Mattayo 3 - Sumu Yedi ya Isa Masiya 1906 Kitamo 1897 Malumbo 1905

¹ Misi ila akaza Yohana Mbatizaji ekitinda shighati ya Uyahudi,

² Ekiteta, Chweni‐mti, amu ufumwa wa wanga wasongeria.

³ Amu uu niye etetiwe ni mroti Isaya, ekighamba, Ighonda lakwe eiya shighati, Areheni nzia ya Mzuri, rongesheni mavetio makwe.

⁴ Naye Yohana eokie na suke jakwe ya nyui ja ngamela, na ngana ya kitanga kikudini hakwe, na kidjo chakwe zighe na zoke ya mbakoni.

⁵ Wakamfumia Yerusalemi na Uyahudi ose na isanga lose la mbai ya Yardani;

⁶ Wakabatizwa naye mfuroni Yardani wekighamba ng’oki jawo.

⁷ Na ekiwona weingi wa Wafarisayo na Wasadukayo wekiza hena Lubatizo lwakwe akawawurra, Waana wa nyoka, niani emburra unywi kuimatukia oro ineza?

⁸ Keteni ndunda jiweyie kuchwa‐mti;

⁹ Nete musighambe kuteta ngoroni, Tuna apa, niye Ibrahimu; amu namburra, ti Izuwa eidima hena mabwe ama kumbushijia Ibrahimu waana.

¹⁰ Mtano na yoo izoka liikee kikoloni cha miti: amu ii miti yose isigera ndunda jedi itemwa, itaghwe motoni.

¹¹ Mi nambatiza na mbombe hena kuchwa‐mti; ye eza nyuma yangu ni mbaha kukela mi, siweiwa mi mtano kuchungua viratu vyakwe: Ye enembatiza na Ngoma Mshenete na moto.

¹² Kihadjo chakwe kioho mkononi hakwe, naye enezerrija muno kiwaza chakwe, enewunghanya ngano kilaloni, kake makekeshwa enemashota na moto usijima.

¹³ Niho Yesu akafuma Galilaya akamfikia Yohana ha Yardani, abatizwe niye.

¹⁴ Yohana akamswija ekiteta, Yaniwe mi kubatizwa ni we; nawe waza hangu?

¹⁵ Yesu ekitalwa akamburra, Ushighe ingeriaha, amu huwu yatuwe kufisha ngalo yose. Kuidiwika akamshigha.

¹⁶ Naye Yesu ekinaidiwe kubatizwa akafuma chwi mbombeni: wanga jikamjughukia, akawona Ngoma ya Izuwa ikisea sa ibeta, ikamfikia:

¹⁷ Na yoa, ighonda ghati ya wanga likateta, Uu ni Mwana wangu mkundwa, eniizihira.