Ujughuo 9 - Sumu Yedi ya Isa Masiya 1906 Kitamo 1897 Malumbo 1905

¹ Malaika wa kasano akabigha, nikawona ndondo kufuma wanga igwie masangeni: akaingwa ufunguo la iwongo la abusso.

² Akalichungua iwongo la abusso, ukukwea moshi kufuma iwongoni, sa moshi wa moto mbaha; nzano na mruke‐wa‐mwanya jikagerwa kija amu ya moshi wa iwongo.

³ Na ghati ya moshi jikafuma nzighe masangeni; jikaingwa zinya, sa vishushe vya masanga vina zinya.

⁴ Wakawurrwa wasinyamare mani ma masangeni, nete kyose kiwisi, nete musi ose, nde wandu wala tiki wesina muhuri ya Izuwa wanga ya malusinga mawo. Wakaingwa wasiwakome,

⁵ nde wawawijwe mieji misano: na kuwawiwa kwawo kukaoka sa kuwawiwa kwa kishushe, sandu kikibigha mundu. Na misi ila wandu weneenda kifwa wasikiwone;

⁶ ne wenekunda kufwa, na kifwa kiwamatuka. Fwana ja nzighe jikaoka sa frasi jiarehiwe hena ngondo;

⁷ na wanga ya mitwi yawo makaoka sa malumerisia mefwanana na thahabu, mawusho mawo makaoka sa mawusho ma wandu.

⁸ Wakaoka na nyui sa nyui ya wache, majegho mawo makaoka sa majegho ma simba.

⁹ Wakaoka na mabamba mbafuni, sa mabamba ma menya: ngori ya mazawu mawo ikaoka sa ngori ya magari, ya frasi nyingi jikidindika hena ngondo.

¹⁰ Na wena vitize sa vya vishushe, na maluzina; na ghati ya vitize vyawo ni zinya yawo ya kuwinya wandu mieji misano.

¹¹ Wena wanga yawo sa mfumwa malaika wa abusso: izina lakwe hena Kiebranie laitangwa Abaddon, na hena Kiyonani ena izina Apollyon.

¹² Wukiwa wa kuwoka waidiwika: yoa, mazawa ikwade mawukiwa meri.

¹³ Malaika wa katandatu akabigha, nikasikia ighonda la kufuma mbembe ja kisiko kya thahabu kioho msongorana wa Izuwa,

¹⁴ Mwe ekiteta na malaika wa katandatu, ula eokie na lughunda, Wachungua malaika wala wanne wechungwa hena mfuro mbaha Eufrate.

¹⁵ Malaika wala wanne wakachunguka, wearehiwe hena saa na musi na mweji na mwaka, nesa wakome ifungu la katatu la wandu.

¹⁶ Kutara kwa malweriri ma wakwei‐frasi kukaoka elfu ikumi keri kandu elfu ikumi: nisikie kutara kwawo.

¹⁷ Huwo nikajiwona frasi hena ndoto, na wala weikee wanga yawo, wenye mabamba mbafuni sa ma moto na huakinthos na kiberiti: na mitwi ya frasi yafwanana na mitwi ya simba: na ghati ya matumbu mawo wafuma moto na moshi na kiberiti.

¹⁸ Hena mabigho matatu ama ifungu la katatu la wandu wakakomwa, hena moto na moshi na kiberiti, jifumie ghati ya matumbu mawo.

¹⁹ Amu zinya ya frasi ioho ghati ya itumbu lawo, na ghati ya vitize vyawo: amu vitize vyawo vyafwanana na nyoka, na vina mitwi; na hena ivi wewinya.

²⁰ Wala weshighajike wa wandu, wasikomwe na mabigho ama, tewechwe‐mutiwo hena ndima ya mikono yawo, wasiombe mashetani, na sanamu ja thahabu, na ja fetha, na ja mabwe, na ja miti; jisiidime nete kuwona, nete kusikia, nete kusela:

²¹ nete tewechwe‐mutiwo hena kukoma kwawo, na wusawi wawo, na mbuya yawo, na kuhiwa kwawo.