Wakwe Yakobo 1 - Sumu Yedi ya Isa Masiya 1906 Kitamo 1897 Malumbo 1905

¹ Yakobo, mzoro wa Izuwa na wa Mzuri Yesu Kristo, hena mbare ikumi na mbiri jighawanyike: ngezia.

² Wandwetu, gheshijieni kuoka luizihiro deng’e mukigwa ghati ya maghesho mengi na mengi:

³ mukitisiwa ti kugheshwa kwa luitikijo lwenyu lwaareha lugumirio.

⁴ Na lugumirio lufishe ndima yakwe, mbone kuoka wairowili na waining’oi, musiduhuke kindu.

⁵ Mundu wenyu ekiwaiya ng’eno, amwombe Izuwa, ewaingie wose hena kuora, asibohie; naye eneingwa.

⁶ Kake aombe hena luitikijo, asiitalwe; amu ula eitalwa efwanana na mafuo ma bahari, metikwa ni ngungu na mewiritwa.

⁷ Amu mundu ula asighambe ti eneuhia kindu kufuma ha Mzuri;

⁸ mundu mwenye malusaro meri, esiduwa ghati ya nzia jakwe jose.

⁹ Kake mundu‐wa‐hetu mnana akuisise amu ya kukwejwa:

¹⁰ na mmazi amu ya kusejwa; amu sa kiwaro kya mani enevetia hae.

¹¹ Amu nzano yakwea na ngungu ya kushota, na yaomija mani; na kiwaro kyakwe kyagwa, na uwedi wa fwana yakwe wateka: huwo mmazi enenyaruka ghati ya nzia jakwe.

¹² Etasiwa mundu eting’iria ghati ya maghesho: amu ekiidiwa kukundika eneuhia lumerisia lwa moo, Mzuri ewatemianie wala wemkundie.

¹³ Mundu asighambe ekigheshwa, Nagheshwa ni Izuwa amu Izuwa teidimaye kugheshwa ni owiwi, nete mwenye temgheshaye mundu.

¹⁴ Kake mundu ose egheshwa ekijutwa ni kulangwa kwakwe mwenye, ekiilejwa.

¹⁵ Ikwade kulangwa, kukiemea, kwawona ng’oki; nayo ng’oki, ikikurijwa, kyawona kifwa.

¹⁶ Musikengwe, wandwetu wekundwa.

¹⁷ Kiingijo kyose kyedi, na kiingwa kyose kiirowili, kyafuma na wanga, kyasea kufuma Apa wa vyangaji, eye hakwe tehenaho kukoranya nete kivuri kya kugharuka.

¹⁸ Hena kukunda kwakwe mwenye etuwonie hena kiteto kya kididi, nesa tuoke sa malumbulwa ma vila vilungiwe naye,

¹⁹ Mwakitisiwa, wandwetu wakundwa. Kake mundu ose aoke mwanguhe wa kusikia, wa‐mboha hena kuteta, wa‐mboha hena oro:

²⁰ amu oro ya mundu teihirayo ndima ya Izuwa.

²¹ Hena lwa iyo muwike hae ikwe lose na kuizua‐fwanda kwa owiwi, na muuhie hena uhoo kiteto kihandike, kiidima kumukija ngoro.

²² Kake mukete kiteto, nete musisikie tiki, mukikukenga wenye.

²³ Amu mundu akeye ekikisikia kiteto, asikikete, niye sa mundu ekiwona wusho wakwe wa mboneka ghati ya kioo:

²⁴ amu ekuwona, etonga, chwi eiwaa mundu ani eokie.

²⁵ Kake ula eyoa ghati ya sheria iirowili eyo ya wusi‐wuzoro, na ekiikaa, nete si msikia mwenye kuiwaa, nde mketi eye ehira ndima, mundu ula enetasiwa ndimeni hakwe.

²⁶ Mundu wa henyu ekiwonwa kuoka mguri‐mbea, magheri teswijaye lumi lwakwe, ekikukenga ngoro, wuguri‐mbea wakwe mundu uu wuhaya.

²⁷ Wuguri‐mbea wuzerrike na wusina‐ikwe msongorana wa Izuwa na Apa niwo uu, Kuwayoa wesina‐wawee na ngawiani ghati ya wasi wawo, na kukurinda asioke na masanzisanzi ghati ya masanga.