Mattayo 23 - Sumu Yedi ya Isa Masiya 1906 Kitamo 1897 Malumbo 1905

¹ Yesu akawawurra matorano na waanalosha wakwe,

² Ekiteta, Watama na Wafarisayo weikaa na handu ha Musa:

³ Amu ii vyose wemburra, areheni na gureni: kake musiareha hena mihiro yawo; ama wateta wasiarehe.

⁴ Wechunga miagho iemee na idindie ya kutikwa, na waigera wanga ya vituro vya wandu, wasikunde wenye kuikuwara na kichaa kimwe.

⁵ Mihiro yawo yose weiareha nesa kuyowa ni wandu: waaramija fulakteria jawo, na wanetija malutiriwo,

⁶ Wakunda wui wa kuwoka ghati ya karamu na vichumbi vya kuwoka ghati ya masunagogi,

⁷ Na makezio ghati ya vichinda na kuitangwa ni wandu Rabbi.

⁸ Kake unywi musiitangwe Rabbi; amu mwe niye mlosha wenyu, na unywi wose wandwawo.

⁹ Musimwitanga mundu waweo wenyu masangeni, amu mwe Waweo wenyu, eoho wa wanga.

¹⁰ Nete musiitangwe mzuri: amu mwe Mzuri wenyu, niye Masihi.

¹¹ Kake mbaha henyu eneoka mwindi wenyu.

¹² Na ose enekukweja enesejwa; na ose enekuseja enekwejwa.

^13-14 Wukiwa henyu, watami na Wafarisayo, wakeleki! amu mwafinga Ufumwa wa wanga msongorana wa wandu: amu unywi tomuingia, nete tomushigha wala weokie wekiingia waingie.

¹⁵ Wukiwa henyu, watami na Wafarisayo, wakeleki! amu mwajunguluka mbombe na teri nesa muarehe mwongofu mwe, na ekiidiwa kuoka, mumwosha mwana wa jehannum kando keri kukela unywi wenye.

¹⁶ Wukiwa henyu, warongori webajike‐meso, mukighamba, Ose erara na hekalu, si kinducho; kake ose erara na thahabu ya hekalu, ena sile.

¹⁷ Mutomoda na mubajike‐meso: amu ihi mbaha? thahabu kana hekalu ishenetija thahabu?

¹⁸ Na, ose erara na kisiko, si kinducho; kake ose erara na itasi lioho wanga yakwe, ena sile.

¹⁹ Mubajike‐meso: amu kihi kibaha? itasi kana kisiko kishenetija itasi?

²⁰ Amu ii ose erara na kisiko, erara nacho na vyose vioho wanga yakwe.

²¹ Na ose erara na hekalu, erara nayo na ula eikee uko.

²² Na ose erara na wanga, erara na kichumbi chakwe Izuwa naye eikaa wanga yakwe.

²³ Wukiwa henyu, watama na Wafarisayo, wakeleki! amu mwaiha ifungu la ikumi la naana na bizari na kamuni, mukishigha mabaha ma uchili, luchilio, na lusario, na luitikijo: ama yambe kuareha, na mala si kushigha.

²⁴ Warongori webajike‐meso, mwaremwa imbu mukimija ngamela.

²⁵ Wukiwa henyu, watami na Wafarisayo, wakeleki, amu mwazerrija ndemwa na mwanje hena some, kake ndeni jaizua lukengo na lutesho.

²⁶ Mfarisayo ebajike‐meso, zerrija ini ndeni ya ndemwa na mwanje, nesa na some pia jazerre.

²⁷ Wukiwa henyu, watami na Wafarisayo, wakeleki, amu mwafwanana na mbira jawirwa kiremeri, hena shighati jawonwa jedi, kake ndeni jaizua mawindi ma wefwie na ikwe lose.

²⁸ Huwo na unywi wawonwa ni wandu wenye ngalo, kake ndeni mwaizua ukeleki na owiwi.

²⁹ Wukiwa henyu, watami na Wafarisayo, wakeleki, amu mwajenga mbira ja waroti, na mwahamba makumbusho ma wenye ngalo,

³⁰ Na mwateta, Kwakicha uswi tuokie magheri ma waapa wetu, kwakicha totukishangarana nawo ghati ya sakame ya waroti.

³¹ Huwo mwakung’olia mburi wenye, ti unywi waana wawo wewakomie waroti.

³² Na unywi izujeni kighesho cha wawaweo wenyu.

³³ Unywi nyoka, waana wa nyoka, munematukaze luchilio lwa jehannum.

³⁴ Amu ii, yoa, namwingijia waroti na wenye kucha na watami; wengi wawo munewakoma na munewawanika, na wengi wawo munewabigha ghati ya masunagogi menyu, na munewakinya kiongo hena kiongo:

³⁵ Nesa imzie sakame yose ya ngalo iitishwe masangeni, too sakame ya Habil mwenye ngalo mtano sakame ya Zakariya mwana wakwe Barikiya ekomiwe ni unywi ghati na ghati ya hekalu na kisiko.

³⁶ Kididi namburra, Vindu ivi vyose vinelizia irika ili.

³⁷ Yerusalemi, Yerusalemi, uwakoma waroti na uwawiritia mabwe wala weingijwe hako, ako nikundie kuwunganya waana wako, sandu ikolo liwunganya usio wakwe si ya makungu makwe, nete tomukundie!

³⁸ Yoa, mwashighiwa nyumba yenyu tuhu.

³⁹ Amu namburra, Tomuneniwonawa mtano muneikamughambe, Etasiwe ula eza hena izina la Mzuri.