Ujughuo 13 - Sumu Yedi ya Isa Masiya 1906 Kitamo 1897 Malumbo 1905

¹ likaimuka wanga ya mzangazi wa bahari. Nikawona nyama ikikwea kufuma baharini, ina mbembe ikumi na mitwi mifungate, na wanga ya mbembe jakwe diadema ikumi, na wanga ya mitwi yakwe mazina ma kurigha.

² Na nyama niiwonie ikafwanana na lukeri, na maghu makwe makaoka sa ma dubu, na itumbu lakwe sa itumbu la simba. Irimu akamwinga zinya yakwe na kiikayo kyakwe na luidimo lubaha.

³ Nikawona mwe wa mitwi yakwe sandu ubighwa hena kifwa; na ibigho‐la‐kifwa likahojwa; masanga mose makarighiwa hena nyama:

⁴ wakamwomba irimu, amu emwingie nyama luidimo lwakwe; wakamwomba nyama, wekighamba, Niani eye sa nyama ila? na niani eidima kubighana naye?

⁵ Akaingwa itumbu ibaha lateta vindu vibaha na marigho; akaingwa luidimo lwa kuikaa mieji makumanne na miri.

⁶ Akajughua itumbu lakwe hena marigho wanga ya Izuwa, alirighe izina lakwe, na hema lakwe, wala wetua wanga.

⁷ Akaingwa kubighana na weshenete, na kuwalela: akaingwa luidimo wanga ya mawee mose, na wandu na lumi na mbare.

⁸ Na wose wetua masangeni wenemwomba, ose izina lakwe lisitamwe ghati ya chuo cha moo cha Kadorome, kala kekomiwe too kulungwa kwa masanga.

⁹ Mundu ekioka na isikio, asikie.

¹⁰ Kwakicha mundu ni wa kuchungwa, etonga ghati ya kuchungwa: kwakicha mundu enekoma na muhandi, tena huwo kukomwa na muhandi. Ni aha lugumirio na luitikijo lwa weshenete.

¹¹ Nikawona nyama ingi ikikwea kufuma masangeni; akaoka na mbembe mbiri sa kadorome, akateta sa irimu.

¹² Naye eketa luidimo lwose lwa nyama ila ya kuwoka mesoni hakwe. Na emaosha masanga na wala wetua uko kuomba nyama ya kuwoka, eye ehojwa ibigho‐la‐kifwa lakwe.

¹³ Na eketa maluwano mabaha, mtana aseje moto kufuma wanga kuza masangeni mesoni ha wandu.

¹⁴ Na ewakenga wala wetua masangeni hena maluwano mala eingwa kumaketa mesoni ha nyama; ekiwawurra wala wetua masangeni, wamwarehie ila nyama sanamu, eyo eokie na ibigho la muhandi, ikakia.

¹⁵ Akaingwa kuiinga kuhema, sanamu ila ya nyama, sanamu ya nyama iwone kuteta, na iwaoshe wose wesiiombe sanamu ya nyama wakomwe.

¹⁶ Na eosha wose, wadongo na wabaha, wamasi na wakiwa, esiwazoro na wazoro, waingwe luwano hena mkono wawo wa kuume kana hena lusinga lwawo;

¹⁷ nete mundu akeye asiidime kuzora nete kutagha, nde ula ena luwano, nilo izina la nyama kana kutara kwa izina lakwe.

¹⁸ Aha ni kucha. Mwenye ng’eno, akutare kutara kwa nyama; amu ni sa kutara kwa mundu: na kutara kwakwe ni maghana matandatu na makumi matandatu na tandatu.