Mattayo 22 - Sumu Yedi ya Isa Masiya 1906 Kitamo 1897 Malumbo 1905

¹ Yesu ekitalwa akawawurrawa na mifwanano, ekiteta.

² Ufumwa wa wanga wafwananishwa na mundu mfumwa, emwarehia mwana wakwe ngasu.

³ Akaingija wazoro wakwe wawaitange wala weitangwa kuza na ngasu, wasikunde kuza.

⁴ Akawaingijawa wazoro wengi, ekiteta, Wawurreni wala weitangwa, Yoa, naareha kidjo changu, zao jangu na vibandie vyasizwa, na vyose vyaidivika; izoni hena ngasu.

⁵ Nawo wekiidaa wakatonga, mwe hena mteme wakwe, mwe hena kuzora kwakwe;

⁶ Wala weshighajika wakawauha wazoro wakwe, wakawawinya, wakawakoma.

⁷ Mfumwa akaregija, akaingija malweriri makwe, akawanyamara wakomi wala, akashota kiongo chawo.

⁸ Awawurrawa wazoro wakwe, Ngasu yaidivika, kake wala weitangwa teiwawe:

⁹ Amu ii tongeni na nzia matano, na wose muwawona, itangeni na ngasu.

¹⁰ Wazoro wala wakafuma na nzia wakawunganya wose wewawona, wawiwi na wedi; ngasu ikaizua wagheni.

¹¹ Mfumwa ekinaingie kuwayoa wagheni akawone uko mundu esidokie suke ya ngasu.

¹² Amburra, Mbuyaa, waingiaze huwo usioke na suke ya ngasu? Akahujijwa.

¹³ Mfumwa akawawurra wazoro, Mchungeni maghuu na mikono, mremtagha na kija cha shighati; uko kuneoka kuiya na kutafuna kwa majeghu.

¹⁴ Amu weingi niwo weitangwa, wesawurwa si weingiwo.

¹⁵ Wafarisayo wakatonga wakateta mburi nize wamteghe na kiteto.

¹⁶ Wakamwingijia waanalosha wawo hamwe na Waherodiani, wakateta, Mlosha, twakutisiwa we ni wa kididi, na walosha nzia ya Izuwa ghati ya kididi, nete hako mburi ya mundu si kinducho, amu touyoa wusho wa mundu.

¹⁷ Amu ii utuwurre, wawonaze? Ni kyedi kumwinga lushango Kaisari? kana hae.

¹⁸ Yesu ekitisiwa owiwi wawo akaghamba, Nikini munighesha, wakeleki?

¹⁹ Niwondjeni fetha ya lushango. Wakamwetie denari.

²⁰ Awawurra, Yakweni sanamu ii na kitamo?

²¹ Wamburra, Yakwe Kaisari. Awawurra, Amu ii mng’olieni Kaisari vindu vyakwe Kaisari, na Izuwa vindu vyakwe Izuwa.

²² Wekisikia wakarighiwa, wakamshigha wakatonga.

²³ Musi ula wakamzia Wasadukayo, wekighamba ti tehena luruko, wakambujanya,

²⁴ Wekiteta, Mlosha, Musa etetie, mundu ekifwa, esina waana, mundwawo enemuha mche wakwe, na enembushijia mundwawo waana.

²⁵ Heokie hetu wandwawo wafungate: na wa kuwoka akaaika akafwa, na asishighe waana akamshighia mundwawo mche.

²⁶ Huwo na wa keri, na wa katatu, mtano wafungate.

²⁷ Kutera kwa wose akafwa na mche.

²⁸ Ghati ya luruko wa uhi wa wala wafungate eneoka mche? amu wose weokie naye.

²⁹ Yesu akatalwa akawawurra, Mwatekwa, musitisiwe matamo nete zinya yakwe Izuwa.

³⁰ Amu ghati ya luruko teweaika, nete teweaikwa, kake weoho sa malaika wanga.

³¹ Kake mburi ya luruko lwa wefwie, tomusomie kila kitetiwe henyu ni Izuwa, ekighamba,

³² Mi Izuwa wa Ibrahimu, na Izuwa wa Isaak, na Izuwa wa Yakobo? Siye Izuwa wa wefwie, kake wawo weoho na moo.

³³ Matorano wekinasikie wakarighiwa na malosho makwe.

³⁴ Wafarisayo, wekinasikie ti ewahujija Wasadukayo wakawunganyika.

³⁵ Mwe wawo mchili akambujanya ekimghesha,

³⁶ Mlosha, luhi luaghanyo lubaha ghati ya uchili.

³⁷ Akamburra, Mkunda Mzuri Izuwa wako na ngoro yako yose, na moo wako wose, na lusaro lwako lose.

³⁸ Ulu nilo luaghanya lwa kuwoka na lubaha.

³⁹ Na lwa keri lwafwanana, Mkunda walatya wako sa ngoro yako.

⁴⁰ Ghati ya maaghanyo ama meri waikaa uchili wose na waroti.

⁴¹ Wekinawunganyike Wafarisayo Yesu akawawujanya,

⁴² Ekiteta, Mwawonaze Masihi? Mwana wakweni? Wamburra, Wakwe Daudi.

⁴³ Awawurra, Nize Daudi hena Ngoma emwitanga Mzuri, ekiteta,

⁴⁴ Mzuri amburra mzuri wangu, Ikaa na kuume kwangu, mtano nineikanigere maring’a mako si ya maghuu mako.

⁴⁵ Daudi ekimwitanga mzuri, nize niye mwana wakwe?

⁴⁶ Na tehena eidime kumtalwa kiteto; nete tehena ekara too musi ula kumbujanyawa.