Mattayo 4 - Sumu Yedi ya Isa Masiya 1906 Kitamo 1897 Malumbo 1905

¹ Akarongojwa Yesu shighati ni Ngoma, nesa agheshwe ni Shetani.

² Akachunga asile misi makumaane hemusi na kio, ikuade akasikia nzaa.

³ Mghesha akaza akamburra, Kwakicha niwe Mwana wa Izuwa, ghamba mabwe ama maoke kidjo.

⁴ Akatalwa, akaghamba, Itamiwe, mundu tekiaye hena kidjo tiki, nde hena kiteto chose chafuma itumbuni ha Izuwa.

⁵ Kuidiwa Shetani akamwete mtano na kiongo kishenete, akambika wanga ya msudu wa hekalu,

⁶ Amburra, Kwakicha niwe Mwana wa Izuwa, ukutaghe si, amu itamiwe, Enekuaghanyie malaika wakwe, wenekutika mikononi hawo, nesa usikubighe kughuu na ibwe.

⁷ Yesu akamburra, Itamiwewa, Tounemghesha Mzuri Izuwa wako.

⁸ Shetani amtikawa mtano na nduwi ndeza muno, ambondjia masanga mose na kirumi chawo,

⁹ Akamburra, Vindu ivi vyose ninekuinga uneikaugwe kuniomba.

¹⁰ Naye Yesu akamburra, Tonga, Shetani, amu itamiwe, Mzuri Izuwa wako unemwomba, naye niye mjenye unemtumikia.

¹¹ Shetani akamshigha, na yoa, malaika wakaza wakamwindia.

¹² Na ekinasikie ti Yohana ang’olwa, akatonga Galilaya;

¹³ Akashigha Nazareti, akaza akaikaa Kapernaum, mbai ya ndiwa mihakeni ya Zabulon na Naftalim;

¹⁴ Nesa kifike kila kitetiwe ni mroti Isaya, ekiteta,

¹⁵ Isanga la Zabulon na isanga ya Naftalim, nzia ya ndiwa, sela ya Yardani, Galilaya ya Mbare,

¹⁶ Wandu weikee kijeni wewonie kiangaji kiingi, na wala weikee handu na mvurini ha kifwa, kiangaji kiwafumie.

¹⁷ Too magheri mala akawoka Yesu kutinda na kughamba, Chweni‐mti, amu ufumwa wa wanga wasongeria.

¹⁸ Na ekisela afuhi na ndiwa ya Galilaya, akawona wandu weri, wandwawo, Simon eitangwa Petro na Andrea mundwawo, wekigera nyavu ndiweni, amu weokie wasakia.

¹⁹ Akawawurra, Niratereni, nami ninemuosha wasakia wa wandu.

²⁰ Chwi wakashigha nyavu wakamratera.

²¹ Na ekitongawa, akawona wandu weriwa wandwawo, Yakob wa Zebedayo na Yohana mundwawo, ngalaweni hamwe na Zebedayo wawee, wekiareha nyavu jawo: akawaitanga.

²² Chwi wakashigha ngalawa na wawee, wakamratera.

²³ Akasela Yesu ghati ya Galilaya yose, ekilosha ghati ya masunagogi mawo, na ekitinda Sumu yedi ya ufumwa, na ekihodja ndwari yose na unana wose ghati ya wandu.

²⁴ Kirumi chakwe kikafuma ghati ya Sham yose, wakamwetie wose wewadjua, weguriwe ni ndwari jingijingi na wasi, nawo wenye luhungu, nawo wenye shughu, na wenye kuwia; akawahodja.

²⁵ Matorano meingi wakamratera, wekifuma Galilaya, na Dekapoli, na Yerusalemi, na Uyahudi, na sela ya keri ya Yardani.