Yohana 14 - Sumu Yedi ya Isa Masiya 1906 Kitamo 1897 Malumbo 1905

¹ Msiregije ngoro, mmwitikija Izuwa, mniitikije na mi.

² Ghati ya nyumba yakwe Apa wangu meoho maikaa mengi, idje sihuwo idje nimburrie, natonga nimwarehie handu.

³ Nikitonga nimwarehie handu ninehunduka nimkaaje hangu, na handu nioho mi na unwi mwokeho.

⁴ Na handu nihatonga mtisiwa na nzia mtisiwa.

⁵ Akamburra Tomaso, Bwana, totutisiwa handu utonga; tuidimaze kuitisiwa nzia?

⁶ Akamburra Isa, Mi niye nzia, na kididi, na moo, temzia mundu Apa, nde hena mi.

⁷ Idje mnitisiwe mi idje mumtisiwe na Apa wangu, na to yoo mumtisiwa na mumbonie.

⁸ Akamburra Filipo, Bwana, utuwondje Apa, na inetufika.

⁹ Akamburra Isa, Misi ii mingi nioho henyu, na tonitisiwe, Filipo? Eniwona mi embonie Apa, utetaze, utuwondje Apa?

¹⁰ Tuitikija ti mi ghati ya Apa na Apa ghati ya mi? Viteto namburra siviteta na mburi jangu tiki, naye Apa eikaa ghati ya mi aviareha vindu.

¹¹ Niitikijeni ti mi ghati ya Apa na Apa ghati ya mi; au niitikijeni hena vindu vyenye.

¹² Amin, amin, namburra, ula eniitikija, vindu niviareha, naye eneareha, na vibaha kukela ivi eneareha amu mi natonga hakwe Apa.

¹³ Na vyose mnevikunda hena izina langu, nineviareha, Apa aguriwe nganyi ghati ya Mwana.

¹⁴ Vyose mnevikunda hena izina langu, nineviareha.

¹⁵ Mkinikunda, vigureni viteto vyangu.

¹⁶ Nami ninemwomba Apa, naye enemwinga Mhoo ingi aikae henyu tendarasi.

¹⁷ Ngoma ya kididi, mesiidima kukunda masanga, amu temembona nete tememtisiwa. Uswi mumtisiwa, amu eikaa henyu, eneoka ndeni henyu.

¹⁸ Simshiga unwi wakiwa, ninemzia.

¹⁹ Kutera hadongo masanga temeniwonawa, unwi mneniwona; amu nina moo mi, na unwi mneoka na moo.

²⁰ Musi ula mnetisiwa ti mi ghati ya Apa wangu, na unwi ghati ya mi, nami ghati ya unwi.

²¹ Eokie navyo viteto vyangu, ekivigura, niye enikundie, na ula enikundie mi enekundwa na Apa wangu, na mi ninemkunda, ninekuwondjia hakwe.

²² Akamburra Yuda, (Siye Iscariota) Bwana, ineokaze unekuwondja hena hetu na si hena masanga?

²³ Akatalwa Isa akamburra, Mundu ekinikunda enekigura kiteto changu, na Apa wangu enemkunda, tuneza hakwe, tuneareha kuikaa kwetu hakwe.

²⁴ Esinikunda tevigure viteto vyangu, na kiteto nikiteta si changu mi, nde chakwe eniingije, Apa.

²⁵ Nateta ama nikiikaa henyu.

²⁶ Naye Mhoo, Ngoma Yedi, ula Apa enemwingija na izina langu, ula enemlosha vyose, na enemkumbusha vyose nimburrie.

²⁷ Luworo namshigia, luworo lwangu namwinga, si sandu masanga meng’ola mi namng’olia, Msiregije ngoroni, kana msiondoke.

²⁸ Msikie sandu nimburrie, Natonga na nahunduka henyu. Idje mnikundie idje mwizihirwe, amu namtongia Apa, amu Apa mbaha kukela mi.

²⁹ Na ngeriaha nimburrie kuwoka, na inekaoke mbone kuitikija.

³⁰ Simtetiewa muno, amu mbaha wa masanga ama aza, na tehena kiteto hangu.

³¹ Kake masanga mewone kutisiwa ti nimkundie Apa, na sandu Apa enitetie, huwo niareha. Wukeni, tugure nzia.