Yohana 11 - Sumu Yedi ya Isa Masiya 1906 Kitamo 1897 Malumbo 1905

¹ Heokie na mundu ewadjua, Lazaro wa Betania, wa kaa wawo Maryamu na Martha wanduwawo wakwe.

² Niye Maryamu ula emgerie marhamu Bwana, akamhaidja mawu na nyui jakwe, munduwawo wakwe Lazaro ewadjua.

³ Amu ii wanduwawo wakwe Wakamwingijia, wekiteta, Bwana, yoa, ula umkundie ewadjua.

⁴ Ekisikia Isa aketeta, Ndwari ii si ya kufwa, nde ya luisiso lakwe Izuwa, aisiswe Mwana wa Izuwa naye.

⁵ Akawakunda Isa Martha na munduwawo wakwe na Lazaro.

⁶ Ekisikia ti ewadjua akaikaa handu aho misi miri.

⁷ Mtano ekuade akawawurra waanaloshwa, Tuhunduke ghati ya Uyahudi.

⁸ Wakamburra waanaloshwa, Rabbi, misi ii Wayahudi wekundie kukugera mabwe, wenehundukawa uko?

⁹ Akatalwa Isa, Tejioho saa ikumi na mbiri ya hemusi? Mundu ekisela hemusi tekibigha kichaa, amu awona changaji cha masanga ama.

¹⁰ Mundu ekisela kio ekubigha, amu changaji tehena hakwe.

¹¹ Akateta ama, ekuade akawawurra. Lazaro mbuyaa wetu eshinjie, kake natonga nimbushe.

¹² Waanaloshwa wakamburra, Bwana, ekishinjia, enekia.

¹³ Akuteta Isa kufwa kwakwe, wala wakaghamba eteta kushinjia kwa luwohi.

¹⁴ Akawawurra Isa hena some, Lazaro efwie.

¹⁵ Namwizihirwa unwi, mbone kuitikija, ti mi sioho uko, nde tutonge hakwe.

¹⁶ Akawawurra Tomaso (eitangwa Maza) waanaloshwa waghenji, Tutonge na uswi, tufwe hamwe naye.

¹⁷ Ekiza Isa akawona ti eokie misi minne ghati ya mbira.

¹⁸ Betania ioho afuhi na Yerusalemi, sandu stadio ikumi na sano.

¹⁹ Wakaza Wayahudi wengi hawo Martha na Maryanu, wawahunduie elwa munduwawo.

²⁰ Naye Martha ekisikia ti Isa eza, akamtongia; Maryamu akaikaa nyumbeni.

²¹ Martha akamburra Isa, Bwana idje we aha, mundu wetu idje tekifwa:

²² Nde mtano ngeriaha natisiwa vyose uvikundie hakwe Izuwa, Izuwa enekuinga.

²³ Isa akamburra, Munduwenyu enewuka.

²⁴ Akamburra Martha, Natisiwa ti enewuka ghati ya kuwuka kwa musi wa kuidiwa.

²⁵ Akamburra Isa, Mi ni kuwuka na moo, eniitikija, ekifwa, eneoka na moo.

²⁶ Na ula eoka na moo ekiniitikija tafwaye tendarasi. Wamaitikija ama?

²⁷ Akamburra, Ee, Bwana, naitikija ti niwe Masiya, Mwana wakwe Izuwa, eza ghati ya masanga.

²⁸ Ekiteta ama akatonga akamwitanga Maryamu munduwawo, akambewedia, ekiteta, Mlosha eoho, ekuitanga.

²⁹ Naye ekisikia akawuka wangu akamzia.

³⁰ Na Isa esimefika ghati ya kaa, kake eoho handu emtoranie Martha.

³¹ Amu ii Wayahudi weokie naye ghati ya nyumba wakamhunduia, wekimbona Maryamu ti ewuka wangu akafuma, wakamratera wakateta, Etonga hena mbira eiye uko.

³² Maryamu ekiza handu eoho Isa, akambona, akamgura mawuni, ekimburra, Bwana, idje we waha munduwetu idje tekifwa.

³³ Isa ekimbona ekiiya nawo Wayahudi wetikane naye wekiiya, akaregija ngoroni, akashiniwa,

³⁴ Akateta, Nihi mumbikie? Wakamburra, Bwana, uze, uyoe.

³⁵ Isa akang’ola masoji.

³⁶ Wakateta Wayahudi, Yoa sandu emkundie.

³⁷ Weingi wawo wakateta, Teidima uu, amjuue meso ebajikameso, kuareha ti uu asifwe.

³⁸ Isa, ekiregijawa ngoroni, akafika hena mbira. Leokie na mbanga, na ibwe liwikwa wanga hakwe.

³⁹ Akateta Isa, Ushijeni ibwe. Akamburra munduwawo efwie, Martha, Bwana, ngeriaha awoa, amu afika misi minne.

⁴⁰ Akamburra Isa, Sikuwurre ti ukiitikija unekuwona kuisiswa kwakwe Izuwa?

⁴¹ Wakaliwushija ibwe eyedjwe efwie. Isa akawushija meso makwe wanga, akateta, Apa, nakuinga haika ti wanisikia.

⁴² Nami natisiwa ti wanisikia misi ose, kake elwa matorano majunguluka nitetie, wawone kuitikija ti niwe uniingija.

⁴³ Ekiteta ama akang’ola ighonda ibaha, Lazaro, fuma na shigati!

⁴⁴ Akafuma ula efwie, ekichungwa mawu na mikono na nguo, na usho wakwe uchungwa na leso. Akawawurra Isa, Mchungueni, mshigeni atonge hakwe.

⁴⁵ Wayahudi wengi, wezie hakwe Maryamu, wakaviyoa vindu eviareha wakamwitikija.

⁴⁶ Weingi wawo wakatonga hena Mafarisayo, wakawawurra eviareha Isa.

⁴⁷ Wakawunganya wakohani wabaha na Mafarisayo lumungu, wakateta, Tuareha kini? amu mundu uu eareha maluano mengi.

⁴⁸ Tukimshiga huwo wose wenemwitikija, na Warumi weneza wenetuwusha uswi na handu na mbare.

⁴⁹ Mwe wawo Kayafa, eokie mkohani mbaha mwaka ula, akawawurra,

⁵⁰ Unwi tomutisiwa kiteto na tomkusara ti ituwe mundu mwe afwe elwa wandu, mbare yose wesiteke.

⁵¹ Ama tematetie na kucha kwakwe ye, kake ekioka mwaka ula mkohani mbaha akamwotia ti Isa enefwa elwa mbare.

⁵² Na si elwa mbare ila tiki, nde waana wa Izuwa weghawanyika awawunganya hamwe.

⁵³ To musi ula wakateta mburi wamkome.

⁵⁴ Isa teseliewa hena some ghati ya Uyahudi, kake akafuma uko mtano handu afuhi na mashigati, mtano kaa iitangwa Efraim, akaikaa uko na waanaloshwa wakwe.

⁵⁵ Ikafikia Pasaka ya Wayahudi, wakakwea wengi mtano Yerusalemi ghati ya isanga kuwoka kwa Pasaka, wakuzerrije.

⁵⁶ Wakamwenda Isa, wakateta wonawo, wekiimuka hekaluni, Mwawonaze, tezia hena itasi.

⁵⁷ Weng’olie wakohani wabaha na Mafarisayo kiteto, ti mundu ekimtisiwa eoho, awawondje, wawone kumgura.