Yohana 13 - Sumu Yedi ya Isa Masiya 1906 Kitamo 1897 Malumbo 1905

¹ Kuwoka kwa itasi la Pasaka, ekitisiwa Isa ti saa yakwe yaza evetie ghati ya masanga ama kutonga hakwe Apa; ekioka awakundie wala wakwe ghati ya masanga, akawakunda mtano kuidiwa.

² Kidjo cha chamageri kiokie, Shetani emgurie ngoro Yuda wa Siman Iscariota emng’ole;

³ Ekitisiwa Isa ti Apa emwingie vyose mikononi hakwe, na ti efumie hakwe Izuwa akaoka ekimhundukia Izuwa;

⁴ Akawuka ghati ya kidjo, akawika nguo jakwe, akauha kidami, akakuchungia.

⁵ Akagera mbombe ghati ya mwanje, akaza awaoje mawu waanaloshwa, na amahaije na kidami ekichungiwe.

⁶ Akaza hena Siman Petro, naye ekamburra, Bwana, we wanioja mawu?

⁷ Akatalwa Isa, akamburra, Niviareha tutisiwe we ngeriaha, unetisiwa ekuade.

⁸ Akamburra Petro, Tunioja mawu mangu mtano tendarasi. Akamtalwa Isa, Nisikuoje, touna ngata nami.

⁹ Akamburra Siman Petro, Bwana, si mawu mangu tiki, nde na mikono na mtwi.

¹⁰ Akamburra Isa, Ula eogha teimbeye kuojwa nde mawu, kake ni ezerre pia: na unwi mzerre, nde si wose.

¹¹ Amu emtisiwe ula enemng’ola; amu ii akateta, Tomzerre wose.

¹² Ekinawaoja mawu akajiuha nguo jakwe, akakuyajawa, akawawurra, Mutisiwa nimwarehieze?

¹³ Muniitanga Mlosha na Bwana, mteta nezo, amu nimi.

¹⁴ Nikioka nimwoja mawu mi Bwana na Mlosha, na unwi imbe kuojana mawu.

¹⁵ Amu namwinga fwana, sandu nimwarehe mi, na unwi mwarehe.

¹⁶ Amin, amin, namburra, mzora si mbaha kukela bwana wakwe, kana ula eingijwe kukela ula emwingija.

¹⁷ Mkimatisiwa ama mnetasiwa mkimaareha.

¹⁸ Simtetie wose; natisiwa wala niwasawurrie; kake vitamo vifike, ula ela kidjo hamwe nami aniwushijia kuwu kwakwe.

¹⁹ Ngeriaha namburra kuwoka esimeoka, na inekaoka mwitikije mimi niye.

²⁰ Amin, amin, namburra, emwikajasi ula nimwingije enikaja mi, naye enikaja mi emwikaja ula eniingije.

²¹ Ekiteta ama Isa akaregija ngoro, akateta, Amin, amin, namburra, ti mwe wenyu enening’ola.

²² Waanaloshwa wakayoana wekifwiwa ni mtwi navyo eviteta.

²³ Eokie mwe wa waanaloshwa wakwe ekiyajwa mbafuni ha Isa, emkundie Isa.

²⁴ Akamkonya uu Siman Petro ambujanye niani emteta.

²⁵ Ekiyajwa uu mbafuni ha Isa akamburra, Bwana, Niani?

²⁶ Akatalwa Isa, Niye ninemtonya ninechibikia, Naye ekinachibikia akamwinga Yuda wa Siman Iscariota.

²⁷ Kutera ya kutonya Shetani akamwingia, Akamburra Isa, Kindu warehe, ukiarehe wangu.

²⁸ Na tehena mundu eyejwe etisiwe hena kindu ani emburrie.

²⁹ Weingi wakaghamba, ekioka Yuda ena kikuchu, ti Isa emburrie, Zora vindu tuvikundie vya itasi, au ang’ole kindu cha wakiwa.

³⁰ Ekiuhia kutonya ngeriahaichi akafuma; kikaoka kio.

³¹ Ekinafuma akateta Isa, Ngeriaha eguriwa nganyi Mwana wa Adamu, na Izuwa eguriwa nganyi naye.

³² Izuwa ekiguriwa nganyi hakwe, Izuwa enemgura nganyi mwenye, na ngeriahaichi enemgura nganyi.

³³ Waana, hadongowa nioho na unwi, Mnenienda, na sandu niwawurrie Wayahudi ti handu nitonga unwi tomuidima kuza, huwo ngeriaha namburra na unwi.

³⁴ Kiteto kisha namwinga, mkundane; sandu nimkundie unwi, na unwi mkundane.

³⁵ Amu ii wenetisiwa wose unwi ni waanaloshwa wangu, mkioka na kukundana unwi na unwi.

³⁶ Akamburra Siman Petro, Bwana, utongahi? Akamtalwa Isa, Handu nitonga tuidima kuniratera ngeriaha, uneniratera ekuade.

³⁷ Akamburra Petro, Bwana, nikini siidima kukuratera ngeriaha? Ninewika moo wangu hena lwako.

³⁸ Akatalwa Isa, Unewika moo wako hena lwangu? Amin, amin, nakuwurra, nguruwi teneiya kuwoka usimenikania katatu.