Ujughuo 16 - Sumu Yedi ya Isa Masiya 1906 Kitamo 1897 Malumbo 1905

¹ Nikasikia ighonda ibaha la kufuma hekalu, likiwawurra malaika wafungate, Tongeni, muremimina mianje mifungate ya oro ya Izuwa masangeni.

² Wa kuwoka akatonga, akamimina mwanje wakwe masangeni; kikaoka kionda kiwiwi na kibaha wanga ya wandu weokie na luwano lwa nyama, na weiombie sanamu yakwe.

³ Wa keri akamimina mwanje wakwe baharini; ikaoka sakame sa ya mundu efwie; na kyose kina moo kikafwa, vindu viohoho baharini.

⁴ Wa katatu akamimina mwanje wakwe ghati ya mifuro na maluchoro ma mbombe; ikaoka sakame.

⁵ Nikasikia malaika wa mbombe ekiteta, Mwenye ngalo we, uoho na uokie, We Mshenete, amu uchilie huwo:

⁶ amu wemimina sakame ya weshenete na waroti, ukawainga sakame wanywe: weinarwa.

⁷ Nikasikia kisiko kikiteta, Ee, Mzuri Izuwa, We mwenye zinya, ma kididi na ma ngalo mawuchili mako.

⁸ Wa kanne akamimina mwanje wakwe wanga ya nzano; ikaingwa kuomija wandu na moto.

⁹ Wandu wakaomijwa na ndughuri mbaha; wakalirigha izina la Izuwa eye ena zinya wanga ya mabigho ama; wasichwe‐muti wamng’olie kirumi.

¹⁰ Wa kasano akamimina mwanje wakwe wanga ya kiikayo kya nyama; ufumwa wakwe ukagerwa kija; wakatafuna malumi mawo hena kuwawiwa,

¹¹ wakamrigha Izuwa wa wanga amu ya maluwawo mawo na viondo vyawo; wasichwe‐muti hena ndima jawo.

¹² Wa katandatu akamimina mwanje wakwe wanga ya mfuro mbaha, Eufrate; mbombe yakwe ikaoma, nesa nzia iarehiwe hena wafumwa wa mbai ya kifuma‐nzano.

¹³ Nikawona jikifuma na itumbu la irimu, na itumbu la nyama, na itumbu la mroti wa maongo, ngoma ndatu jina ikwe, sa machua:

¹⁴ amu nijo ngoma ja maluhungu, jiareha maluwano, nijo jifumie hena wafumwa wa masanga mose, jiwawunganye hena ngondo ya musi mbaha wa Izuwa, Eye Mwenye zinya.

¹⁵ (Yoa, naza sa mhiwi. Etasiwa ula echewa, na ejirinda suke‐ja‐kudoka jakwe, asisele tuhu, na wawone nguruna yakwe.)

¹⁶ Wakawawunganya hamwe mtano na handu heitangwa hena Kiebrania, Har‐Magedon.

¹⁷ Wa kafungate akamimina mwanje wakwe wanga ya mruki‐wa‐mwanya; likafuma ighonda ibaha ghati ya hekalu, kufuma kiikayo, likiteta, Kyaidiwika:

¹⁸ vikaoka vimereteko, na maghonda, na marurumo; kukaoka kudedema‐kwa‐si kubaha, sa tokumeoka too wandu weokie masangeni, kudedema‐kwa‐si kwa zinya huwo, na kubaha.

¹⁹ Kiongo kubaha kukakughawa kuoka mafungu matatu, viongo vibaha vya mbare vikagwa: Babeli mbaha akakumbukwa mesoni ha Izuwa, amng’olie ndemwa ya mvinyo wa kuaka kwa oro yakwe.

²⁰ Kidara kyose kikamatuka, na nduwi tejiwonwajo.

²¹ Mvua mbaha ya mabwe, ma kuemea sa talanta, ikawaseia wandu kufuma wanga: wandu wakamrigha Izuwa amu ya ibigho la mvua ya mabwe; amu ibigho lakwe ibaha muno.