Mattayo 6 - Sumu Yedi ya Isa Masiya 1906 Kitamo 1897 Malumbo 1905

¹ Yoeni musikete ngalo yenyu msongorana wa wandu, nesa kuwonwa nawo; amu mukaketa huwo tomuwona wuzuri hena Waweo wenyu eoho wanga.

² Huwo ukiareha itasi usigere ngalala msongorana wako sa wawiwi ha masunagogi na nzieni, wawone nganyi hena wandu. Kididi namburra, waidiwa kuwona wuzuri wawo.

³ Kake we ukiareha itasi lako, mkono wako wa kumoso usitisiwe mkono wa kuume ukiareha:

⁴ Nesa itasi lako lioke la mbiso, naye Waweo ewona hena mbiso enekuinga wuzuri hena raa.

⁵ Na unywi mukiomba, musioke sa wakeleki, amu wekundie kuimuka kuomba ghati ya masunagogi na mbai ya nzia, nesa wawonwe ni wandu. Kididi namburra, Waidiwa uwona wuzuri wawo.

⁶ Kake we ukiomba, uingie na wojiwo wako wa ndeni, na ukiidiwa kufinga luwi, umwombe Waweo eoho hena mbiso; na Waweo ewona hena mbiso enekuinga wuzuri.

⁷ Na mukiomba, musitete viteto tiki, sa wandu wa mbare; amu weghamba wenesikiwa hena viteto vyawo kuoka viingi.

⁸ Musifwanane na awa, amu Waweo wenyu etisiwe vindu muvikundie magheri musimemwomba.

⁹ Amu ii unywi ombeni huwu, Apa wetu uoho wanga, izina lako lirume:

¹⁰ Ufumwa wako uze: wundu ukundie kiketike masangeni, sandu kiketika wanga:

¹¹ Utuinge yoo kidjo chetu hena musi:

¹² Utushighie sile jetu, sandu na uswi twawashighia wala weawa ni uswi:

¹³ Usitugere kugheshwa, kake utukije kiwiwini.

¹⁴ Amu kwakicha muwashighia wandu matekwa mawo, naye Waweo wenyu wa wanga enemshighia unywi:

¹⁵ Kake kwakicha tomuwashighia wandu matekwa mawo, nete Waweo wenyu tenemshighia matekwa menyu.

¹⁶ Mkachungawa, msioke, sa wakeleki, wa wusho wa wukiwa, amu wenyamara wusho wawo, nesa wawonwe ni wandu ti wechunga: kididi namburra, Waidiwa kuwona wuzuri wawo.

¹⁷ Kake we, ukachunga, ukuwire mafuta mtwini, ukuoje wusho;

¹⁸ Nesa usiwonwe ni wandu ukichunga, nde ni Waweo eoho hena mbiso: na Waweo ewona hena mbiso enekuinga wuzuri.

¹⁹ Musikuwikie mali masangeni, inyamarikaho ni ndondoghoro na ngeu, na wahiwi weforaho na kuhiwa;

²⁰ Kake kuwikieni mali wanga, isinyamarikaho ni ndondoghoro nete ngeu, nete wahiwi tewefora nete tewehiwa:

²¹ Amu handu ioho mali yenyu, na ngoro yenyu ineoka ukowa.

²² Taa ya muri ni ijiso; ijiso lako likioka imwe, muri wako wose waizua kiangaji:

²³ Kake ijiso lako likioka iwiwi, muri wako wose waizua kija. Kiangaji kioho ndeni hako kikioka kija, kija kihi kibaha?

²⁴ Teidima mundu kuwatumikia wazuri weri, amu enemshishira mwe ekimkunda wa keri; kana enemgura mwe ekimdaa wa keri. Tomuidima kuwatumikia Izuwa na mamona.

²⁵ Amu ii namburra, Musikurisha wukiwa hena kukia kwenyu, munela kini, kana munenywa kini; nete hena muri wenyu, munedoka kini? Si kukia kubaha kukela kidjo, na muri kukela suke?

²⁶ Yoeni ndeghe ja wanga, ti tejihandajo, nete tejifindikajo, nete tejigerajo kilaloni; kake Waweo wenyu wa wanga ejirisha jila: Unywi tomujikelie jila?

²⁷ Niani wenyu hena kukurisha wukiwa eidima kukunetijia weeza wakwe hena mkono mwe?

²⁸ Na nikini mukurisha wukiwa hena suke? Kumbukeni viwaro vya mbuwa, sandu vimea, tevihira ndima nete teviiwita:

²⁹ Kake namburra, nete Sulemani ghati ya ubaha wakwe wose tedokie sa kimwe chawo.

³⁰ Amu Izuwa ekimadoka huwo mani ma mtemeni, meoho yoo, na yawo metaghwa motoni, tenetaye kumdoka unywi, unywi wa luitikijo ludongo?

³¹ Amu ii musikurisha wukiwa mkiteta, Tunela kini? kana, tunywa kini? kana, tunedoka kini?

³² Amu vindu ivi vyose Mbare wevikundie; amu Waweo wenyu wa wanga etisiwe ti muvienda ivi vyose:

³³ Endeni ini ufumwa wa Izuwa na ngalo yakwe, na ivi vyose muneetiwe.

³⁴ Amu ii musikurisha wukiwa hena yawo, amu yawo ina wukiwa wakwe mwenye. Mafika hena musi mawiwi makwe.