Mattayo 7 - Sumu Yedi ya Isa Masiya 1906 Kitamo 1897 Malumbo 1905

¹ Musichilie, nesa musichiliwe:

² Amu na wuchili wula mchilia, munechiliwa; na kighesho kila mugheshijia munegheshijiwa na unywi.

³ Na hena kini uyoa kibasi ijisoni ha mundwenyu, nete toukumbuka kijiti kioho ijisoni hako we?

⁴ Kana umburraze mundwenyu, Unishighe ning’ole kibasi kioho ijisoni hako; na yoa hena kijiti ijisoni hako we?

⁵ Mkeleki, ng’ola ini kijiti ghati ya ijiso lako, niho unewona nezo ung’ole kibasi ghati ya ijiso la mundwenyu.

⁶ Musijiinge nguro kindu kishenete, nete musitaghe lulu jenyu msongorana wa nguwe, jisijiwate na maghuu mawo nete wasigharuke jimubaje unywi.

⁷ Ombeni, na muneingwa; endeni, na munewona; bigheni luwi na mnejuwiwa.

⁸ Amu ose eomba eingwa, na ula eenda ewona, na ula ebigha luwi ejuwiwa.

⁹ Kana mundu ani wenyu mwana wakwe akaomba ibumunda, enemwinga ibwe.

¹⁰ Kana ekimwomba nguluma, enemwinga nyoka?

¹¹ Amu ii kwakicha unywi, mbawiwi, mutisiwa kuwainga waanawenyu vindu vyedi, Waweo wenyu eoho wanga enenetaze kuwainga wala wemwomba vindu vyedi?

¹² Amu ii vyose mwakunda wandu wamuketa unywi, na unywi mbaketie: amu kuketa huwo ni wuchili na waroti.

¹³ Ingieni ghati ya mbenge sisiri; amu iarame ni mbenge na mwenye handu nzia itonga mtano lutesho, nawo weiingia weingi.

¹⁴ Amu sisiri ni mbenge, na mwenye wasi nzia itonga mtano moo, nawo weiwona wafaa.

¹⁵ Mukuyoe hena waroti wa maongo, wandu wemzia hena suke ya maghonji, kake hena ndeni ni mabau mekaehe.

¹⁶ Munewatwarija hena ndunda jawo. Wandu wetunda zabibu hena miera, kana tini hena midangu?

¹⁷ Huwo mti ose wedi wagera ndunda jedi; na mti mbiwi wagera ndunda mbiwi.

¹⁸ Mti wedi touidima kugera ndunda mbiwi, nete mti mbiwi kugera ndunda jedi.

¹⁹ Mti ose usigera ndunda jedi utemwa utaghwa motoni.

²⁰ Huwo hena ndunda jawo munewatwarija.

²¹ Siye ose eniwurra, Mzuri, Mzuri, eneingia ghati ya ufumwa wa wanga, nde ula eketa wundu ekundie Apa wangu eoho wanga.

²² Weingi weneniwurra musi ula, Mzuri, Mzuri, toturotie hena izina lako, na hena izina lako totukinyie maluhungu, na hena izina lako totuarehe mabaha meingi?

²³ Niho ninewawurra, Simmaijemi nete: tongeni kufuma hangu, wandu weketa owiwi.

²⁴ Huwo ose esikia viteto ivi vyangu, ekiviareha, ninemfwanyanya na mundu echee, ejengie nyumba yakwe wanga ya ibwe:

²⁵ Mvua ikabigha, mlombia ikaza, ngungu jikaruruma, jikaibigha nyumba ila, isigwe, amu kuwoka kwakwe ghati ya ibwe.

²⁶ Na ose esikia viteto ivi vyangu, esiviareha, enefwananishwa na mundu etomode, ejengie nyumba yakwe wanga ya teri:

²⁷ Mvua ikabigha, mlombia ikaza, ngungu jikaruruma, jikaibigha nyumba ila, ikagwa; na miguiye yakwe mibaha.

²⁸ Ikaoka ekinaidiwe Yesu viteto ivi, matorano wakarighiwa hena miloshie yakwe;

²⁹ Amu ewaloshije sa mwenye zinya, nete si sa watami wawo.