Wakwe Yakobo 3 - Sumu Yedi ya Isa Masiya 1906 Kitamo 1897 Malumbo 1905

¹ Musioke walosha weingi, wandwetu, mukitisiwa ti tunewona wuchili wa kuneta.

² Amu ghati ya vindu vingi twabigha msadara wose. Mundu esibigha msadara ghati ya kiteto, uu niye mundu eirowili, eidima kuuswija muri ose pia.

³ Tukagera hatamu ja frasi ghati ya miomo yawo, nesa jitusikije, twagharusha muri wawo ose pia.

⁴ Yoa, merikebu pia, jikioka mbaha muno, na jashukumwa ni ngungu ja zinya, kake jagharushwa na msukani mdongo muno, hala ngoro ya mguri‐msukani ekundie.

⁵ Huwo na lumi pia nilo irungo idongo, lukuisisa vibaha.

⁶ Yoa kitito ani kibaha kyashotwa na moto mdongo sa kini! Na lumi nilo moto; masanga ma owiwi ghati ya marungo metu ni lumi, lwagera muri ose ikwe, lwaasha gurudumu la mboneka, na lwaashwa na jehannum.

⁷ Amu mbare jose ja nyama na ndeghe, na vindu viarufa na vindu baharini, yachungwa na yaidiwa kuchungwa ni wandu:

⁸ Kake mundu teidimaye kuchunga lumi; nilo owiwi usisoghoke, lwaizua usungu wa kifwa.

⁹ Twamtasia Mzuri na Apa nalo: twawasesa wandu, welungiwe hena fwana ya Izuwa, nalo:

¹⁰ kufuma itumbu imwe kwaza na kutasia na kusesa. Wandwetu, teviwe vindu ivi.

¹¹ Luchoro lumwe lwang’ola kufuma iwongo imwe mbombe inona na iwawa?

¹² Mtini, wandwetu, uidima kugera mazeituni, kana mzabibu tini? nete mbombe ya munyu teidimayo kung’ola mbombe ya kunona.

¹³ Niani echee na mwenye ng’eno ghati yenyu? awonje hena kukia kwakwe kwedi mihiro yakwe ghati ya wuhoo wa kucha.

¹⁴ Kake mukaoka na luneng’o luwawa na iwoo ngoroni henyu, musikuisise nete musichwe maongo wanga ya kididi.

¹⁵ Kucha uku si kwa kusea kufuma wanga, nde kwa masangeni, kwa muri, kwa shetani.

¹⁶ Amu handu luneng’o na iwoo meoho, niho kuloziana na mhiro ose mbiwi.

¹⁷ Kake kucha kwa kufuma wanga niko kuwoka kezerre, ikwade kwa luworo, kuhoo, kuanguhe kwa kuombwa, kuizue lusario na ndunda jedi, kusina kuitalwa, kusina ukeleki.

¹⁸ Na ndunda ya ngalo yahandwa ghati ya luworo hena wala weareha luworo.