Ujughuo 11 - Sumu Yedi ya Isa Masiya 1906 Kitamo 1897 Malumbo 1905

¹ Nikaingwa iroroti sa isibo: mwe akaghamba, Wuka, ureghesha hekalu la Izuwa, na kisiko, na wala weomba uko.

² Na kiwanza kioho some ya hekalu ukishighe shighati, usikigheshe; amu kyang’olwa hena mbare; na kiongo kishenete wenekiwata na maghu mieji makumanne na miri.

³ Na ninewainga mashahidi wangu weri, na wenerota misi elfu na maghana meri na makumi matandatu, wekidoka suke ya igunia.

⁴ Ii niyo mizeituni miri na taa mbiri, jiimuka msongorana wa Mzuri wa masanga.

⁵ Na mundu akakunda kuwawinya, moto ufuma ghati ya itumbu lawo, na uwala maring’a mawo; na kwakicha mundu enekunda kuwawinya, tenaye huwo kukomwa hena nzia ii.

⁶ Awa wena zinya kufinga wanga, ising’ole mvua magheri ma misi ya kurota kwawo: na wena zinya wanga ya mbombe kujigharusha kuoka sakame, na kumabigha masanga na ibigho lose, keingi sandu wenekunda.

⁷ Na weneikaweidiwe mburi yawo, nyama ekwea kufuma abusso eneareha ngondo nawo, na enewalela, na enewakoma.

⁸ Na vimba vyawo vioho nzieni ha kiongo kibaha, kiitangwa hena ngoma Sodoma na Misri, niho na Mzuri wawo ewanikwe.

⁹ Na ghati ya wandu na mavee na malumi na mbare wandu weviyoa vimba vyawo misi mitatu na nusu, wasishighe vimba vyawo kuyajwa mbireni.

¹⁰ Na wala wetua masangeni wenevisekia, na weneizihirwa; na weneingija viingijo mundu hena mughenji; amu waroti awa weri wewawawije wala wetua masangeni.

¹¹ Na kutera kwa misi mitatu na nusu luhemo lwa moo lwa kufuma kwa Izuwa lukawaingia, wakaimuka maghuni hawo; fole mbaha ikawagwia wala wewawonie.

¹² Wakasikia ighonda ibaha la kufuma wanga likiwawurra, Kwea na kunu. Wakakwea wanga ijumbini; maring’a mawo wakawawona.

¹³ Na saa ila ila kukaoka kudedema kubaha kwa si, ifungu la ikumi la kiongo likagwa; wakakomwa ghati ya kudedema kwa si wandu elfu fungate: wala weshighajike wakamrumisha Izuwa wa wanga.

¹⁴ Wukiwa wa keri wuvetia: yoa, wukiwa wa katatu wuza wanguwangu.

¹⁵ Malaika wa kafungate akabigha: makaratera maghonda mabaha wanga, makaghamba, Ufumwa wa masanga udiwika kuoka wakwe Mzuri wetu, na wa Kristo wakwe: na eneitoria ndarasi na ndarasi.

¹⁶ Nawo waghosi makumeeri na wanne, weikee msongorana wa Izuwa wanga ya viikayo vyawo, wakagwa wushoni hawo, wakamwomba Izuwa,

¹⁷ wekighamba, Twakuanjela, ee Mzuri Izuwa, mwenye zinya, uoho na uokie; amu ugurie zinya mbaha yako, ukaitoria.

¹⁸ Mbara jikaregija, oro yako ikaza, na magheri ma wefwie kuchiliwa, na kuwainga wazoro wako waroti awahache yawo, nawo weshenete, nawo weliondoka izina lako, na wadongo na wabaha; na kuwanyamara wala wemanyamara masanga.

¹⁹ Likajughuka hekalu la Izuwa lioho wanga; likawonwa hekaluni hakwe safina la aghanyo lakwe; vikaratera vimereteko, na maghonda, na marurumo, na kudedema kwa si, na mvua mbaha ya mabwe.