Wakwe Yakobo 2 - Sumu Yedi ya Isa Masiya 1906 Kitamo 1897 Malumbo 1905

¹ Wandwetu, musioke na luitikijo lwakwe Mzuri Yesu Kristo wa kirumi hena kuwasaghura wandu.

² Amu ekiingia ghati ya sunagogi lenyu mundu mwenye pete la thahabu na suke yedi, na ekiingia pia mundu mkiwa mwenye suke mbiwi:

³ na mukisaghura ula edoka suke yedi, mukimburra, Ikaa kunu handu hedi; na mukimburra mkiwa, Imuka uko, kana ikaa uko maghuni hangu;

⁴ tomuokie mwachika ngoroni renyu, mukioka wachili wenye makusaro mawiwi?

⁵ Sikijeni, wandwetu wakundwa, Izuwa tesaghuraye wakiwa wa masanga waoke wamazi ghati ya luitikijo, na wahoji wa ufumwa ewatemianie wala wemkundie?

⁶ Kake unywi mwambikia nguruna mkiwa. Siwo wamazi wemuinyala, nawo wenye wemubulula msongorana wa viikayo vya wuchili?

⁷ Siwo welitetia viwiwi izina lila ledi muitangiwe?

⁸ Kake mukifisha aghanyo la kifumwa, sandu itamiwe, Umkunde walatya wako sa ngoro yako, mwaketa nezo:

⁹ kake mukiwasaghura wandu, mwaketa ng’oki, mukiwonjwa na sheria sa watekwa.

¹⁰ Amu ose akeye egura sheria yose, ekitekwa ghati ya mwe, etekwa ghati ya yose.

¹¹ Amu ula etetie, Usishinde, akateta pia, Usikome. Huwo kwakicha toushinda we, nde wakoma, watekwa sheria.

¹² Huwo teteni na hireni sa wandu wenechiliwa hena sheria ya wusi‐wuzoro.

¹³ Amu wuchili usina lusario ni hakwe ula esisaria: na lusario lukuisisa wanga ya wuchili.

¹⁴ Hena mbucha ani, wandwetu, mundu ekighamba ti ena luitikijo, kake‐tenaye mihiro? luitikijo lula lwaidima kumkija?

¹⁵ Mdwenyu wa kiume kana wa kiche ekioka tuhu, ekisowa kijo kya misi yose,

¹⁶ mwe wenyu ekiwawurra, Tongeni hena luworo, mbone ndughuri na kuighuta, nete tewaingaye vindu vila muri uviwaiya; hena mbucha ani?

¹⁷ Huwo na luitikijo, lusina mihiro, lwafwa, lukioka lwenye.

¹⁸ Kake mundu eneghamba, We una luitikijo, na mi nina mihiro: uniwonje luitikijo luitikijo lwako lusina mihiro yako, na mi ninekuwonja luitikijo lwangu hena mihiro yangu.

¹⁹ Waitikija ti Izuwa ni mwe? waketa nezo; mashetani pia weitikija, na wededema.

²⁰ Kake ukundie kutisiwa, mundu mhaya, ti luitikijo lusina mihiro lwafwa?

²¹ apa wetu Ibrahimu tewona kuoka na ngalo hena mihiro ekinamng’ole Isaak mwana wakwe wanga ya kisiko?

²² Uwona ti luitikijo lwahira hamwe na mihiro yakwe, na hena mihiro luitikijolwairowilika? Matamo makafishwa metetie,

²³ Ibrahimu akamwitikija Izuwa, ikatarika hakwe hena ngalo, akaitangwa mbuyae Izuwa. Mwawona nize mundu eoshwa kuoka na ngalo hena mihiro,

²⁴ na si hena luitikijo tiki.

²⁵ Na huwo Rahab mshi ndi teoshwaye kuoka na ngalo hena mihiro, ekinawasongerije wasu, akawaingija nzia ingi?

²⁶ Amu sa muri usina ngoma ufwie, huwo na luitikijo lusina mihiro lwafwa pia.