Ujughuo 3 - Sumu Yedi ya Isa Masiya 1906 Kitamo 1897 Malumbo 1905

¹ Na hena malaika wa kanisa lioho Sardi utame; Vindu ivi evitetie ula ejihete Ngoma fungate ja Izuwa, na ndondo fungate: Najitisiwa ndima jako, ti una izina ti uoho na moo, na ufwie.

² Uchewe, uvidindije vindu vishighajike, vikundie kufwa: amu siwonami ndima jako jafishwa msongorana wa Izuwa wangu.

³ Hena lwa iyo kumbuka nize uuhie ukasikia: ukigure, urechwemuti. Hena lwa iyo kwakicha touchewawe, nineza sa muhiwi, na tounetisiwa saa ani ninekuzia.

⁴ Kake una mazina mafaa ghati ya Sardi, mesigere ikwe suke jawo: na wenesela na mi ghati ya nyewa, amu weinarwa.

⁵ Ula elela enedoka huwo suke nyewa; na sinelihaijami deng’e izina lakwe ghati ya chuo cha moo, na ninelighamba izina lakwe msongorana wa Apa, na msongorana wa malaika wakwe.

⁶ Mwenye isikio, akisikie kila ekitetie Ngoma hena makanisa.

⁷ Na hena malaika wa kanisa lioho Filadelfia utame; Vindu ivi eviteta ula esheneta, ula wa kididi, ula euhete ufunguo wakwe Daudi, ula ejughua, na tehena efinga, na efinga, na tehena ejughua:

⁸ Najitisiwa ndima jako (yoa, nawika msongorana wako mbenge ijughuke, asiidime mundu kuifinga), ti una zinya ndongo, ukakigura kiteto kyangu, usilikania izina langu.

⁹ Yoa, nang’ola wa sunagogi la Shetani, wa wala wekughamba kuoka Wayahudi, wasioke, nde wechwamwongo; yoa, ninewaosha waze na wainame msongorana wa maghu mako, na watisiwe ti nikukundie.

¹⁰ Amu ukigurie kiteto kya kugumirra kwangu, ninekurinda pia ghati ya saa ya kugheshwa, ikundie kumazia masanga mose, kuwaghesha wala wetua masangeni.

¹¹ Naza wanguwangu: kigure nezo kila ukihete, mundu asiluuhe lumerisia lwako.

¹² Ula elela ninemwosha ngujo ghati ya hekalu la Izuwa wangu, asifumewa uko, na ninetama wanga yakwe izina la Izuwa wangu, na izina la kiongo kya Izuwa wangu, Yerusalemi sha, kiseie kufuma wanga kufuma hakwe Izuwa wangu, na izina isha langu mwenye.

¹³ Mwenye isikio, akisikie kila ekitetie Ngoma hena makanisa.

¹⁴ Na hena malaika wa kanisa lioho Laodikea utame; Ivi evitetie Amen, shahidi mwitikiji na wa kididi, kuwoka kwa kulunga kwa Izuwa:

¹⁵ Najitisiwa ndima jako, ti we nete wa mbeho nete wa moto: nikundie uoke wa mbeho kana wa moto.

¹⁶ Huwo amu una ndughuri, na si nete wa moto nete wa mbeho, ninekutufa kufuma itumbu langu.

¹⁷ Amu waghamba, Nimi mmasi, nawona mali, na siduhukami kindu; usitisiwe ti niwe mwenye wasi na usiwa‐luizihiro na mkiwa na ubajike‐meso na tuhu.

¹⁸ Nakung’olia mburi uzore hangu thahabu izerrijwe na moto nesa uoke mmasi; na suke nyewa, nesa ukudoke, na soni ya utuhu wako usiwonwe; na mzighe wa meso ma kumawira meso mako, nesa uwone.

¹⁹ Wose niwakundie, nawadewera na nawabigha: hena lwa iyo ukete lunyarki, urechwa‐muti.

²⁰ Yoa, naimuka mbengeni na nabigha luwi: mundu ekilisikia ighonda langu na ekijughua mbenge, nineingia hakwe, na ninela hamwe naye, na ye hamwe na mi.

²¹ Ula elela, ninemwinga aikae si hamwe na mi ghati ya kiikayo kyangu, sandu mi ninelie, nikaikaa si hamwe na Apa ghati ya kiikayo kyakwe.

²² Mwenye isikio, akisikie kila ekitetie Ngoma hena makanisa.