Mattayo 25 - Sumu Yedi ya Isa Masiya 1906 Kitamo 1897 Malumbo 1905

¹ Na ufumwa wa wanga unefwanana na wabora ikumi, wekiuha taa jawo, na wekifuma kutorana naye mwenye ngasu.

² Wasano wawo wakaoka wetomode, na wasano wechee.

³ Amu wetomode, wekitika taa jawo, tewetikie mafuta nawo:

⁴ Kake wechee wetikie mafuta ghati ya viwo vyawo hamwe na taa jawo.

⁵ Mwenye ngasu ekishesha wose wakachunda wakashinjia.

⁶ Kio ghati kilozo kikaoka, Yoa, mwenye ngasu! Fumeni mutorane naye.

⁷ Wabora wala wose wakawuka chwi, wakaareha taa jawo.

⁸ Wetomode wakawawurra wechee, Utuinge ma mafuta menyu, amu taa jetu jakunda kujimika.

⁹ Weechee wakatalwa wekighamba, Ngea temenefika hena uswi na unywi; keba mutonge hawo wetagha, murekuzoria.

¹⁰ Nawo wekitonga kuzora mwenye ngasu akaza: na wala wearehiwe wakaingia naye hena ngasu, luwi lukafingwa.

¹¹ Ikuade waza na wabora wala wengi, wekiteta, Mzuri, mzuri, utujughuiye.

¹² Naye ekitalwa akaghamba, Kididi namburra, simtisiwe unywi.

¹³ Amu ii cheweni, amu tomutisiwe musi nete magheri.

¹⁴ Amu sa mundu ekizoka awaitange wazoro wakwe, akawainga mali yakwe.

¹⁵ Akamwinga mwe talanta sano, na mwe talanta mbiri, na mwe talanta mwe, mundu ose hena zinya yakwe; akazoka.

¹⁶ Chwi ula euhia talanta sano akatonga akahira najo, akaareha talanta sano jingi.

¹⁷ Na huwo ula wa mbiri akabigha mbucha jingi mbiri.

¹⁸ Na ula euhia mwe akatonga akafora si akaiwisa fetha ya mzuri wakwe.

¹⁹ Kutera kwa misi miingi mzuri wa wazoro wala eza, na eareha kutara nawo.

²⁰ Na ula euhia talanta sano ekiza akaete na talanta sano jingi, ekiteta, Mzuri, waniingie talanta sano; yoa, nabigha mbucha talanta sano jingi.

²¹ Mzuri wakwe akamburra, Chedi, mzoro wedi na mwitikiji: uokie mwitikiji hena vidongo, ninekuwika wanga ya viingi, ingia ghati ya luizihirwo lwa mzuri wako.

²² Na ula euhia talanta mbiri ekiza akaghamba, Mzuri, waniingie talanta mbiri; yoa, nabigha mbucha talanta sano jingi.

²³ Mzuri wakwe akamburra, Chedi, mzoro wedi na mwitikiji; uokie mwitikiji hena vidongo, ninekuwika wanga ya viingi, ingia ghati ya luizihirwo lwa mzuri wako.

²⁴ Na ula euhia talanta mwe akaza akaghamba, Mzuri, nikutisiwe ti niwe mundu edindie, ukifindika usihandaho, na ukiwunganya usimizaho:

²⁵ Nikaondoka, nikatonga nikawisa talanta yako si; yoa, kindu chako una.

²⁶ Mzuri wakwe akatalwa akamburra, Mzoro mbiwi na mdoko, watisiwe ti nafindika nisihandaho, na nawunganya nisimizaho;

²⁷ Huwo yakuwe kugera fetha yangu hawo wekoranya fetha; nesa nikiza niwone fetha yangu na mbucha.

²⁸ Amu ii wushijeni talanta hakwe, mwingeni mwenye talanta ikumi.

²⁹ Amu ose ena eneingwa, kake ula esina, enewushijiwa kila enakyo.

³⁰ Na mtagheni mzoro esiwe ghati ya kija cha shighati, kuneoka kula kuiya na kutafuna majegho.

³¹ Kake eneikaeze Mwana wa mundu hena kirumi chakwe, na malaika wose hamwe naye, magheri mala eneikaa kichumbini cha kirumi chakwe:

³² Na mbare jose jinewunganyika msongorana wakwe; naye enewaghawa wonawo, sandu mrisha aghawa maghonji na mbuji:

³³ Na enewika maghonji ha mkono wa kuume, na mbuji ha mkono wa kumoso.

³⁴ Mfumwa enewawurra wala ha mkono wa kuume, Izoni, mutasiwe ni apa wangu, hodjeni ufumwa muarehiwa too kuwoka kwa masanga.

³⁵ Amu nisikie nzaa, mkaniinga kidjo; nisikie ngiru mkaniinga cha kunywa; niokie mgheni, mukanitigha;

³⁶ Niokie tuhu, mkanidoka; niwadjua, mkanizia; niokie kichungoni, mkanizia.

³⁷ Na wala wenye ngalo wenemtalwa wekiteta, Mzuri, ni rini tukuwonie na nzaa, tukakuinga kidjo? kana na ngiru, tukakuinga cha kunywa?

³⁸ Ni rini tukuwonie mgheni, tukakutigha? kana tuhu, tukakudoka?

³⁹ Ni rini tukuwonie ukiwadjua, kana kichungoni, tukakuzia?

⁴⁰ Mfumwa ekitalwa enewawurra, Kididi namburra, Sandu mumketie mwe wa awa wandwetu, muniketie mi.

⁴¹ Ikuade enewawurra wala ha mkono wa kumoso, Tongeni kufuma hangu, museswa, ghati ya moto wa ndarasi uarehike hena Shetani na malaika wakwe.

⁴² Amu nisikie nzaa, musiniinge kidjo; nisikie ngiru, musiniinge cha kunywa;

⁴³ Niokie mgheni, musinitighe; niokie tuhu, musinidoke; niwadjue, na kichungoni, musinizie.

⁴⁴ Nawo wenetalwa wekighamba, Mzuri, nirini tukuwonie na nzaa, kana na ngiru, kana mgheni, kana tuhu, kana ukiwadjua, kana kichungoni, tusikuindie?

⁴⁵ Naye enewatalwa ekighamba, Kididi namburra, Sandu tomumketie mwe wa awa wandwetu, nete mi tomuniketie.

⁴⁶ Na awa wenetonga ghati ya kunyamarwa kwa ndarasi; kake wenye ngalo hena moo wa ndarasi.