Ujughuo 12 - Sumu Yedi ya Isa Masiya 1906 Kitamo 1897 Malumbo 1905

¹ Luwano lubaha lukawonwa wanga; mche edokie nzano, na mweji si ya maghu makwe, na wanga ya mtwi wakwe lumerisia lwa ndondo ikumi na mbiri.

² Akaoka eemee: akaiya, ekiwawiwa ghati ya kuwona, na ghati ya luwawo lwa kuwona.

³ Lukawonwa luwano lungi wanga; na yoa, irimu ibaha ingundu, lina mitwi mifungate na mbembe ikumi, na wanga ya mitwi yakwe diadema fungate.

⁴ Na kitize kyakwe kyabulula ifungu la katatu la ndondo ja wanga, kikajiwirita mtano masangeni: irimu likaimuka msongorana wa mche ula ekundie kuwona, nesa ekiidiwa kuwona, amle mwana wakwe.

⁵ Akawona mwana, mwana wa kiume, eye enejiitoria mbare jose na isibo la menya: mwana wakwe akakwejwa ha Izuwa, na ha kiikayo kyakwe.

⁶ Mche akamatuka mtano na shighati, niho enearehiwa handu ni Izuwa, nesa wamrishe hala misi elfu na maghana meri na makumi matandatu.

⁷ Heokie na ngondo wanga: Michaeli na malaika wakwe wekiareha ngondo na irimu; irimu likabighana hamwe na malaika wakwe;

⁸ na tewelelawo, nete handu hawo tehawonwawa wanga.

⁹ Irimu lila ibaha akataghwa si, nyoka ya kae, ula eitangwa Luhungu na Shetani, mkengi masanga mose: akataghwa masangeni, na malaika wakwe wakataghwa hamwe naye.

¹⁰ Nikasikia ighonda ibaha wanga, likiteta, ingeriaha lwaza lukio, na zinya, na ufumwa wa Izuwa wetu, na luidimo lwa Kristo wakwe: amu mlinganya wandwetu ataghwa si, eye ewalinganya msongorana wa Izuwa wetu hemusi na kio.

¹¹ Wakamlela amu ya sakame ya Kadorome na amu ya kiteto kya mburi yawo, na tewekundiewo moo wawo mtano kifwa.

¹² Hena lwa iyo izihirweni, wanga, na unywi mutua uko. Wukiwa hena masanga na hena bahari: amu shetani amuseiye, ekioka na oro nyingi, ekitisiwa ti ena magheri mafuhi tiki.

¹³ Irimu likinawone ti lataghwa si masangeni, likamkinya mche ula embonie mwana wa kiume.

¹⁴ Mche akaingwa mazaghu meri ma mbarambako mbaha, nesa aburuke mtano na shighati hena handu hakwe, niho erishwa magheri, na magheri meri, na nusu ya magheri, hae kufuma wusho wa nyoka.

¹⁵ Nyoka ikawirita kufuma itumbu lakwe nyuma ya mche mbombe sa mfuro, nesa imwinge kutikwa na kiroro.

¹⁶ Isanga likamghenja mche, isanga likajughua itumbu lakwe, likaumija mfuro liuwirita irimu kufuma itumbu lakwe.

¹⁷ Irimu likagurwa na oro wanga ya mche, likatonga kuareha ngondo na weshighajike wa waana wakwe, wemagura maaghanyo ma Izuwa, na wena mburi ya Yesu: