Mattayo 8 - Sumu Yedi ya Isa Masiya 1906 Kitamo 1897 Malumbo 1905

¹ Ekinasee na katuwi matorano meingi wakamratera.

² Na yoa, mwenye kusumura akamzia, akamsemba ekiteta, Mzuri, ukakunda, waidima kunizerrija.

³ Akaronga mkono, akamkuwara, akateta, Nakunda, uzerrike. Chwi kusumura kwakwe kukazerrika.

⁴ Yesu akamburra, Yoa, usimburre mundu: kake tonga, ukuwondja ha mkohani, ureng’ola itasi sandu Musa eaghanyie hena luwondjo mburi hawo.

⁵ Ekinaingie Yesu na Kapernaum njama akamzia, ekimsemba,

⁶ Ekiteta, Mzoro wangu eyejwe nyumbeni ewadjua kuwia, ewawiwa muno.

⁷ Amburra, Nineza nimhodje.

⁸ Njama akatalwa akaghamba, Mzuri, teiweyo uingie we si ya ghu yangu, kake utete kiteto tiki, na mzoro wangu enehoa.

⁹ Amu na mi ni mundu si ya zinya, mwenye asikari si yangu: na namburra uu, Tonga; etonga: na ungi, Izo; eza: na mzoro wangu, Hira huwo; ehira.

¹⁰ Yesu ekisikia akarighiwa, akawawurra wala weratera, Kididi namburra, Siwoniemi luitikijo lubaha sa ulu nete ghati ya Israeli.

¹¹ Namburra, Ti weingi weneza kufuma kifuma‐izuwa na kigwa‐izuwa, na weneikaa hamwe na Ibrahimu na Isaak na Yakobo ghati ya ufumwa wa wanga;

¹² Kake waana wa ufumwa wenetaghwa ghati ya kija cha some: niho kineoka kiiyo na kutafuna kwa majegho.

¹³ Yesu akamburra njama, Tonga; sandu waitikija uwone. Mzoro wakwe akahoa saa ila.

¹⁴ Ekinaingie Yesu nyumbeni hakwe Petro akawona mkwee eyejwe, ewajua ni isemu.

¹⁵ Akamkuwara mkono, isemu likamshigha, akawuka, akawaindia.

¹⁶ Hekinaoke chamagheri wakamwetie weingi wenye luhungu: akamakinya maluhungu hena kiteto, akawahodja wose wewadjua:

¹⁷ Nesa kifike kila kitetiwe ni mroti Isaya, ekiteta, Ye euhie wufaa wetu, akatika ndwari.

¹⁸ Ekinawone Yesu weingi wekimjunguluka, akaaghanya kukela mtano sela ya keri.

¹⁹ Mtami mwe akaza akamburra, Mlosha, ninekuratera uhatonga hose.

²⁰ Yesu amburra, Maging’a mena makongo, na ndeghe ja wanga jina vichanja, kake Mwana wa mundu tena ha kuwikia mtwi.

²¹ Mwanalosha ungi akamburra, Mzuri, unisame ini nitonge nimjike apa.

²² Kake Yesu amburra, Niratera, ushighe wefwie wajike wefwie wawo.

²³ Ekikwea ngalaweni, waanalosha wakwe wakamratera.

²⁴ Na yoa, ngungu mbaha ikaoka ghati ya ndiwa, mtano ngalawa ikafinikirwa ni visibwe: naye eokie eshinjie.

²⁵ Wakatonga wakambusha, wekiteta, Mzuri, ukije; twateka.

²⁶ Awawurra, Nikini muna fole, wenye luitikijo ludongo? Ekiidiwa akawuka, akajibohia ngungu na ndiwa, hakaoka na kuhoiya kubaha.

²⁷ Wandu wakarighiwa wekiteta, Mundu ani uu, mtano ngungu na ndiwa jamwinga isikio.

²⁸ Naye ekifika sela ya keri ghati ya isanga la Wagadareni, wakatorana naye weri wenye luhungu, wekifuma mbireni, wakahe muno, mtano teidima mundu kuvetia nzia ila.

²⁹ Na yoa, wakaiya wekiteta, Tuna kini na we, mwana wa Izuwa? Waza kuturisha wukiwa kuwoka kwa magheri?

³⁰ Heokie hae kufuma hawo ifio la nguwe weingi wekirishwa.

³¹ Maluhungu wakamwomba wekiteta, Ukitukinya, utuingije ghati ya ifio la nguwe.

³² Akawawurra, Tongeni. Nawo wekifuma wakatonga na nguwe; na yoa, ifio lose likatonga likisara si ya nduwi mtano na ndiwa, wakafwa ghati ya mbombe.

³³ Warisha wakamatuka, wakatonga kiongoni wakalia mburi ya vyose, na vya vindu vya wenye luhungu.

³⁴ Kiongo chose wakafuma wamkiche Yesu; mtano wekinambone, wakamsemba awuke mihakeni hawo.