Mattayo 5 - Sumu Yedi ya Isa Masiya 1906 Kitamo 1897 Malumbo 1905

¹ Akamawona matorano akakwea na katuwi, akaikaa si, waanalosha wakwe wakamzia:

² Akajughua itumbu lakwe, akawalosha ekiteta,

³ Wetasiwa wakiwa wa ngoro; amu wo ni ufumwa wa wanga.

⁴ Wetasiwa weshiniwa; amu wenedindijwa.

⁵ Wetasiwa wahuji; amu wenemahodja masanga.

⁶ Wetasiwa wenye nzaa na ngiru hena ngalo; amu weneighuta.

⁷ Wetasiwa wenye lusario; amu wenewona lusario.

⁸ Wetasiwa weokie wezerie ngoroni; amu wenembona Izuwa.

⁹ Wetasiwa wakanyi; amu weneitangwa waana wa Izuwa.

¹⁰ Wetasiwa wekinywa hena lwa ngalo; amu ufumwa wa wanga ni wawo.

¹¹ Mutasiwa unywi weneikawamurighe, na weneikawamukinye, na weneikawamutetie kiteto chose kiwiwi hena maongo, hena lwangu.

¹² Izihirweni, munoniwe: amu wuzuri wenyu wengi wanga, amu huwo wewakinye waroti weokie kuwoka kwenyu.

¹³ Unywi ni munyu wa masanga; kake kwakicha munyu watesha sororo yakwe, unegerwaze sororo? Touwewowa pia, nde kutaghwa shighati, uwatwe ni wandu.

¹⁴ Unywi ni kiangaji cha masanga: kiongo tekiidima kuwiswa kioho wanga ya nduwi:

¹⁵ Nete tewefuta taa nesa igerwe si ya kizembe, kake wanga ya kindu cha taa, na kiwaangaja wose weoho nyumbeni.

¹⁶ Kiangaji chenyu kiangaje huwu msongorana wa wandu, wawone mihiro yenyu yedi, wamwisise Waweo wenyu eoho wanga.

¹⁷ Musighambe ti nizie kunyamara wuchili na waroti: sizie kunyamara, nde kufisha.

¹⁸ Amu kididi namburra, Mtano wanga na si jineiting’o nete i mwe nete ti mwe ya wuchili teiiting’o, mtano jose jineikajifike.

¹⁹ Amu ii ula enelibaa limwe la maaghanyo ama mtano madongo, na enelosha wandu huwu, eneitangwa mdongo ghati ya ufumwa wa wanga: kake ula enemaareha na enemalosha, niye eneitangwa mbaha ghati ya ufumwa wa wanga.

²⁰ Amu namburra, Isioke ngalo yenyu yakela ngalo ya watami na Wafarisayo, tomuneingia ghati ya ufumwa wa wanga.

²¹ Mwasikia ti kitetiwe ni wandu wa kae, Usikome, na ula ekoma yambe wuchili:

²² Kake mi namburra, Ose egurwa ni oro hena mundwawo huwo, inembe wuchili; na ose enemburra mundwawo, Raka, inembe sunedrim; na ose eghamba, Utomode, inembe jehannum ya moto.

²³ Huwo ukiete itasi lako mtano na kisiko, na uko ukikumbuka ti mundwenyu ena kiteto wanga yako;

²⁴ Lishigha itasi lako msongorana wa kisiko, utonge uarehiane ini na mundwenyu, ikuade uhunduke utase itasi lako.

²⁵ Uarehiane na mzo wako hena usaro, ukioka naye nzieni, ti mzo wako asikuete hena mchili, nete mchili asikuingije hena asikari, nete usigerwe kichungoni.

²⁶ Kididi nakuwurra, Tounefuma kula, mtano uneikauihe pesa ya kuidiwa.

²⁷ Mwasikia ti kitetiwe, Usishinde;

²⁸ Kake mi namburra, Ose emyoa mundumche mtano kumlangwa, aidiwa kushinda naye ngoroni hakwe.

²⁹ Kwakicha ijiso lako la kuume lakushishirra, uling’ole, ulitaghe hae: u keba irungo imwe lako linyamarike, nete muri wako wose usitaghwe ghati ya jehannum.

³⁰ Na kwakicha mkono wako wa kuume wakushishirra, uuchwe, uutaghe hae: u keba irungo imwe lako linyamarike, nete muri wako wose usitaghwe ghati ya jehannum.

³¹ Itetiwe, Mundu emshigha mche wakwe, amwinge khati ya kushigha:

³² Kake mi namburra, Mundu emshigha mche wakwe, nde hena kushinda, amwosha mshindi; naye emuha eshighiwe ashinda.

³³ Mwasikiawa ti itetiwe nawo wa kae, Usikubae kurara kwako, kake umfishie Mzuri kurara kwako:

³⁴ Kake mi namburra, Usirare pia, nete hena wanga, amu nicho kichumbi cha Izuwa;

³⁵ Nete hena si, amu niho handu ha mawato makwe; nete hena Yerusalemi, amu nicho kiongo chakwe mfumwa mbaha.

³⁶ Nete usirare hena mtwi wako, amu touidima kukuarehia lujui lumwe nete lujewa nete lujiru.

³⁷ Kiteto chenyu kioke, Ee, ee; Hai, hai: amu vila vikela ivi vyafuma ha mbiwi.

³⁸ Mwasikia ti itetiwe, Ijiso hena ijiso, na ijegho hena ijegho.

³⁹ Kake mi namburra, Musilelane na mawiwi, kake mundu ekikubigha isaa la kuume, umgharushijie na la keri.

⁴⁰ Na mundu ekundie kukulinganya auhe kanzu yako, umshighie na joho.

⁴¹ Na mundu ekundie kukurongoja lototo lumwe, utonge naye lwa keri.

⁴² Ekuomba ose, mwinge; naye ekundie kukuhakua usigharuke hakwe.

⁴³ Mwasikia ti itetiwe, Mkunde walatia wako, msue maring’a mako.

⁴⁴ Kake mi namburra, Wakundeni maring’a menyu, waombieni wala wemurisha wukiwa;

⁴⁵ Nesa muoke waana wa Waweo wenyu eoho wanga; amu earehe zano yakwe iwaangaja wawiwi na wedi, ewainga mvua wenye ngalo na wesina ngalo.

⁴⁶ Amu kwakicha muwakunda wala wemkundie unywi, muna wuzuri ani? Mtano wauhi lushango teweketa huwu?

⁴⁷ Na unywi mukiwakezia wandwenyu tiki, mwaneta kini? Mtano wandu wa Mbare teweketa huwu?

⁴⁸ Amu ii unywi munesheneta, sandu Waweo wenyu eoho wanga esheneta.