Yohana 10 - Sumu Yedi ya Isa Masiya 1906 Kitamo 1897 Malumbo 1905

¹ Amin, amin, namburra, esiingie na mbenge ghati ya ifio lwa magonji, nde akwea hengi na hengi, niye mhiwi na msoka.

² Eingia na mbenge niye Mrisha magonji.

³ Emjuuiaya uu mwinda mbenge, na magonji mesikia ighonda, ameitanga magonji makwe na izina, ameete shigati.

⁴ Ekimang’ola magonji makwe, atonga kurongora hawo, na magonji memratera amu wemtisiwa ighonda.

⁵ Mugheni tewemratere amu tewemtisiwe ighonda la mugheno.

⁶ Mfanano uu akawawurra Isa, kake tewevitisiwe vindu evitetie.

⁷ Akatetawa Isa, Amin, amin, namburra, ti mi ni mbenge ya magonji.

⁸ Wose wezie kuwoka hangu ni wehiwa na wesoka, kake magonji temewasikia ighonda.

⁹ Mi ni mbenge, eingia na mi enekia, eneingia, enefuma, enewona marisho.

¹⁰ Mhiwi teza nde ahiwe, asinze, anyamare: mi nizie wawone moo, na wanete kuuwona.

¹¹ Mi ni mrisha wedi, Mrisha wedi evika moo wakwe elwa magonji.

¹² Eokie na mshahara na esiokie mrisha, na esiokie mwenye magonji, ekimbona iginga leza, amashiga magonji, ematuka, iginga limagura, limagawanya magonji.

¹³ Eokie na mshahara ematuka, amu kuoka na mshahara tiki, na temarinda magonji.

¹⁴ Nimi niye mrisha wedi, niwatisiwe wala wangu, nitisivika na wala wangu.

¹⁵ Sandu enitisiwa Apa, huwo nami namtisiwa Apa: na moo wangu nauwika elwa magonji.

¹⁶ Na magonji meingi nina, mesiwa ifio ili, nawo kiniwe niwaete, nawo wenenisikia ighonda, ineoka ifio mwe na mrisha mwe.

¹⁷ Amu ii Apa enikundie, amu mi nauwika moo wangu niuuhewa.

¹⁸ Tehena ewushija, nde mi nauwika mwenye, nina zinya za kuuwika, nina zinya za kuuhawa, na kiteto iki naingwa na Apa wangu.

¹⁹ Wayahudi wakaghawawa na viteto ivi.

²⁰ Wakateta weingi wawo, Ena luhungu, kucha kwakwe kwateka, nikini mumsikija?

²¹ Weingi wakateta, Mwenye luhungu teteta huwo. Luhungu luidima kumjuua meso ebajikameso?

²² Iokie musi wa kutasa ndaswa ghati ya Yerusalemi, na misi ya kisie.

²³ Isa akasela hekaluni ghati ya mbenge ya Sulemani.

²⁴ Wakamjunguluka Wayahudi wakamburra, Mtano nirini uigure ngoro yetu, Ukioka Masiya, utuwurre na some.

²⁵ Akatalwa Isa, Namburra na tomuitikija, vindu naviareha na izina la Apa wangu, ivi viniwondjia mburi.

²⁶ Kake unwi tomuitikija, amu si unwi wa magonji mangu, sandu nimburrie.

²⁷ Magonji mangu menisikia ighonda, nami nametisiwe namo meniratera.

²⁸ Nami namaainga moo wa tendarasi, na temeneteka tendarasi, na mundu teidima kumasoka mkononi hangu.

²⁹ Apa wangu eniingie mbaha kukela wose, nete teidima mundu kumasoka mkononi hakwe Apa wangu.

³⁰ Mi na Apa mwe.

³¹ Wayahudi wakauhawa mabwe wamgere.

³² Akawatalwa Isa, Nambondjia vindu vyedi vingi hena Apa wangu; hena kindu ani munigera mabwe?

³³ Wakamtalwa Wayahudi, Hena kindu kiedi tokukugera mabwe, nde hena lung’endo, amu we, mwana Adamu, ukuosha Izuwa.

³⁴ Akawatalwa Isa, Tevitamiwe ghati ya torati yenyu, Mi nitetie, unwi maizuwa?

³⁵ Ekiwateta maizuwa wala weingiwe kiteto cha Izuwa (na matamo temaidima kubawa).

³⁶ Mumburra ula emgurie nganyi Apa akamwingija masangeni, Wateta na lung’endo, mikiteta, Mi ni Mwana wakwe Izuwa?

³⁷ Nisikaareha vindu vya Apa wangu, msiniitikija.

³⁸ Nikiviareha, msiniitikija mi, viitikijeni vindu, mbone kutisiwa na kuitikija ti ndeni hangu ni Apa, nami ndeni hakwe.

³⁹ Wakakundawa kumgura, kake akafuma ghati ya mikono yawo.

⁴⁰ Akatongawa hakwe sela ya keri ya Yardeni handu eokie kuwoka Yohana ekibatiza, akaikaa uko.

⁴¹ Wengi wakaza hakwe, wakateta, Yohana tearehie luano, kake vyose emtetie uu Yohana vya kididi.

⁴² Wengi wakamwitikija uko.