Mattayo 28 - Sumu Yedi ya Isa Masiya 1906 Kitamo 1897 Malumbo 1905

¹ Ikinaidiwike Sabato, ukitaghanyuka musi wa kuwoka wa juma, Maryamu Magdaleni na Maryamu ula ungi wakaza kuiyoa mbira.

² Na yoa, heokie kudedema kwa si kubaha, amu malaika wa Mzuri efumie wanga akaza akalibingibisha ibwe ghati ya mbenge, akaikaa wanga yakwe.

³ Wusho wakwe ukaoka sa kimereteko, na suke jakwe nyewa sa theluji.

⁴ Na hena fole yakwe warinda wakadedema, wakaoka sa wefwie.

⁵ Malaika akatalwa, akawawurra wache Musiituke, amu natisiwa ti mwamwenda Yesu ula ewanikwe.

⁶ Teoho, amu aruka, sandu eghambie. Izoni yoeni handu Mzuri eyejweho.

⁷ Na tongeni wangu murewawurra waanalosha wakwe ti Aruka ghati ya wefwie; na yoa amurongeria kutonga Galilaya; uko munembona; yoa, namburra.

⁸ Wakatonga wangu kufuma mbireni wenye fole na luizihirwo lubaha, wakasara kuwaliya waanalosha wakwe mburi.

⁹ Na yoa, Yesu akatorana nawo, ekighamba, Salaamu. Wakatonga wakamgura maghuu, wakamwinamia.

¹⁰ Yesu awawurra, Musiituke; tongeni, waliyeni mburi waanalosha wangu, watonge Galilaya, uko weneniwona.

¹¹ Na wekinaoke wekitonga, yoa, wengi wa warinda wakatonga kiongoni wakawaliya mburi ya vindu viokie wakohani wabaha.

¹² Wekinawunganyike hamwe na waghosi wakala ngiliwata, wakawainga asikari fetha nyingi,

¹³ Wekiteta, Ghambeni ti Waanalosha wakwe wekiza kio wemhiwa, uswi tukishinjia.

¹⁴ Na kwakicha iki kisikiwa ni mchili, tunemweleja ye, na tunemurinda unywi.

¹⁵ Wakaiuha fetha, wakaareha sandu weloshijwe; kiteto iki kikatindwa ghati ya Wayahudi mtano na yoo.

¹⁶ Nawo waanalosha ikumi na mwe wakatonga Galilaya, mtano na nduwi Yesu ewaaghanyie.

¹⁷ Wekinambona, wakamwinamia, wengi wakaitalwa.

¹⁸ Yesu akaza akateta nawo, ekighamba Naingwa zinya jose wanga na ghati ya masanga.

¹⁹ Amu ii tongeni mureosha waanalosha mbare jose, mukiwabatiza hena izina la Apa, na Mwana, na Ngoma Mshenete:

²⁰ Mukiwalosha wavigure vyose nimuaghanyie: na yoeni, mi nioho hamwe na unywi misi yose, mtano kuidiwika kwa masanga.