Yohana 17 - Sumu Yedi ya Isa Masiya 1906 Kitamo 1897 Malumbo 1905

¹ Ama akateta Isa, akawushija meso wanga, akaghamba, Apa, saa yaza, mgurie nganyi Mwana wako, Mwana wako akugurie nganyi.

² Sandu umwingie zinya wanga ya wose wenye muri, awainge moo wa tendarasi wose wala umwingie.

³ Niwo moo wa tendarasi, wekutisiwe we Izuwa wa kididi mwenye, naye umwingije, Isa Masiya.

⁴ Nikugurie nganyi ghati ya masanga, naidiwa ndima uniingie niiareha.

⁵ Ngeriaha unigurie nganyi we, Apa, na ubaha ula niokie nawo hamwe nawe kuwoka kwa kuoka masanga.

⁶ Niwaondja izina lako wandu wala uniingie ghati ya masanga. Weokie wako ukaniinga mi, nawo wekigurie kiteto chako.

⁷ Ngeriaha watisiwa ti vyose uniingie mi vyako.

⁸ Amu viteto uniingie niwaingiewo; nawo wevikundie, wakatisiwa kididi ti nafuma hako, wakaitikija ti niwe uniingije.

⁹ Mi nawaombea; simaombei masanga, kake wala uniingie, amu ni wako.

¹⁰ Na vyose vyangu vyako, na vyako vyangu; nami naguriwa nganyi hawo.

¹¹ Na ngeriaha siohowa ghati ya masanga, nawo awa ghati ya masanga, nami naza hako. Apa Wedi, uwarinde na izina lako wala uniingie waoke mwe, sandu uswi.

¹² Nikioka nawo masangeni, niwarindie na izina lako; wala uniingie niwarindie, na mundu wawo teteka, nde mwana wa kutekwa, vitamo vifike.

¹³ Ngeriaha naza hako, na ama namateta masangeni wawone kuoka na kuizihirwa kwangu kuizua hawo.

¹⁴ Mi niwaingie kiteto chako, na masanga menisuie, amu awa si wa ghati ya masanga sandu mi si wa ghati ya masanga.

¹⁵ Siombe uwawushije ghati ya masanga, kake uwarinde ghati ya viwiwi.

¹⁶ Wawo si wa masangeni, sandu mi si wa masangeni.

¹⁷ Uwazerrije hena kididi chako, kiteto chako ni kididi.

¹⁸ Sandu uniingija masangeni nami huwo niwaingija masangeni.

¹⁹ Na hena lwawo mi nakuzerrija, wezerrie na awa hena kididi.

²⁰ Siwaombei awa tiki, kake nawo weneniitikija na kiteto chawo.

²¹ Wose wawone kuoka mwe, sandu we, Apa, ndeni hangu, nami ndeni hako, wawone kuoka na awa mwe ghati ya uswi, masanga maitikije ti niwe uniingija.

²² Nami nawainga ubaha uniingie, wawone kuoka mwe sandu uswi mwe:

²³ Mi ghati yawo, na we ghati ya mi, wala wafikie ghati ya uswi, masanga metisiwe ti niwe uniingije, na ti uwakundie sandu unikundie mi.

²⁴ Apa, nakunda wala uniingie, nioho mi, nawo weoke uko hamwe nami, wawone ubaha wangu uniingie, amu unikundie kuwoka kwa kuarehikia masanga.

²⁵ Apa wa kididi, masanga temekutisiwa; mi nikutisiwe, na awa wetisiwe ti niwe uniingija.

²⁶ Nawatisiwija izina lako, nami ninetisiwija, lukundo ulu unikundie mi luoke hawo, na mi hawo.