nareta.

⁴ Isa ekivitisiwa vyose vinembona akafuma akawawurra, Mwamwendani?

⁵ Wakamtalwa, Isa Mnazareti. Akawawurra Isa, Nimi. Akaimuka Yuda, ula emng’olie hamwe nawo.

⁶ Chwii ekiwawurra, Nimi, wakahunduka nyuma wakagwasi.

⁷ Akawabujanyawa, Mwamwendani? Wakateta, Isa Mnazareti.

⁸ Akatalwa Isa, Namburra ti nimi, mkinienda mi, shigheni awa watonge hawo.

⁹ Kifike kiteto ekitetie, Wala uniingie simteshie mwe wawo.

¹⁰ Siman Petro ekioka na muhandi akajuta, akambigha isinga lakwe mkohani mbaha akamchwa isikio la kuume, na izina lakwe isinga Malko.

¹¹ Isa akamburra Petro, Hunduia muhandi ghati ya mboni, ndemwa eniingie Apa nisinywe?

¹² Njama na mchili na wandu wawo Wayahudi wakamwuha Isa, wakamchunga,

¹³ Wakamwete kuwoka hena Anna; niye mkwe Kayafa eokie mkohani mbaha mwaka ula.

¹⁴ Niye Kayafa ula ewaingie mburi Wayahudi ti iwe mundu mwe ateke hena lwa wandu.

¹⁵ Akamratera Isa Siman Petro, na mwanaloshwa ungi: mwanaloshwa ula ekitisiwiwa naye mkohani mbaha, akaingia hamwe na Isa ghati ya mbera yakwe mkohani mbaha.

¹⁶ Petro akaimuka mbengeni some. Akafuma mwanaloshwa ula wa keri, etisiwiwa naye mkohani mbaha, akateta naye mrinda mbenge, akamwete Petro ndeni.

¹⁷ Akamburra Petro mbora mrinda mbenge, Nawewa wa waanaloshwa wakwe mundu uu? Akateta, Hae.

¹⁸ Wakaimuka masinga na wazoro, weareha moto wa makaa, ikoka mbeho, wakaoto moto; ghati ya awa na Petro akaimuka akaota moto.

¹⁹ Mkohani mbaha akambujanya Isa hena vindu vya waanaloshwa wakwe na kichee chakwe.

²⁰ Akamtalwa Isa, Mi nitetie hena some na masanga, naloshe hose ghati ya masunagogi na ghati yahekalu, Wayahudi wose wetoraniaho, na hena kuweweda sitetie kiteto.

²¹ Nikini unibujanya mi? Wabujanya wala wesikie nikini niwawurra, wala wetisiwa vindu niviteta.

²² Ekiteta ama mzoro mwe eimuke afuhi akambigha luhi Isa, ekiteta, Umtalwa huwo mkohani mbaha?

²³ Akamtalwa Isa, Idje nateta kiwiwi uniwondjie mburi ya viwiwi, idje vyedi, nikini unibigha?

²⁴ Na Anna emwingijie echungwa hena Kayafa mkohani mbaha.

²⁵ Akaoka Siman Petro ekiimuka ekiota moto. Amu ii wakamburra, Nawe wa waanaloshwa wakwe? Akakana akateta, Hai.

²⁶ Akateta mwe wa masinga makwe mkohani mbaha, na mbare yakwe emchuie isikio Petro, Sikuwonie naye ghati ya ngonde?

²⁷ Akakanawa Petro: na ngeriahaichi nguruwi ikaiya.

²⁸ Wakamwete Isa ghati ya hena Kayafa mtano Pretorio; ikaoka heyawo kerre; na tewaingie wawo ghati ya Pretorio wesiwone maikwe, kake waile pasaka.

²⁹ Akafuma Pilato hawo, akateta, Kulinganya ani mwete wanga ya mundu uu.

³⁰ Wakatalwa Wayahudi, Idje teokie uu mundu eareha viwiwi, idje totukimwete hako.

³¹ Akawawurra Pilato, Mumwuheni unwi, mchilieni na uchili wa kihenyu. Amu ii wakamburra Wayahudi, Tekiwe uswi kumkoma mundu.

³² Kiteto chakwe Isa kifike ekiteta ekiwondja kufwa ani enefwa.

³³ Akaingiawa ghati ya Pretorio Pilato, akamwitanga Isa, akamburra, Niwe Mfumwa wa Wayahudi.

³⁴ Akatalwa Isa, Wateta ama wa kuoha kwako, au ni weingi wekuwurrie vindu vyangu.

³⁵ Akatalwa Pilato, Mi Myahudi? Mbare yako na wakohani wabaha wekuetie hangu; waarehakini?

³⁶ Akatalwa Isa, Ufumwa wangu si wa masanga ama, idje ufumwa wangu wa masanga ama idje wandu wangu wekibighana, nising’olwe hena Wayahudi, Kake ngeriaha ufumwa wangu si wa uko.

³⁷ Akamburra Pilato, Niwe mfumwa? Akatalwa Isa, Wateta ti mi mfumwa. Mi niwoniwe hena elwa ii, na hena elwa ii nizie masangeni, niwondje mburi ya kididi. Ula eokie wa kididi asikia ighonda langu.

³⁸ Akamburra Pilato, Kididi niyo kini? Ekiteta ama akafumawa hena Wayahudi, akawawurra, Siwona kutekwa hakwe pia;

³⁹ Niye huwo henyu nimjuuie mwe ghati ya Pasaka, mkundie nimjuuie Mfumwa wa Wayahudi?

⁴⁰ Wakang’ola ighonda ibaha wose, wekiteta, Si uu, nde Barabba. Naye Barabba msoka.