Ujughuo 20 - Sumu Yedi ya Isa Masiya 1906 Kitamo 1897 Malumbo 1905

¹ Nikawona malaika ekisea kufuma wanga, mwenye ufunguo wa abusso na mnyororo mbaha mkononi hakwe.

² Akamgura irimu, nyoka ya kae, eye Luhungu na Shetani, akamchunga hena miaka elfu.

³ Akambirita ghati ya Abusso, akaifinga, akaichunga wanga yakwe na muhuri, asikengewa mbare, mtano miaka ila elfu yaidiwika; ikwade tena huwo kuchungu magheri madongo.

⁴ Nikawona viikayo, wakaikaa wanga, wakaingwa wuchili: nikawona ngoma jawo wechwiwe mtwi hena mburi ya Yesu, na hena kiteto kya Izuwa, na wala wasiiombe nyama, nete sanamu yakwe, nete wasiluuhie luwano wanga ya lusinga lwawo na wanga ya mkono wawo; wakaoka na moo, wakaitoria hamwe na Masihi miaka elfu.

⁵ Weshighajike wa wefwie teweokie na moo mtano miaka elfu ila yaidiwika. Ulu ni luruko lwa kuwoka.

⁶ Etasiwa na esheneta ula eshanganya hena luruko lwa kuwoka: wanga ya awa kifwa kya keri tekina zinya; kake weneoka wakohani wa Izuwa na wa Kristo, na weneitoria naye miaka elfu.

⁷ Na miaka elfu ila ineikaidiwike, Shetani enechunguwa ghati ya kichungo kyakwe,

⁸ na enefuma ajikenge mbare jioho ghati ya nganda nne ja masanga, Gog na Magog, awawunganye hamwe hena ngondo: na kutara kwawo ni sa mzangazi wa bahari.

⁹ Wakakwea wanga ya kuarama kwa masanga, wakajunguluka matuo ma weshenete, na kiongo kikundike: moto ukasea kufuma wanga, ukawala.

¹⁰ Shetani ula ewakenga akawiritwa ghati ya ndiwa ya moto na kiberiti, weoho pia na nyama na mroti wa maongo: na wenewawijwa hemusi na kio ndarasi na ndarasi.

¹¹ Nikawona kiikayo kibaha kijewa, na ula eikee wanga yakwe, kufuma wusho wakwe masanga na wanga jikamatuka: nete tejiwoniwe handu.

¹² Nikawawona wefwie, wabaha na wadongo, wekiimuka msongorana wa kiikayo: vyuo vikajughuka: na chuo kingi kikajughuka, nikyo kya moo: na wefwie wakachiliwa ghati ya vindu vitamiwe hena vyuo hena ndima jawo.

¹³ Bahari ikang’ola wefwie weoho ndeni yakwe; kifwa na Ahera jikawang’ola wefwie weoho ndeni yajo: wakachiliwa mundu ose hena ndima jawo.

¹⁴ Kifwa na Ahera jikawiritwa ghati ya ndiwa ya moto. Iki nikyo kifwa kya keri, ndiwa ya moto.

¹⁵ Na mundu esiwonwa etamiwe ghati ya chuo cha moo, ewiritwe ghati ya ndiwa ya moto.