Yohana 12 - Sumu Yedi ya Isa Masiya 1906 Kitamo 1897 Malumbo 1905

¹ Na misi tandatu kuwoka kwa Pasaka, Isa akaza Betania, handu eoho Lazaro efwie, embushije ghati ya wefwie.

² Wakamwarehia uko kidjo cha chamageri; Martha akainda, Lazaro akaoka mwe wao wekuyedje naye.

³ Naye Maryamu ekiuha ratli ya marhamu ya nardo izerre yenye izora nyingi, akambira Isa mawu, akahaija mawu makwe na nyui jakwe, nyumba ikaizua na mbungo yakwe marhamu.

⁴ Akateta mwe wa waanaloshwa wakwe, Yuda wa Siman Iscariota, enemng’ola.

⁵ Nikini marhamu ii teitaghwa hena dinari maghana matatu, wakaingwa wakiwa?

⁶ Akamateta ama si amu erinda wakiwa, kake amu kuoka mhiwi akaoka na kikuchu, akavitika vyegeriwe.

⁷ Akateta Isa, Mshige, auvikia musi wa kujikwa kwangu.

⁸ Amu wakiwa mna misi ose henyu, mi misi ose tomnami.

⁹ Matorano mengi wakamtisiwa Isa eoho, wakaza si elwa Isa tiki kake wambone na Lazaro ewukie hena kufwa.

¹⁰ Wakateta mburi wakohani wabaha wamkome na Lazaro.

¹¹ Amu elwa lwakwe Wayahudi wengi wakafuma, wakamwitikija Isa.

¹² Musi wa keri wakwe matorano mengi wekiza ghati ya itasi wekisikia ti Isa eza Yerusalemi,

¹³ Wakamauha mani ma machangara wakafuma wambone, wakang’ola ighonda, Hosanna, atasiwa ula eza na izina lakwe Bwana, niye Mfumwa wa Israeli.

¹⁴ Isa ekimbona mwana njoe akamkwea sandu metamiwe.

¹⁵ Usiondoke, kibora Sayuni, yoa, Mfumwa wako aza, emkweie mwana wa njoe.

¹⁶ Vindu ivi tewetisiwe kuwoka waanaloshwa wakwe, nde ekinaguriwe nganyi Isa, niho wekikumbuka ti ivi viokie vitamiwe, navyo viokie wemwarehie.

¹⁷ Matorano mala meokie naye, ekinamwitanga Lazaro ghatiya mbira, akambushija hena kufwa, wakawondja mburi.

¹⁸ Amu ii wakamzia matorano, amu wesikie ti aluarehie luano ula.

¹⁹ Mafarisayo wakateta wohenawo, Yoeni sandu tusiwe kiteto, Yoa, masanga mamratera.

²⁰ Weokie na Wayonani ghati ya wawo wezie waombe ghati ya itasi.

²¹ Wakamzia Filipo, eokie wa Betsaida ya Galilaya, wakambujanya wekimburra, Bwana, tukundie kumbona Isa.

²² Akaza Filipo akamburra Andrea, na Andrea na Filipo wakamburra Isa.

²³ Isa akawatalwa ekiteta, Saa yafika aguriwe nganyi Mwana wa Adamu.

²⁴ Amin, amin, namburra, mbeu ya ngano isikagwe si ikafwe, iikaa mwenye, ekifwa eng’ola mawonwa mengi.

²⁵ Ekundie ngoro eneitesha, naye eisuie ngoro ghati ya masanga ama eneikija hena moo wa tendarasi.

²⁶ Mundu ekiniinda eniratere, nami handu nioho, uko eneoka na mwinda wangu; mundu ekiniinda, Apa enemguria nganyi.

²⁷ Yoo ngoro yangu iregije, nitete kini? Apa unikije ghati ya saa ii, kake elwa ii nizie mtano saa ii.

²⁸ Apa, uligurie nganyi izina lako. Ikaza ighonda ghati ya wanga, Niligurie nganyi na ninegurawa nganyi.

²⁹ Matorano weimuke wakasikia, wakateta, Yaoka kururuma. Weingi wakateta, Malaika etetie naye.

³⁰ Akatalwa Isa, akateta, Ighonda ili teliokie elwa mi, nde elwa unwi.

³¹ Ngeriaha kuoho kuchila kwa masanga ama, ngeriaha mbaha wa masanga ama enetaghiwa some.

³² Nami nikiwushijwa ghati ya isanga ninedjuta hangu vyose.

³³ Akateta ama ekiwondja kufwa enefwa.

³⁴ Matorano wakamtalwa, Uswi tusikie ghati ya torati ti Masiya eikaa tendarasi: nini wateta we ti tiwe Mwana wa Adamu kuwushijwa? niani uu Mwana wa Adamu?

³⁵ Akawawurra Isa, Ngeriaha misi si mingi changaji kioho henyu: seleni mkioka na changaji, kija kisimgure, amu ula esela ghati ya kija tetisiwe handu etonga.

³⁶ Mkioka na changaji, kiitikijeni changaji, muwone kuoka waana wa changaji. Akateta ama Isa, akatonga hakwe akakuwisa.

³⁷ Kake ekioka emaareha maluano mengi huwo kurongora yawo, tewamwitikija:

³⁸ Kiteto cha Isaya nabii kifike ekiteta, Bwana niani ejiitikija mburi jetu, na mkono wakwe Bwana ajuuiwa ninani?

³⁹ Amu ii teweidime kuitikija amu atetawa Isaya,

⁴⁰ Awabaja meso, akawaareha ngoro idindie, wesiwona na meso, wesikusara na ngoro, wagharuke, niwakije.

⁴¹ Nivyo evitetie Isaya ekiuwona ubaha wakwe akamtetia.

⁴² Mtano na merangoni mwa wabaha wengi wakamwitikija, kake elwa Mafarisayo, tewemratera, wasing’oliwe ghati ya sunagogi.

⁴³ Amu wakakunda kuisiswa kwa wandu kukela kuisiswa kwakwe Izuwa.

⁴⁴ Isa akang’ola ighonda akateta, Eniitikija, teniitikija mi nde ula eniingije.

⁴⁵ Eniyoa mi, emyoa eniingija.

⁴⁶ Nizie changaji ghati ya masanga, ula eniitikija asiikae kijeni.

⁴⁷ Naye evisikia niviteta asivigure, mi simchilia, amu siziemi nimachilie masanga, kaka nimakije masanga.

⁴⁸ Enisua, esivikunda niviteta, ena ula amchilia, kiteto nikiteta, nicho kinemchilia musi wa kuidiwa.

⁴⁹ Amu mi sitetie na mburi jangu tiki, kake eniingije Apa, uu akaniinga viteto nivitetawo na nivighambawo.

⁵⁰ Nami natisiwa ti kiteto chakwe ni moo wa tendarasi, Amu ii niviteta mi, sandu Apa eniwurra, nivyo nitetawo.