Ujughuo 17 - Sumu Yedi ya Isa Masiya 1906 Kitamo 1897 Malumbo 1905

¹ Akaza mwe ua malaika wafungate wala weokie na mianje mifungate, akaniwurra, ekighamba, Nzoo na kunu, na ninekuwonja wuchili wa mshindi mbaha eikee wanga ya mbombe nyingi;

² eye wafumwa wa masanga wakaketa mbuya naye, na wala wetua masangeni wakaengejwa na mvinyo wa mbuya yakwe.

³ Akanitika hae ghati ya Ngoma mtano na shighati: nikawona mche eikee wanga ya nyama irotome, ikiizua mazina ma kurigha, ikioka na mitwi mifungate na mbembe ikumi.

⁴ Mche akadoka ngundu na irotome, akahambwa na thahabu na ibwe ledi na malulu, ehete mkononi hakwe ndemwa ya thahabu iizue mashishirro, vindu vina‐ikwe vya mbuya yakwe.

⁵ Na wanga ya lusinga lakwe izina litamiwe, MBISO, BABELI MBAHA, MEE WASHINDI NA MASHISHIRRO MA MASANGA.

⁶ Nikambona mche eengea hena sakame ya weshenete, na hena sakame ya mashahidi wakwe Yesu. Nikinambone, nikarighiwa irighio ibaha.

⁷ Malaika akaniwurra, Nini urighiwe? ninekuwurra mbiso ya mche, na ya nyama yamtika, ina mitwi mifungate na mbembe ikumi.

⁸ Nyama uiwonie iokie, na teioho; na ikundie kukwea kufuma na Abusso, na kuingia luteshoni. Na wala wetua masangeni wenerighiwa, wala izina lawo lisitamwe ghati ya chuo cha moo too kuwoka kwa masanga, wekiiwona nyama, nize iokie, na teioho, na ineza.

⁹ Aha lusaro luchee. Mitwi ila mifungate ni nduwi fungate, wanga yajo mche eikaa:

¹⁰ na niyo wafumwa wafungate: wasano wagwa, mwe eoho, ungi temezaye: na ekiza tena huwo kuikaa kadongo.

¹¹ Na nyama iokie, na teioho, niye mwenye wa kanane, na ni wa wala wafungate; na eingia luteshoni.

¹² Najo mbembe ikumi ujiwonie ni wafumwa ikumi, wesimeingwa ufumwa; kake weuhia luidimo sa wafumwa, hamwe na nyama, hena saa mwe.

¹³ Awa wena lusaro lumwe, na wemwinga nyama zinya yawo na luidimo lwawo.

¹⁴ Awa wenebighana na Kadorome, na Kadorome enewalela, amu niye Mzuri wa wazuri, na Mfumwa wa wafumwa; nawo pia weoho naye wenelela, weitangwa, na wesaghurwa, na weitikiji.

¹⁵ Na eniwurra, Mbombe ujiwonie, handu mshindi eikaa, ni wandu, na matorano, na mbare, na malumi.

¹⁶ Na mbembe ikumi ujiwonie, na nyama, awa wenemsua mshindi, na wenemwosha mhaya na tuhu, na wenela nyama yakwe, na wenemshota deng’e na moto.

¹⁷ Amu Izuwa egerie ngoroni hawo kuketa sandu ekundie, na kuoka na lusaro lumwe, na kumwinga nyama ufumwa wawo, mtano viteto vyakwe Izuwa vineikavifishwe.

¹⁸ Na mche eye umbonie ni kiongo kila kibaha, kiitoria wanga ya wafumwa wa masanga.