Ujughuo 2 - Sumu Yedi ya Isa Masiya 1906 Kitamo 1897 Malumbo 1905

¹ Hena malaika wa kanisa lioho Efeso utame, Vindu ivi evitetie ula ejigura ndondo fungate mkononi hakwe ha kuume, ula esela ghati na ghati ya taa fungate ja thahabu:

² Najitisiwa ndima jako, na kuhira kwako na kugumiria, na ti touidimawe kutikana na wandu wawiwi, ukawaghesha wala wekuitange waondo, wasioke, ukawawona wa‐maongo:

³ ukagumiria ukatika hena lwa izina langu, usibundike.

⁴ Kake nina iki wanga yako, ti ulushighie lukundo lwako lwa kuwoka.

⁵ Hena lwa iyo kumbuka kufumahi ugwie, urechwa‐muti, na ureareha ndima ja kumoka: nisioke nikikuzia, na niiwushije taa yako kufuma handu hakwe, usitechwemuti.

⁶ Kake iki ukihete, ti ujisua ndima ja Wanikolai nijo najisua na mi.

⁷ Mwenye isikio, akisikie kila ekitetie Ngoma hena makanisa. Ula elela, ninemwinga ale ya muti wa moo, uoho ghati ya Paradiso ya Izuwa.

⁸ Hena malaika wa kanisa lioho Smurna utame; Ivi evitetie wa‐kuwoka na wakuidiwika, eokie efwie, akaoka na moo;

⁹ Nautisiwa wasi wako, na wukiwa wako, (kake una mali), na kurigha kwawo wekughamba kuoka Wayahudi, wasioke, nde niwo sunagogi la Shetani.

¹⁰ Usiviituke vindu vila ukundie kuketiwa; yoa, shetani ekundie kugera wa‐henyu kichungoni, nesa mugheshwe; na uneoka na wasi misi ikumi; uoke mwitikiji mtano kifwa, na ninekuinga lumerisia lwa moo.

¹¹ Mwenye isikio, akisikie kila ekitetie Ngoma hena makanisa. Ula elela tenewinywaye na kifwa kya keri.

¹² Hena malaika wa kanisa lioho Pergamo utame, Ivi evitetie ula euhete muhandi ukaehe wa kutema mbai jose:

¹³ Natisiwa nihi utue, niho handu ha kiikayo kya Shetani; na waligura nezo izina langu, usilukanie luitikijo lwangu, nete ghati ya misi ya Antipasi shahidi wangu, mwitikiji wangu, eye ekomiwe ghati yenyu, handu Shetani etua.

¹⁴ Kake nina vindu vifaa wanga yako, amu una hala wandu wegura kulosha kwa Balaam, eye emloshie Balak kugera msadara msongorana wa waana wa Israeli, kula vindu ving’olwa matasi hena sanamu, na kuketa mbuya.

¹⁵ Huwo una pia wandu wegura kulosha kwa Wanikolai na nzia ilaila.

¹⁶ Hena lwa iyo chwa‐muti: nisioke nakuzia wanguwangu, na naareha ngondo wanga yawo na muhandi wa itumbu langu.

¹⁷ Mwenye isikio, akisikie kila ekitetie Ngoma hena makanisa. Ula elela, ninemwinga ya manna iwiswe, na ninemwinga ibwe ijewa, na wanga ya ibwe izina isha litamwe, mundu asilitisiwe nde ula eliuhia.

¹⁸ Na hena malaika wa kanisa lioho Thuatira utame; Vindu ivi evitetie Mwana wa Izuwa, eye ena meso makwe sa luwerewere lwa moto, na maghu makwe sa usango usingiwe:

¹⁹ Najitisiwa ndima jako na lukundo na luitikijo na kutumika na kugumirra, na ti ndima jako ja kuidiwika jajikela jila ja kuwoka.

²⁰ Kake nina iki wanga yako, amu umshigha mche ula Yezebeli, eye ekuitanga mroti; naye elosha na ewaileja wazoro wangu wakete mbuya, na wale vindu ving’olwe matasi hena sanamu.

²¹ Nikamwinga mwanya achwe‐muti; asikunde kuchwa‐muti hena mbuya yakwe.

²² Yoa, namgera ghati ya wui, na wala weshinda hamwe naye ghati ya wasi wubaha, wasitechwe‐muti ghati ya ndima jakwe.

²³ Na ninewakoma waana wakwe na kifwa; na makanisa mose menetisiwa ti nimi niye eenda ghati ya vikudi na ngoro: na ninemwinga mundu ose wa henyu hena ndima jenyu.

²⁴ Kake namburra unywi, mushighajika ghati ya Thuatira, wose musina kulosha uku, musivitisiwe vindu viforeke vya Shetani, sandu weghamba; sigerami wanga yenyu mwagho ungi.

²⁵ Kake kila mukihete, kigureni nezo mtano nineikanize.

²⁶ Ula elela, na ula egura ndima jangu mtano kuidiwika, ninemwinga zinya wanga ya mbare:

²⁷ Na enejiitoria na isibo la menya, sa viya vya muwumbi vibaikabaika; sandu na mi nauhia kufuma Apa:

²⁸ Na ninemwinga ndondo ya heyawo.

²⁹ Mwenye isikio, akisikie kila ekitetie Ngoma hena makanisa.