Ujughuo 10 - Sumu Yedi ya Isa Masiya 1906 Kitamo 1897 Malumbo 1905

¹ Nikawona malaika ungi mwenye zinya ekisea kufuma wanga, ekidoka ijumbi; wuta‐wa‐waasi ukaoka mtwini hakwe, wusho wakwe ukaoka sa nzano, na maghu makwe sa ngujo ja moto.

² Ehete mkononi hakwe kachuo kadongo kejughuwe; akawika kughu kwakwe kwa kuume wanga ya bahari, na kughu kwakwe kwa kumoso wanga ya masanga:

³ akaiya na ighonda ibaha, sa simba erunduma: ekinaiye marurumo mafungate makang’ola maghonda mawo.

⁴ Marurumo mafungate mekinang’ole maghonda, nikakunda kutama: nikasikia ighonda la kufuma wanga likiteta, Chunga na muhuri vindu evyo marurumo mafungate meving’olie, usivitame.

⁵ Malaika ula nimbonie eimuke wanga ya bahari na wanga ya masanga akawushija mkono wakwe wa kuume wanga,

⁶ akarara hena ula ekia ndarasi na ndarasi, eye elungie wanga na vindu viohoho, na masanga na vindu viohoho, ti temeneokawa magheri:

⁷ kake misi ya ighonda la malaika wa kafungate, ekioka ekundie kubigha, niho yafishwa mbiso ya Izuwa, hena mburi jedi ewang’olie wazoro wakwe waroti.

⁸ Na ighonda nilisikie kufuma wanga, nikalisikiawa likiteta nami, na likighamba, Tonga, ureuha chuo kijughuwe mkononi ha malaika eimuka wanga ya bahari na wanga ya masanga.

⁹ Nikamtongia malaika, nikimburra aniinge kachuo. Akaniwurra, Kauhe, na ukale; na kenewawija ndeni yako,

¹⁰ kake itumbuni hako kenenona sa nzoke. Nikakauha kachuo mkononi ha malaika, nikakala; itumbuni hangu kekanona sa nzoke; nikinaidiwe kukala, ndeni yangu ikawawa.

¹¹ Na waniwurra, touna huwo kurotawa wanga ya wandu weingi na mbare na malumi na wafumwa.