Ujughuo 7 - Sumu Yedi ya Isa Masiya 1906 Kitamo 1897 Malumbo 1905

¹ Kutera kwa iki nikawona malaika wanne weimuke hena nganda nne ja masanga, ngungu isirurume deng’e masangeni, nete baharini, nete wanga ya mti akeye.

² Nikawona malaika ungi ekwea kufuma kikwea‐nzano, ekioka na muhuri ya Izuwa mwenye‐moo: akawaiyia wala malaika wanne na ighonda ibaha, weingiwe kuwinya masanga na bahari,

³ ekiteta, Usiwinye masanga, nete bahari, nete miti, mtano twaidiwa kuwagera muhuri wazoro

⁴ wa Izuwa wetu ghati ya malusinga mawo. Nikasikia kutara kwa wala wegerwa muhuri, elfu kandu ighana na makumanne na nne, wegeriwe muhuri kufuma mbare yose ya waana wa Israeli.

⁵ Wa mbare ya Yuda wegeriwe muhuri elfu kandu ikumi na mbiri: Wa mbare ya Reuben elfu kandu ikumi na mbiri: Wa mbare ya Gad elfu kandu ikumi na mbiri.

⁶ Wa mbare ya Asher elfu kandu ikumi na mbiri: Wa mbare ya Naftali elfu kandu ikumi na mbiri: Wa mbare ya Manasseh elfu kandu ikumi na mbiri:

⁷ Wa mbare ya Simeon elfu kandu ikumi na mbiri: Wa mbare ya Lawi elfu kandu ikumi na mbiri: Wa mbare ya Issakar elfu kandu ikumi na mbiri:

⁸ Wa mbare ya Zebulon elfu kandu ikumi na mbiri: Wa mbare ya Yusuf elfu kandu ikumi na mbiri: Wa mbare ya Benyamini wegeriwe muhuri elfu kandu ikumi na mbiri.

⁹ Kutera kwa ama nikawona, na yoa, wunganyiko ibaha, asiidime mundu kulitara, ghati ya mbare yose, na la mawee mose na wandu na malumi, wekiimuka msongorana wa kiikayo na msongorana wa Kadorome, wekidoka suke nyewa, na mani‐ma‐machangara mikononi hawo;

¹⁰ Na waiya na ighonda ibaha, wekiteta, Lukio hena Izuwa wetu eikee wanga ya kiikayo, na hena Kadorome.

¹¹ Malaika wose wakaoka wekiimuka kukijunguluka kiikayo, na waghosi, na wanne wenye‐moo; wakagwa msongorana wa kiikayo mawushoni hawo, wakamwomba Izuwa, wekiteta, Amen:

¹² lutasio, na kirumi, na kucha, na kung’ola haika, na nganyi, na zinya, na luidimo, hakwe Izuwa wetu ndarasi na ndarasi, Amen.

¹³ Mwe wa waghosi akatalwa akaniwurra, Awa wedoka suka nyewa, niwani, na wafumahi?

¹⁴ Na mi namburra, Mzuri wangu, we watisiwa. Akaniwurra, Awa niwo wefumie na wasi wubaha wula, wakajioja suke jawo, wakajiosha nyewa ghati ya sakame ya Kadorome.

¹⁵ Hena lwa iyo weoho msongorana wa kiikayo kya Izuwa: na wemtumikia hemusi na kio hekaluni hakwe: na ula eikee wanga ya kiikayo enetandika hema lakwe wanga yawo.

¹⁶ Tewenesikiawa nzaa, nete tewenesikiawa ngiru; nete nzano teinewabigha, nete ndughuri yose:

¹⁷ amu Kadorome eoho ghati na ghati ya kiikayo eneoka mrisha wawo, na enewatika mtano na maluchoro ma mbombe ja moo: na Izuwa enehaija hae isoji lose kufuma meso mawo.