Ujughuo 21 - Sumu Yedi ya Isa Masiya 1906 Kitamo 1897 Malumbo 1905

¹ Nikawona wanga sha na masanga masha: amu wanga ya kuwoka na masanga ma kuwoka mavetia hae; nete bahari teiohowa.

² Nikakiwona kiongo kishenete, Yerusalemi sha, kikisea kufuma wanga hakwe Izuwa, kiarehiwe sa mwai ehambwa hena mume wakwe.

³ Nikasikia ighonda la kufuma ghati ya kiikayo, likiteta, Yoa, hema la Izuwa lioho hamwe na wandu, naye enetua hamwe nawo, na weneoka wandu wakwe, na Izuwa mwenye eneoka hamwe nawo, na eneoka Izuwa wawo:

⁴ na enehaija isoji lose ghati ya meso mawo; na kifwa tekineokawa; nete tokuneokawa kushiniwa, nete kuiya, nete kuwawiwa, deng’e; vindu vya kuwoka vyavetia hae.

⁵ Ula eikee wanga ya kiikayo akaghamba, Yoa, naareha vyose visha. Na eghamba, Tama, amu viteto ivi ni viitikiji na kididi.

⁶ Akaniwurra, Vyaidiwa kuoka. Nimi Alfa na Omega, kuwoka na kuidiwika. Ninemwinga ula ena ngiru ya luchoro lwa mbombe ya moo huwo.

⁷ Ula elela enevihoja vyose; nami nineoka Izuwa hakwe, naye eneoka mwana wangu.

⁸ Kake hena wenye fole, na wesiitikija, na weshishirra na wakomi, na waketi‐mbuya, na wasawi, na waombi‐sanamu, na wechwa‐maongo wose, ifungu lawo ghati ya ndiwa eyo yaaka moto na kiberiti; nikyo kifwa kya keri.

⁹ Akaza mwe wa malaika wala weokie na mianje mifungate, wakamatika mabigho mafungate ma kuidiwika; akaniwurra, ekiteta, Kwea na kunu, ninekuwonja mwa, mche wakwe Kadorome.

¹⁰ Akanitika ghati ya Ngoma mtano nduwi mbaha na ndeza, akaniwonja kiongo kishenete, Yerusalemi, kikisea kufuma wanga hakwe Izuwa,

¹¹ kikioka na kirumi kya Izuwa: kyangaji kyakwe kikaoka sa ibwe la zora mbaha muno, sa ibwe la yaspi, lizerre sa krustallo:

¹² kina lusarigho lubaha na lwatonga wanga muno; kina mbenge ikumi na mbiri, na hena mbenge malaika ikumi na weri; na mazina metamiwa hala, nimo ma mbare ikumi na mbiri ja waana wa Israeli:

¹³ hena mbai ya kifuma‐nzano mbenge ndatu; hena mbai ya kaskazini mbenge ndatu; hena mbai ya kusini mbenge ndatu; na hena mbai ya kigwa‐nzano mbenge ndatu.

¹⁴ Lusarigho lwa kiongo lukaoka na maluwoko ikumi na meri, na wanga yamo mazina ikumi na meri ma waondo ikumi na weri wakwe Kadorome.

¹⁵ Ula etetie nami akaoka na, hena kighesho, irorote la thahabu la kukighesha kiongo, na mbenge jakwe, na lusarigho lwakwe.

¹⁶ Na kiongo kyajengwa kya mbai nne, na wueza wakwe wuringanana na kuarama kwakwe: akakighesha kiongo na irorote, stadio elfu ikumi na mbiri: wueza na kuarama na kutonga‐wanga kwakwe kwaringanana.

¹⁷ Akalughesha lusarigho lwakwe, mikono ighana na makumanne na minne, hena ighesho la mundu, nilo, la malaika.

¹⁸ Kujenga kwa lusarigho lwakwe kukaoka yaspi: kiongo kikaoka thahabu izerre, sa kioo kizerre.

¹⁹ Maluwoko ma lusarigho lwa kiongo makahambwa na mbare jose ja mabwe ma zora mbaha. Luwoko lwa kuwoka yaspi; lwa keri, saphiro: lwa katatu, kalkedo; lwa kanne, zumaridi;

²⁰ lwa kasano, sardonuxi; lwa katandatu, sardio; lwa kafungate, krusolitho; lwa kanane, berullo; lwa kakenda, topazio; lwa kaikumi, krusopraso; lwa ikumi‐na‐mwe, huakintho; lwa ikumi‐na‐miri, amethusto.

²¹ Namo maluwi ikumi na meri makaoka malulu ikumi na meri; luwi lose lumwelumwe lulu mwe: nzia ya kiongo ikaoka thahabu izerre, sa kioo kivetija kyangaji.

²² Nete siwoniemi hekalu hala: amu Mzuri Izuwa mwenye zinya, na Kadorome, ni hekalu lakwe.

²³ Na kiongo tekiwaiya nzano, nete mweji, jiangaje wanga yakwe: amu kirumi kya Izuwa kwakiangaja, na taa yakwe ni Kadorome.

²⁴ Na mbare jinesela ghati na ghati ya kyangaji kyakwe: na wafumwa wa masanga weete kirumi kyawo ndeni yakwe.

²⁵ Na mbenge jakwe tejinefingwa deng’e hemusi (amu tekineoka kio hala):

²⁶ na weneete kirumi na nganyi ya mbare ndeni yakwe:

²⁷ na tekineingia deng’e ndeni yakwe kindu kisiwe, nete ula eketa shishirro kana maongo; nde wala tiki wetamiwe ghati ya chuo cha moo chakwe Kadorome.