Mattayo 27 - Sumu Yedi ya Isa Masiya 1906 Kitamo 1897 Malumbo 1905

¹ Hekinaoke marekero wakohani wabaha wose na waghosi wa wandu wakachila wanga yakwe Yesu, nesa wamkome.

² Wakamchunga, wakamtika, wakamng’ola ha Pilato mchili.

³ Na Yuda emng’olie, ekinawone ti echiliwa, akachwa‐muti, akavihundua vindu vya fetha makumi matatu ha wakohani wabaha,

⁴ Ekiteta, Natekwa nikiing’ola sakame isina ng’oki. Wakaghamba, Nikini hetu? Uneyoa we.

⁵ Akavitagha vindu vya fetha hekaluni, akatonga, akakunyama.

⁶ Wakohani wabaha wekiiuha fetha wakaghamba, Si chedi kuigera na handu ha mali, amu ni luzoro lwa sakame.

⁷ Wakateta mburi wakazora nayo mbuwa ya muwumbi, hena kujika wagheni.

⁸ Amu ii mbuwa ila yaitangwa mbuwa ya sakame mtano yoo.

⁹ Huwo kikafishwa kila kitetiwe ni mroti Yeremiya, ekiteta, Wakaviuha vindu vya fetha makumi matatu, luzoro lwakwe lwazorwa, wemzorie wala wa waana wa Israeli;

¹⁰ Wakaving’ola hena mbuwa ya muwumbi, sandu Mzuri eniaghanyie.

¹¹ Yesu akaimuka msongorana wa mchili; mchili akambujanya ekiteta, Niwe Mfumwa wa Wayahudi? Yesu akamburra, Waghamba.

¹² Na ekinalinganywe ni wakohani wabaha na waghosi tetalwa kiteto.

¹³ Pilato akamburra, Tousikia vindu vingi ani wekung’olia?

¹⁴ Nete temtalwa kindu, mtano kiteto kimwe; mtano mchili erighiwe muno.

¹⁵ Na ghati ya karamu mchili amanyerra kuwachunguiya matorano mchungwa mwe, wemkundie.

¹⁶ Wakaoka na mchungwa mwenye kirumi, eitangwa Baraba.

¹⁷ Amu ii wekinawunganyika Pilato akawawurra, Niani mwakunda nimchunguiye? Baraba, kana Yesu eitangwa Masihi?

¹⁸ Amu etisiwe ti hena luneng’o wemng’ola.

¹⁹ Ekinaoke ekikaa wanga ya handu ha wuchili, mche wakwe akamwingijia ekiteta, Usioke na kindu wanga ya ula mwenye ngalo, amu narishwa wukiwa wingi hena ndoto yoo hena lwakwe.

²⁰ Wakohani wabaha na waghosi wakaeleja wandu wamwombia Baraba, na wamteshe Yesu.

²¹ Mchili akatalwa akawawurra, Ni uhi wa awa weri mwakunda nimchunguiye? Wakaghamba, Baraba.

²² Pilato awawurra, Nikiniwa ninemketa Yesu eitangwa Masihi? Wamburra, Awanikwe.

²³ Akaghamba, Nikini? owiwi ani euketie? Wakaneta kuloza, wekiteta, Awanikwe.

²⁴ Pilato ekinawone ti tewe kiteto; nde kilozo chaneta kuoka, akauha mbombe akaoja mikono msongorana wa matorano, ekiteta, Mi sina kutekwa hena sakame ya mundu uu mwenye ngalo; unywi munewona.

²⁵ Wandu wose wakatalwa wakaghamba, Sakame yakwe wanga yetu, na wanga ya waana wetu.

²⁶ Akawachunguiya Baraba: na ekinaidiwa kumbigha Yesu akamng’ola nesa awanikwe.

²⁷ Asikari wa mchili, wekimtika Yesu na praitorio, wakamwunganyia lweriri lwose.

²⁸ Wakambushijia suke yakwe, wakamdoka kanzu ngundu.

²⁹ Wakaiwita lumerisia lwa mivwa wakamgera mtwini, na ighughu mkononi hakwe ha kuume, na wekidung’uta msongorana wakwe wakamsola wekiteta, Salaamu, Mfumwa wa Wayahudi.

³⁰ Wakamtufia mate, wakauha ighughu wakambigha mtwi.

³¹ Wekinaidiwe kumsola, wakamhambua kanzu, wakamdoka suke jakwe, wakamtika awanikwe.

³² Wekinafume wakawona Mkurene, izina lakwe Simon; wakamsingirija uu atike msalaba wakwe.

³³ Na wekifika handu heitangwa Golgotha, niho hatetwe, handu ha Kiborong’,

³⁴ Wakamwinga kunywa mawa merunganywa na nyongo; na ekinachame tekundie kunywa.

³⁵ Wekinaidiwe kumbanika wakaghawa suke jakwe wonawo, wekibigha kura.

³⁶ Wakaikaa si wakamyoa uko.

³⁷ Wakawika wanga ya mtwi wakwe kulinganywa kwakwe, kutamiwe, “Uu niye Yesu Mfumwa wa Wayahudi.”

³⁸ Wasoki weri wakawanikwa hamwe naye, mwe hena kuume, na mwe hena kumoso.

³⁹ Nawo wevetia nzieni wakamrigha, wekikushakusha mitwi yawo,

⁴⁰ Wekiteta, Mwenye kuibaa hekalu na kuijenga hena misi mitatu, ukukije mwenye.

⁴¹ Huwo na wakohani wabaha wekimsola hamwe na watami na waghosi wakaghamba,

⁴² Ewakije wengi, teidima kukukija mwenye. Niye mfumwa wa Israeli, asee ingeriaha na msalaba, na tunemwitikija.

⁴³ Emwitikije Izuwa, amkije ingeriaha, ekioka emkundie; amu eghambie, nimi Mwana wa Izuwa.

⁴⁴ Huwo na wasoki wesulibishwa hamwe naye wakamrigha.

⁴⁵ Too saa ya katandatu kikaoka kija wanga ya isanga lose mtano saa ya kenda.

⁴⁶ Na sa saa ya kenda Yesu akaloza na ighonda ibaha, ekiteta, Eli, Eli, lama sabakthani? nikyo, Izuwa wangu, Izuwa wangu, nikini wanishigha?

⁴⁷ Wengi wawo weimuke uko, wekinasikia wakateta, Emwitanga Elias.

⁴⁸ Chwi mwe wawo akasara, akauha sifongo akaiizuja na siki, akaigera wanga ya ighughu, akamwinga anywe.

⁴⁹ Waghenje wakaghamba, Shigha, tuwone ti Elias eza kumkija.

⁵⁰ Yesu ekilozawa na ighonda ibaha, akang’ola ngoma.

⁵¹ Na pazia ya hekalu ikabajika vihindi viri wanga mtano na si, si ikadedema, mabwe makabajika,

⁵² Mbira jikajughuka, miri miingi ya washenete weshinjie ikaruka,

⁵³ Na wekifuma na mbira kutera kwa luruko lwakwe wakaingia kiongo kishenete, wakawonwa ni weingi.

⁵⁴ Njama na wala hamwe naye wekimyoa Yesu, wekinawone kudedema na vindu viarehike, wakaondoka muno, wekiteta, Kididi uu eokie Mwana wa Izuwa.

⁵⁵ Heokie na wache weingi wekiyoa na hae, niwo wemratera Yesu kufuma Galilaya, wakamwindia.

⁵⁶ Ghati ya awa heokie na Maryamu Magdaleni, na Maryamu mee Yakobo na Yose, na mee waana wa Zebedayo.

⁵⁷ Hekinaoke chamagheri, akaza mundu mmazi wa Arimathaya, izina lakwe Yusuf, naye mwenye mwanalosha wa Yesu;

⁵⁸ Uu ekimtongia Pilato akamwomba muri wakwe Yesu. Pilato akaaghanya ung’olwe.

⁵⁹ Yusuf ekiuuha muri akaukoda na suke nyewa,

⁶⁰ Akauwika ghati ya mbira yakwe sha, iforiwe naye ghati ya mabwe: akabingilisha ibwe ibaha mbengeni ha mbira, akatonga.

⁶¹ Heokie na Maryamu Magdalene, na Maryamu ula ungi, wekiikaa msongorana wa mbira.

⁶² Musi wa keri, nio kutera kwa Kuarehia, wakohani wabaha na Wafarisayo wakawunganyika hakwe Pilato,

⁶³ Wekiteta, Mzuri, twakumbuka ti mkeleki uu eghambie, ekioka na moo, Kutera kwa misi mitatu nineruka.

⁶⁴ Amu ii uaghanye mbira irindwe mtano musi wa katatu; wasize ngea waanalosha wakwe waremhiwa, na wawawurra wandu, Aruka ghati ya wefwie; na kutekwa kwa kuidiwika kuneoka kuwiwi kukela kula kwa kuwoka.

⁶⁵ Pilato akawawurra, Muna asikari: tongeni muirinde sandu mwaidima.

⁶⁶ Wakatonga wakairinda mbira muno, wakaligera ibwe luwano, hamwe na asikari.