Ujughuo 22 - Sumu Yedi ya Isa Masiya 1906 Kitamo 1897 Malumbo 1905

¹ Akaniwonja mfuro uzerre wa mbombe ya moo, uwaa sa krustallo, ukifuma ghati ya kiikayo kya Izuwa na kya Kadorome,

² ghati na ghati ya nzia yakwe. Na hena mbai ii ya mfuro na hena mbai ila ukaoka mti wa moo, ukigera ndunda ja mbare ikumi na mbiri, uking’ola ndunda yakwe mweji ose: mani ma mti makaoka hena kujihoja mbare.

³ Na telineokawa seso: na kiikayo kya Izuwa na kya Kadorome kineoka hala; na wazoro wakwe wenemtumikia;

⁴ na weneuwona wusho wakwe; na izina lakwe lineoka wanga ya malusinga mawo.

⁵ Na tekineokawa kio; nete tewewaiya kyangaji kya taa, nete kyangaji kya nzano; amu Mzuri Izuwa enewaangaja: na weneitoria ndarasi na ndarasi.

⁶ Akaniwurra, Viteto ivi viitikiji na vya kididi: na Mzuri, Izuwa wa ngoma ja waroti, emtumie malaika wakwe awawonje wazoro wakwe vindu visina huwo kuoka afuhi.

⁷ Na yoa, naza wangu. Etasiwa ula evigura viteto vya wuroti wa chuo iki.

⁸ Na mi Yohana niye evisikie akaviwona vindu ivi. Na nikinasikie na nikinawone, nikagwa kuomba msongorana wa maghu ma malaika ula eniwonja vindu ivi.

⁹ Na eniwurra, Kuyoe usikete huwo: nimi muzoro mughenji wako na wa wandwawo waroti, na wawo wevigura viteto vya chuo iki: mwombe Izuwa.

¹⁰ Na eniwurra, Usichunge viteto vya wuroti wa chuo iki, amu magheri afuhi.

¹¹ Ula esina ngalo, anete kuketa wusiwungalo: ula ena ikwe, anete kuoka na ikwe: na ula ena ngalo, anete kuketa ngalo: na ula esheneta, anete kushenetijwa.

¹² Yoa, naza wangu: na wuesi wangu uoho hamwe nami, nimwinge mundu ose hena ndima yakwe.

¹³ Nimi Alfa na Omega, wa kuwoka na wa kuidiwika, luwoko na luidiwiko.

¹⁴ Wetasiwa wala wejioja suke jawo, nesa waoke na luidimo lwa kuufikia mti wa moo, na waingie kiongo hena mbenge.

¹⁵ Shighati maguro, na wasawi, na waketi‐mbuya, na wakomi, na waombi‐sanamu, na mundu ose ekunda na eareha maongo.

¹⁶ Mi Yesu namtuma malaika wangu amushuhudie vindu ivi hena makanisa. Nimi mgi na mwana wakwe Daudi, ndondo iwaayo ya heyawo.

¹⁷ Na Ngoma na mwai weghamba, Nzoo. Na ula esikia, aghambe, Nzoo. Na ula esikia ngiru, aze: ula ekundie, aiuhe mbombe ya moo huwo.

¹⁸ Namshuhudia mundu ose esikia viteto vya wuroti wa chuo iki, mundu ekiongeja wanga yakyo, Izuwa enemwongejia mabigho metamiwe ghati ya chuo iki:

¹⁹ Na mundu ekiwushija ghati ya viteto vya chuo cha wuroti uu, Izuwa enembushijia ifungu lakwe ghati ya mti wa moo, na ghati ya kiongo kishenete, kitamiwe ghati ya chuo iki.

²⁰ Ula evishuhudia vindu ivi eteta, Ee, naza wangu. Amen: nzoo, Mzuri Yesu.

²¹ Mvono wa Mzuri Yesu uoke hamwe nawo weshenete. Amen.