Yohana 15 - Sumu Yedi ya Isa Masiya 1906 Kitamo 1897 Malumbo 1905

¹ Mi ni mzabibu wa kididi, na Apa wangu ni mwima.

² Mbagha ila hangu isigera, eing’ola, na ila igera, airawuya, inete kugera.

³ Ngeriaha unwi mwokie mzerre hena kiteto kila nimburrie.

⁴ Ikaeni hangu, nami henyu. Sandu mbagha tuidima kugera mwenye usiikee ghati ya mzabibu, na huwo unwi msiikee hangu.

⁵ Mi nimi mzabibu, unwi mibagha; ula aikaa hangu, nami hakwe, uu egera muno, amu esioho mi tomuidima kuareha kiteto.

⁶ Esiikaa hangu, etaghwa some, sandu mbagha, eomie, wewunganya, waitagha motoni, mashe.

⁷ Mkiikaa hangu, navyo niviteta viikaa henyu, kundeni mkundie, mneingwa.

⁸ Huwo Apa wangu aguriwa nganyi, mgere ndunda nyingi, huwo mneoka waanaloshwa wangu.

⁹ Sandu enikundie Apa, nami namkundie unwi, muikae ghati ya lukundo lwangu.

¹⁰ Mkivigura viteto vyangu, mneikaa ghati ya lukundo lwangu, sandu mi nivigurie viteto vya Apa wangu, naikaa ghati ya lukundo lwakwe.

¹¹ Ama nimburrie, kuizihirwa kwangu kuikae henyu na kuizihirwa kwenyu kufike.

¹² Niyo kiteto changu, mkundane, sandu nimkundie unwi.

¹³ Tehena eneta kukunda kukela aushiga moo wakwe hena elwa wambuyae wakwe.

¹⁴ Unwi wambuyae wangu, mkiareha vindu nimburre.

¹⁵ Simwitangawa wazoro, amu mzoro tetisiwa kindu eareha bwana wakwe; namteta wambuyaa, amu vyose nivisikie hakwe Apa wangu namtisiwija unwi.

¹⁶ Unwi tomnisawurrie mi, kake mi nimsawurrie unwi, nikamburra mtonge mgere, na ndunda jenyu jiikae, na vindu mvikundie hena na izina langu, mwingiwe naye.

¹⁷ Ama nimtetie, mkundane.

¹⁸ Masanga mekimsua, tisiweni ni menisuie mi kuwoka kwenyu.

¹⁹ Mkioka wa masanga, masanga memkundie wakwe, amu unwi si wa masanga, kake mi nimsawurrie ghati ya masanga, amu ii masanga memsua.

²⁰ Kumbukeni kiteto mimburrie; mzoro si mbaha kukela bwana wakwe. Idje wenikinya mi, wenemkinya na unwi, idje wekigure kiteto changu, wenekigura na chenyu.

²¹ Kake ama mose wenemwarehia hena elwa izina langu amu tewemtisiwe ula eniingije.

²² Idje sizie niteta nawo, idje teweokie na kutekwa, ngeriaha tewena kiteto cha kukuvisa kutekwa kwawo.

²³ Enisuie mi amsua na Apa wangu.

²⁴ Idje siarehie kwawo vindu esiviareha mundu ungi, idje teweokie na kutekwa; ngeriaha wewonie wakasua na mi na Apa wangu.

²⁵ Kake kifike kiteto kila kitamiwe ghati ya torati yawo, Wenisuie huwo.

²⁶ Kake eneikaze Mhoo, ula ninemwingijia ghati ya Apa, Ngoma ya kididi, ifuma ghati ya Apa, uu eneniwondjia mburi.

²⁷ Na unwiwa mnewondja mburi, amu to kuwoka mwokie hamwe nami.