Mattayo 9 - Sumu Yedi ya Isa Masiya 1906 Kitamo 1897 Malumbo 1905

¹ Akakwea ngalaweni, akakela, akafika kiongo chakwe ye.

² Wakamwetie mwenye kuwia eyejwe wuini. Na Yesu ekiluwona luitikijo lwawo akamburra mwenye kuwia, Ngoro yako idinde, mwana, wawushijiwa ng’oki jako.

³ Na yoa, watami wengi wakaghamba ngoroni, Uu ateta owiwi.

⁴ Yesu ekitisiwa makusaro mawo akaghamba, Hena kini mwakusara viwiwi ngoroni henyu?

⁵ Amu nikihi kianguhe? kughamba, Wawushijiwa ng’oki jako? kana ndekughamba, Imuka, uresela?

⁶ Kake nesa mutisiwe ti Mwana wa mundu niye mwenye zinya masangeni kuwushija kutekwa (amburra mwenye kuwia), Imuka, uwushije wui wako, utonge nyumbeni hako.

⁷ Akaimuka akatonga nyumbeni hakwe.

⁸ Matorano wekiwona wakaituka, wakamwisisa Izuwa ewaingie wandu zinya sa iji.

⁹ Na ekinafume kula Yesu, akawona mundu eikee handu ha kushangiwa, eitangwa Mattayo: Akamburra, Niratera. Akawuka, akamratera.

¹⁰ Ikaoka ekinaikae nyumbeni, yoa, wauhi lushango weingi na wenye ng’oki wakaikaa hamwe na Yesu na waanalosha wakwe.

¹¹ Wafarisayo wekiwona wakawawurra waanalosha wakwe, Hena kini mlosha wenyu ela na wauhi lushango na wenye ng’oki?

¹² Ekisikia akaghamba, Wenye zinya teweenda mughanga, nde wala wewadjua.

¹³ Tongeni murekulosha nikini iki, Nakunda lusario, nete si itasi: amu siziemi kuitanga wenye ngalo, nde wenye ng’oki.

¹⁴ Magheri mala wemzia waanalosha wa Yohana, wekighamba, Hena kini uswi na Wafarisayo twachunga keingi, kake waanalosha wako tewechungawo?

¹⁵ Yesu akamburra, Waana wa ngasu waidima kuchunga, magheri mwenye ngasu eoho hamwe nawo? misi ineza mwenye ngasu eneikaewushijwe hawo, niho weneikawechunge.

¹⁶ Tehena mundu egera kidame cha suke sha wanga ya suke isakae, amu ila ya kuarehia yauha ya suke, na yaneta kubajika.

¹⁷ Nete tewegera mawa masha ghati ya vikuchu visakae: kwakicha si huwo, vikuchu vyabajika, na mawa maitika, vikuchu vikanyamarika: kake wagera mawa masha ghati ya vikuchu visha, na vyose viri vyakia.

¹⁸ Ekinaoke ekiwawurra vindu ivi, mchili mwe aza akamwinamia, ekiteta, Mwana wangu wa kiche ingeriaha afwa, kake uze uremgera mkono wako, enehoa.

¹⁹ Akawuka Yesu akamratera, na waanalosha wakwe.

²⁰ Na yoa, mche eokie na kufumwa ni sakame miaka ikumi na miri, ezie nyuma, akamkuwara lutiriwo lwa suke yakwe.

²¹ Amu etetie ngoroni, Kwakicha nakuwara tiki suke yakwe, ninekia.

²² Yesu ekigharuka na ekimbona akaghamba, Ngoro yako idinde, mwana wa kiche, luitikijo lwako lwakukija. Mche akakia too saa ila.

²³ Ekinafike Yesu nyumbeni ha njama, akawona wabighi mtorito, na matorano meiya,

²⁴ Akaghamba, Wukeni, amu mbora tefwaye; ateshinjia. Wakamsola muno.

²⁵ Matorano mekinang’olwe akaingia akamgura mkono, mbora akawuka.

²⁶ Na mburi ii ikarumishwa ghati ya isanga lila lose.

²⁷ Ekinavetie Yesu kufuma uko webajike‐meso weri wakamratera wekiiya na wekiteta, Utusarie, mwana wa Daudi.

²⁸ Ekinaingie nyumbeni webajike‐meso wakamzia; na Yesu awawurra, Mwaitikija ti naidima kuketa iki? Wamburra, Ee, Mzuri.

²⁹ Akawakuwara meso ekighamba, Hena luitikijo lwenyu muwone.

³⁰ Meso mawo makajughuka. Yesu akawaaghanya muno, ekiteta, Yoeni, mundu asikitisiwe.

³¹ Kake wekifuma wakatoranya mburi yakwe ghati ya isanga lila lose.

³² Na wekinafume, yoa, wakamwetie bubu mwenye luhungu.

³³ Na luhungu lukinakinywa, bubu ula akateta. Matorano wakarighiwa, wekiteta, Teiwonwa pia huwo ghati ya Israeli.

³⁴ Wafarisayo wakaghamba, Hena njama wa maluhungu emakinya maluhungu.

³⁵ Akajunguluka Yesu ghati ya viongo vyose na kaa, ekilosha ghati ya masunagogi, na ekitinda sumu yedi ya ufumwa, na ekihodja ndwari jose na wufaa wose.

³⁶ Ekinawone matorano akawasaria, amu weokie werishwa wukiwa na weghawanyika, sa magonji mesina mrisha.

³⁷ Akawawurra waanalosha wakwe, Mafindiko nimo mabaha, wahira ndima niwo wafaa:

³⁸ Amu ii mwombeni mzuri wa mafindiko, ti aingije wahira ndima ghati ya mafindiko makwe.