Ujughuo 19 - Sumu Yedi ya Isa Masiya 1906 Kitamo 1897 Malumbo 1905

¹ Kutera kwa ama nikasikia sa ighonda la matorano mabaha wanga, wekiteta, Halleluya; Lukio, na kirumi, na zinya, ja Izuwa wetu:

² amu mawuchili makwe ni ma kididi na ma ngalo; amu emchilia mshindi mbaha, emanyamara masanga na mbuya yakwe, na eihia lawi sakame ya wazoro wakwe hena mkono wakwe.

³ Kandu keri weghamba, Halleluya. Na moshi wakwe ukwea ndarasi na ndarasi.

⁴ Wala waghosi makumeeri na wanne na wenye‐moo wanne wakagwa wakamwomba Izuwa eikee kiikayoni, wekighamba, Amen; Halleluya.

⁵ Nikasikia sa ighonda la matorano mabaha, na sa ighonda la mbombe nyingi, na sa ighonda la ngurumo mbaha, likighamba, Halleluya: amu Mzuri Izuwa wetu,

⁶ Mwenye zinya, eitoria. Ighonda likafuma ghati ya kiikayo, likighamba, Mwingeni Izuwa wetu luisiso, unywi wose wazoro wakwe, unywi mumwondoka, wadongo na wabaha.

⁷ Tuizihirwe na tuisejwe muno, na tumrumishe, amu wai wa kadorome wafika, na mche wakwe ekuarehie.

⁸ Akaingwa akudoke bafta, izerre na nyewa: amu

⁹ bafta ni mihiro ya ngalo yawo weshenete. Na aniwurra, Tama, Wetasiwa wala weitangwa hena kijo‐kya‐wai kya Kadorome. Na aniwurra, Ivi viteto vya kididi vyakwe Izuwa.

¹⁰ Nikagwa si msongorana wa maghu makwe nimwombe. Na eniwurra, Kuyoe usikete huwo: nimi muzoro mughenji wako na wa wandwenyu weigura mburi ya Yesu: mwombe Izuwa: amu mburi ya Yesu ni ngoma ya wuroti.

¹¹ Nikawona wanga ijughuke; na yoa, frasi nyewa, na ula eikee wanga, eitangwa, Mwitikiji, na Mwenye‐kididi; na hena ngalo echila na eareha ngondo.

¹² Na meso makwe ni sa luwerewere lwa moto, na wanga ya mtwi wakwe diadema nyingi; na ena izina litamiwe, asilitisiwa mundu nde ye mwenye.

¹³ Na edoka suke inyinyirrwe sakame: na izina lakwe laitangwa Kiteto kya Izuwa.

¹⁴ Na malweriri meoho wanga wakamratera wanga ya frasi nyewa, wekidoka bafta, nyewa na izerre.

¹⁵ Na ghati ya itumbu lakwe wafuma muhandi ukaehe, nesa ajibigha mbare nagho: na enewaitoria na isibo la menya: na ewata unanda wa kuaka kwa oro ya Izuwa Mwenye zinya.

¹⁶ Na ena izina litamiwe wanga ya suke yakwe na kigha kyakwe, MFUMWA WA WAFUMWA, NA MZURI WA WAZURI.

¹⁷ Nikawona malaika ekiimuka hena nzano; akaiya na ighonda ibaha, ekijiwurra ndeghe jose jiburuka wanga ghati na ghati, Nzooni muwunganyike hena kijo kibaha kya Izuwa;

¹⁸ nesa mule nyama ya wafumwa, na nyama ya njama, na nyama ya wandu waaria, na nyama ya frasi na ya wala weikee wanga yajo, na nyama ya wandu wose, na wesi‐wazoro na wazoro, na wadongo na wabaha.

¹⁹ Nikaiwona nyama, na wafumwa wa masanga, na malweriri mawo, wewunganyike nesa wabighane na ula eikee wanga ya frasi, na lweriri lwakwe.

²⁰ Nyama akagurwa, na hamwe naye mroti wa maongo, ula emaketie maluwano mesoni hakwe, na henamo akawakenga wala weluuhie luwano lwa nyama, na wala weiomba sanamu yakwe: awa weri wakawiritwa wenye moo ghati ya ndiwa ya moto iaka na kiberiti:

²¹ wala weshighajike wakakomwa na muhandi wa ula eikee wanga ya frasi, muhandi ufumie ghati ya itumbu lakwe: ndeghe jose jikaighuta na nyama yawo.