Mattayo 26 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka ekinaidiwe Yesu viteto ivi vyose akawawurra waanalosha wakwe,

² Mwatisiwa ti kutera kwa misi miri Pasaka yaoka, na mwana wa mundu eneng’olwa nesa awanikwe.

³ Magheri mala wakawunganyika wakohani wabaha na waghosi wa wandu ha lumungu lwa mkohani mbaha eitangwa Kayafa,

⁴ Wakateta mburi ti wamgure Yesu hena kichei na wamkome:

⁵ Wakaghamba, Si magheri ma karamu, kisioke kilozo ghati ya wandu.

⁶ Yesu ekinaoke Betania, nyumbeni hakwe Siman mwenye kusumura,

⁷ Akamzia mche mwenye chupa alabastron ya mafuta ma zoro nyingi, akammiminia mtwini ekiikaa.

⁸ Waanalosha wakwe wekinawone wakaregija, wekiteta, Hena kini lutesho ulu?

⁹ Amu ama maidima kutaghwa na viingi, na wakiwa kuingwa.

¹⁰ Yesu ekitisiwa akawawurra, Nikini wamrisha wukiwa mche? amu enihiria ndima yedi.

¹¹ Amu misi yose muna wakiwa hamwe na unywi, mi tomnami misi yose.

¹² Amu ekinimiminia muri wangu mafuta ama eniarehia hena kujikwa kwangu.

¹³ Kididi namburra, handu hose sumu yedi ii inetindwa ghati ya masanga mose, na iki ekiareha kinetetwa hena lukumbusho lwakwe.

¹⁴ Na mwe wa wala ikumi na weri, eitangwa Yuda Iskariota, akatonga hena wakohani wabaha,

¹⁵ Ekighamba, Nikini mwakunda kuniinga, nami ninemng’ola henyu? Wakaarehana naye hena vindu vya fetha makumi matatu.

¹⁶ Na too magheri mala akaenda magheri ma kumng’ola.

¹⁷ Na musi wa kuwoka wa mabumunda mesichachwe waanalosha wakamzia Yesu wekighamba, Nihi ukundie tukuarehia kula pasaka;

¹⁸ Akaghamba, Tongeni kiongoni hena mundu nganya, mremburra, Mlosha aghamba, Magheri mangu ni afuhi; naareha pasaka hako na waanalosha wangu.

¹⁹ Waanalosha wakaareha sandu Yesu ewaaghanyie, wakaareha pasaka.

²⁰ Ikinaoke chamagheri akaoka ekiikaa na waanalosha wakwe ikumi na weri.

²¹ Na wekioka wekila aghamba, Kididi namburra, ti mwe wenyu enening’ola.

²² Na wekishiniwa wakawoka mundu ose kumburra, Mzuri, nimi niye?

²³ Akatalwa akaghamba, Ula edunya mkono kimwe nami ghati ya mwanje, niye enening’ola.

²⁴ Mwana wa adamu atonga, sandu etamiwe, kake wukiwa hakwe mundu ula, mwana wa mundu ang’olwa naye; kyedi hakwe kwakicha asawoneka mundu ula.

²⁵ Akatalwa Yuda, ula emng’ola, Nimi, Mzuri? Amburra, Waghamba.

²⁶ Na wekioka wekila Yesu ekiuha ibumunda na ekitasia, akalibaa, akawainga waanalosha, akaghamba, Uheni, leni; uu ni muri wangu.

²⁷ Akauha ndemwa, na eking’ola haika akawainga, ekiteta, Nyweni wose nayo;

²⁸ Amu ii ni sakame yangu ya luaghanyo, iitike hena weingi hena luwushijio lwa ng’oki.

²⁹ Namburra, sinywa too ingeriaha ya ndunda ii ya mzabibu, mtano musi ula nineikaninywe na unywi sha ghati ya ufumwa wa Apa wangu.

³⁰ Wekinaidiwe kuvina wakafuma kutonga nduwini ha Zeituni.

³¹ Yesu akawawurra, Unywi wose muneshishirwa hena lwangu kio iki; amu itamiwe, Ninembigha mrisha, na magonji ma ifio meneghawanyika.

³² Kake kutera kwa kurushwa kwangu ninemurongoria kutonga Galilaya.

³³ Petro akatalwa akamburra, Wose wekishishirwa hena lwako, mi sineshishirwami ndarasi.

³⁴ Yesu akamburra, Kididi nakuwurra, ti kio iki, nguruwi isimeiya, unenikania keri.

³⁵ Petro amburra, Ikioka yaniwe kufwa mwe nawe, sinekukaniami. Huwo na waanalosha wose wakaghamba.

³⁶ Akafika Yesu hamwe nawo handu haitangwa Getsemane, na awawurra waanalosha wakwe, Ikaeni kunu, nikioka nitonga kula kuomba.

³⁷ Akawauha Petro na waana weri wakwe Zebedayo akawoka kushiniwa na kuoka na wukiwa wingi.

³⁸ Awawurra, Ngoro yangu ina wukiwa wingi mtano na kufwa; ikaeni kunu murechewa nami.

³⁹ Na ekitonga kadongo akagwa wushoni hakwe ekiomba na ekiteta, Apa wangu, kwakicha yaidimika, ndemwa ii inivetie; kake si sandu nikundie mi, kake sandu we.

⁴⁰ Naye awazia waanalosha, awawona weshinjia, na amburra Petro, Tomuidima kuchewa nami mtano saa mwe?

⁴¹ Cheweni na ombeni, nesa musiingie ghati ya kugheshwa; ngoro niyo ianguhe, kake muri mnana.

⁴² Akatongawa keri akaomba ekiteta, Apa wangu, kwakicha ii teiidima kuvetia, nisiinywe, sandu ukundie kiketike.

⁴³ Ekizawa akawawona weshinjia, amu meso mawo meemee.

⁴⁴ Akawashigha akatongawa akatonga katatu, ekitetawa kiteto kila.

⁴⁵ Ikuade ewazia waanalosha, na awawurra Shinjieni ingeriaha mresowoka; yoa, magheri nimo afuhi, na Mwana wa mundu ang’olwa mikononi hawo wenye ng’oki.

⁴⁶ Wukeni, tutonge; yoeni, ula ening’ola ni afuhi.

⁴⁷ Na ekinaoke ekiteta, yoa, Yuda, mwe wawo ikumi na weri, akaza, na kimwe naye matorano mabaha na mihandi na marungu, wefumie ha wakohani wabaha na waghosi wa wandu.

⁴⁸ Na ula emng’ola ewaingie luwano, ekiteta, Ula ninemnyonyoza niye; mgureni.

⁴⁹ Chwi ekimzia Yesu akaghamba, Salaamu, Rabbi, akamnyonyoza.

⁵⁰ Yesu akamburra, Mbuya, areha kila wakizia. Wakaza wakamgera Yesu mikono, wakamgura.

⁵¹ Na yoa, mwe wawo kimwe na Yesu ekirongesha mkono akang’ola muhandi wakwe, akambigha mzoro wakwe mkohani mbaha, akamchwia isikio.

⁵² Na Yesu amburra, Hundua muhandi wako na mbone; amu wose weuha muhandi weneteka hena muhandi.

⁵³ Wagheshijia mi siidima kumwomba Apa wangu, na ingeriaha eneniinga malaika weingi kukela legioni ikumi na mbiri?

⁵⁴ Matamo meidimaze kufishwa, ti yawe kuoka huwo?

⁵⁵ Magheri mala Yesu akawawurra matorano, Sandu wanga ya msoki mwafuma na mihandi na marungu kunigura? musi hena musi neikae hekaluni nikilosha, musinanigure.

⁵⁶ Kaka ama magheri menyu, nesa matamo ma waroti mafishwe. Waanalosha wose wakamshigha wakamatuka.

⁵⁷ Nawo wemgura Yesu wakamwingija ha Kayafa mkohani mbaha, wewunganyikaho watami na waghosi.

⁵⁸ Petro akamratera hae mtano na lumungu lwa mkohani mbaha, akaingia ndeni akaikaa na wazoro, akuwone kuidiwika.

⁵⁹ Wakohani wabaha na sunedrim yose wakaenda mburi ya maongo wanga yakwe Yesu nesa wamfwije,

⁶⁰ Wasiiwone; wekiza wenye mburi ya maongo weingi.

⁶¹ Ikuade wakaza weri, wakaghamba, Uu eghambie, Naidima kuibaa hekalu ya Izuwa, na kuijenga hena misi mitatu.

⁶² Akaimuka mkohani mbaha, akamburra Toutalwa kiteto? Mburi ani awa wekuwondjia?

⁶³ Kake Yesu akahuja. Mkohani mbaha akamburra, Nakuraria hena Izuwa mwenye moo, utuwurre, we niwe Masiya, Mwana wakwe Izuwa.

⁶⁴ Yesu amburra, We waghamba; kake namburra, too yoo munembona Mwana wa mundu ekiikaa ha kuume kwa zinya na ekiza na majumbi ma wanga.

⁶⁵ Mkohani mbaha akabaja suke yakwe ekighamba, Aghamba mawiwi; nikini tuendawa wenye mburi? Yoeni, ingeriaha mwasikia mawiwi makwe; mwawonaze?

⁶⁶ Wakatalwa wakaghamba, Yambe kufwa

⁶⁷ Wakamtufia mate wushoni, wakambigha: wengi wakambigha luhi,

⁶⁸ Wekiteta, Uturotie, Masihi, niani niye ekubigha?

⁶⁹ Petro akaoka ekiika shighati lumunguni: mbora mwe akamzia, ekiteta, Na we uokie hamwe na Yesu wa Galilaya.

⁷⁰ Akakana msongorana wa wose ekiteta, Sitisiwemi nikini wateta.

⁷¹ Ekinafume mbengeni ungi akambona, na awawurra wala weoho, Na uu eokie hamwe na Yesu Mnazareti.

⁷² Akakanawa na kurigha, Simtisiwe mundu uo.

⁷³ Kutera kadongo wala weimuka wakaza wakamburra Petro, Kididi na we ni ghati yawo; amu kuteta kwako kwakuwondja.

⁷⁴ Akawoka kurigha na kurara, Simtisiwe mundu uo. Chwi nguruwi ikaiya.

⁷⁵ Petro akakumbuka kiteto ekitetie Yesu, ti Kuwoka isimeiya nguruwi unenikana kandu katatu: akafuma na shighati akaiya na wukiwa.