Mattayo 24 - Sumu Yedi ya Isa Masiya 1906 Kitamo 1897 Malumbo 1905

¹ Na Yesu ekifuma hekalu eokie ekitonga; waanalosha wakamzia nesa wambonje majengo ma hekalu.

² Ekitalwa akawawurra, Tomuviwona ivi vyose? Kididi namburra, telineshighwa aha ibwe wanga ya ibwe, lisighushwe.

³ Naye ekiikaa nduwini ya Zeituni waanalosha wakamzia hena ngiliwata, wekighamba, Utuwurre, ivi vineoka rini? na nikini luwano lwa mizie yako, na lwa luidiwiko lwa masanga?

⁴ Yesu ekitalwa akawawurra, Yoeni, mundu esimukenge.

⁵ Amu weingi weneza hena izina langu, wekiteta, Mi nimi Masihi, na wenekenga weingi.

⁶ Munesikia ngondo na mburi ja ngondo, yoeni musirishwa wukiwa; amu ivi tevina huwo kuoka; kake luidiwiko tolumefika.

⁷ Amu mbare inewuka wanga ya mbare, na ufumwa wanga ya ufumwa: na jineoka nzaa na matetemeko handu.

⁸ Ivi vyose nivyo kuwoka kwa wukiwa.

⁹ Magheri mala wenemng’ola hena wukiwa, na wenemkoma, na muneshishirwa ni mbare jose hena lwa izina langu.

¹⁰ Magheri mala weingi weneghushwa, weneng’olana, wenesuana.

¹¹ Na waroti weingi wa maongo wenewuka, na wenekenga weingi.

¹² Na amu ya owiwi kuneta, lukundo lwa weingi luneduhuka.

¹³ Kake ula eikaa mtano kuidiwika, niye enekijwa.

¹⁴ Na sumu yedi ii ya ufumwa inetindwa ghati ya masanga mose, kuoka luwondjomburi hena mbare jose; ikuade luneoka luidiwiko.

¹⁵ Huwo mukiwona lusuwo lwa kunyamarwa, lutetiwe ni mroti Danieli, lwaimuka handu heshenete, (ula asoma, atwarije,)

¹⁶ Magheri mala wala weoho Uyahudi wamatuke na nduwi:

¹⁷ Na ula eoho wanga ya nyumba asisee nesa atike kindu ghati ya nyumba:

¹⁸ Na ula eoho mtemeni asihunduke nyuma atike suke jakwe.

¹⁹ Wukiwa hawo weemee na hawo werera misi ila!

²⁰ Ombeni kumatuka kwenyu kusioke magheri ma kisie, nete musi wa sabato.

²¹ Amu uneoka hala wukiwa wingi, sandu usimeoke too kuwoka kwa masanga mtano na ingeriaha, nete touneoka.

²² Na kwakicha misi ila teiduhuwe tekikia ose mwenye muri, kake hena lwa wasawurwa ineduhuwa misi ila.

²³ Magheri mala mundu ekimburra, Yoa Masihi ni kunu, kana kula, musiitikija.

²⁴ Amu wamasihi wa maongo na waroti wa maongo wenewuka, na weneng’ola maluwano mabaha na maitalo, mtano kukenga, ikiidimika, na wala wasawurwa.

²⁵ Yoa, namburra ini.

²⁶ Amu ii mundu ekimburra, Yoa, shighati eoho, musifume; Yoa, nyumba ja ndeni eoho, musiitikija.

²⁷ Amu sa kimereteko chafuma kifuma‐izuwa, na chawaa mtano kigwa‐izuwa, huwo ineoka mizie ya mwana wa mundu.

²⁸ Handu mning’a uoho, hala ndei jinewunganyika.

²⁹ Chwi kutera kwa wukiwa wa misi ila zano inegerwa kija, na mweji touneng’ola kiangaji chakwe, na ndondo jinegwa kufuma wanga, na zinya ja wanga jinededemishwa.

³⁰ Magheri mala lunewonwa luwano lwa mwana wa mundu wanga; na magheri mala mbare jose ja masanga jineiya, na wenembona mwana wa mundu ekiza wanga ya majumbi ma wanga na zinya na kirumi kibaha.

³¹ Eneingija malaika wakwe na lughunda lwa ighonda ibaha, na wenewunganya wasawurwa wakwe kufuma ngungu nne, na mbai mwe ya wanga mtano ya keri.

³² Hena mtini kulosheni mfwanano; mbagha yakwe ikisheghusha, na ikigera mani, mwatisiwa ti irukiruki lasongeria.

³³ Huwo na unywi, mukiwona ivi vyose, tisiweni ti asongeria, na mbengeni.

³⁴ Kididi namburra, irika ili telinevetia, vindu ivi vyose visimeoke.

³⁵ Wanga na si jinevetia, kake viteto vyangu tevivetiavyo.

³⁶ Kake mburi ya musi ula na magheri mala tehena eitisiwe, nete malaika wa wanga, nete Mwana, nde Apa mwenye.

³⁷ Sandu misi ya Nuhu, huwo ineoka mizie ya mwana wa mundu.

³⁸ Amu sandu weokie ghati ya misi ila kuwoka kwa mlombia, wekila na wekinywa, wekiaika na wekiowoyia, mtano musi ekinaingie Nuhu na safina,

³⁹ Wasitisiwe mtano mlombia uzie ukawawushija wose; na huwo ineoka mizie ya Mwana wa mundu.

⁴⁰ Weri weneoka mtemeni; mwe euhwa, mwe eshighwa.

⁴¹ Wache weri weneoka wekishagha na kyana, mwe euhwa, mwe eshighwa.

⁴² Amu ii cheweni, amu tomutisiwe musi ani mzuri wenyu eza.

⁴³ Kake tisiweni iki, mwenye nyumba kwakicha etisiwe magheri ani mhiwi eza, kwakicha ekichewa, nete tekishigha nyumba yakwe kubawa.

⁴⁴ Amu ii na unywi mukuarehie, amu magheri musimagheshijia Mwana wa mundu eza.

⁴⁵ Niani mzoro mwitikiji na mwenye kucha, mzuri emgera wanga ya wandu wa nyumba yakwe, awainge kidjo magheri mawo?

⁴⁶ Etasiwe mzoro ula, mzuri wakwe ekiza enembona ekiketa huwo.

⁴⁷ Kididi namburra, enemgera wanga ya vindu vyakwe vyose.

⁴⁸ Kake mzoro mbiwi ula ekighamba ngoroni, Mzuri wangu ashesha kuza,

⁴⁹ Ekiwoka kuwabigha waghenje, na kula na kunywa hamwe na waengeji;

⁵⁰ Mzuri wa mzoro ula eneza musi esikamwindia, na magheri esikatisiwe,

⁵¹ Na enemchwa vihindi, na enemgera ifungu lakwe hamwe na wakeleki: kuneoka kuiya na kutafuna kwa majeghu.