Mattayo 21 - Sumu Yedi ya Isa Masiya 1906 Kitamo 1897 Malumbo 1905

¹ Wekinasongeria Yerusalemi, wakaza na Betania, na nduwi ya Zeituni, Yesu akaingija waanalosha wakwe weri,

² Ekiwawurra, Rongoreni na kaa ila msongorana wenyu, na chwi munewona njoe ichungwa na mwana njoe hamwe naye; chungueni, mureete.

³ Na kwakicha mundu ekimburra kiteto, muneghamba, Mzuri niye ewaenda; chwi enewaingija.

⁴ Ikaoka iki, nesa kifike kiteto cha mroti, ekighamba,

⁵ Mburreni mwana wa Sayuni, Yoa mfumwa wako akuzia, mhoo na ekikwea njoe, na kanjoe mwana njoe.

⁶ Waanalosha wakatonga, wakaketa sandu Yesu awaaghanyie.

⁷ Wakawaete njoe na mwana, wakagera suke jawo wanga yawo, akaikaa wanga.

⁸ Weingi wa matorano wakatoranya suke jawo nzieni; wengi wakatema mbagha ja miti, wakajitoranya nzieni.

⁹ Na matorano werongora na weratera wakaloza, wekiteta, Hosanna hena mwana wa Daudi: etasiwe ula eza na izina la Mzuri: Hosanna wanga.

¹⁰ Na ekinaingie na Yerusalemi, kiongo kyose kikadedemishwa, kikiteta, Niani uu?

¹¹ Matorano wakateta, Uu niye mroti, Yesu, wa Nazareti ya Galilaya.

¹² Akaingia Yesu na hekalu ya Izuwa, akakinya wose wetagha na wezora hekaluni, akaghusha meza ja wekoranya fetha na vichumbi vya wala wetagha mabeta,

¹³ Akawawurra, Itamiwe, Nyumba yangu ineitangwa nyumba ya kuomba: kake unywi mwaiosha mbango ya wasoki.

¹⁴ Webajike‐meso na wechingilika wakamzia hekaluni; akawahodja.

¹⁵ Wakohani wabaha na wetama wekinawona maitalo emaarehe, na waana wala weloza hekaluni, wekiteta, Hosanna hena mwana wa Daudi, wakashishirwa;

¹⁶ Wakamburra, Wasikia awa watetaze? Yesu akawawurra, Ee; tomusoma ti Kufuma itumbu la ngerengere na weamwa waareha luisiso?

¹⁷ Akawashigha akafuma na shighati ya kiongo mtano na Betania; akatua uko.

¹⁸ Na heyawo ekihunduka kiongoni akasikia nzaa.

¹⁹ Na ekiwona mtini mwe nzieni akauzia, asiwone kindu hakwe nde mani tiki, akauwurra, Ndunda isifume hako mtano ndarasi. Chwi mtini ukanyaruka.

²⁰ Waanalosha wekiwona wakarighiwa wekiteta, Nize chwi mtini wanyaruka!

²¹ Yesu ekitalwa akawawurra, Kididi namburra, ti mukioka na luitikijo, na musiitalwa, tomuketa iki cha mtini tiki, kake mukiiwurra nduwi ii, Wushijwa uretaghwa na ndiwa, ineketika.

²² Na vyose muneenda na kuomba, mukiitikija, muneuhia.

²³ Na ekinaingie na hekalu wakohani wabaha na waghosi wa wandu wakamzia ekilosha, wekiteta, Hena zinya ani waketa ivi? na niani ekuingie zinya ii?

²⁴ Yesu ekitalwa akawawurra, Ninembujanya na mi kiteto kimwe, mkinitalwa, na mi ninemburra hena zinya ani naketa ivi.

²⁵ Lubatizo lwa Yohana lwafumahi? Ghati ya wanga kana ghati ya wandu? Wakaghambana wonawo, wekiteta, Tukighamba, ghati ya wanga, enetuwurra, Nikini musamwitikija?

²⁶ Tukighamba, ghati ya wandu, twaondoka matorano; amu wose wamgura Yohana sa mroti.

²⁷ Wakatalwa wakamburra Yesu, Totumaije. Naye akawawurra, Nete mi simburra hena zinya ani naketa ivi.

²⁸ Kake mwawonaze? Mundu eokie na waana weri; akamzia wa kuwoka, akamburra, Mwana, tonga, hira yoo ghati ya mizabibu.

²⁹ Ekitalwa akamburra, Sikundiemi: ikuade akachwa muti, akatonga.

³⁰ Akamzia wa keri, akamburra huwo. Ekitalwa akamburra, Natonga, mzuri: asitonge.

³¹ Wa awa weri uhi niye earehe sandu wawee akunda? Waghamba, Wa kuwoka. Yesu awawurra, Kididi namburra, ti weuha lushango na wache weshindi wamurongoria unywi kuingia ufumwa wa Izuwa.

³² Amu Yohana emzie na nzia ya ngalo, nete tomwitikija: kake weuha lushango na wache weshindi wemwitikija; na unywi mukiwona tomuchwe muti ikuade, nesa mumwitikije.

³³ Sikijeni mfwanano ungi. Heokie na mundu mwenye nyumba, ehandie mizabibu, akaijungulushia lusarigho, akafora uko iwongo la kufindia, akajenga mnara, akahakua waimi, akazoka.

³⁴ Na magheri ma ndunda mekinasongerie akawaingijia waimi wazoro wakwe, wauhie ndunda jakwe:

³⁵ Waimi wakauha wazoro wakwe, mwe wakambigha, mwe wakamkoma, mwe wakambiritia mabwe.

³⁶ Akaingijawa wazoro wengi weingi kukela wala wa kuwoka: wakawaketa huwo.

³⁷ Ikuade akawaingijia mwana wakwe ekiteta, Wenemguria nganyi mwana wangu.

³⁸ Waimi wekinambone mwana wakateta wonawo, Uu niye mhodji; haya, tumkome, na tugure uhodjo wakwe.

³⁹ Wakamuha wakamtagha shighati ya mizabibu, wakamkoma.

⁴⁰ Eneikaeze mzuri wa mizabibu, enewaketaze waimi wala?

⁴¹ Wamburra, Enewanyamara viwiwi wawiwi wala, na eneng’ola mizabibu hena waimi weingi, wenemng’olia ndunda hena magheri mawo.

⁴² Yesu awawurra, Tomusomie ghati ya vitamo, Ibwe wajengi welidae, ili liokie ibaha la nganda; iki chafuma ha Mzuri, na cha kuing’asija mesoni hetu.

⁴³ Amu ii namburra, ufumwa wa Izuwa unewushijwa henyu, na ineingwa mbare igera ndunda yakwe.

⁴⁴ Ula egwa wanga ya ibwe ili enebaikabaika: naye egwiwa nalo, linemhuahua.

⁴⁵ Wekinasikie wakohani wabaha na Wafarisayo mifwanano yakwe, wakatwarija ti niwo ewatetia.

⁴⁶ Wekinaende kumgura, wakaondoka matorano, amu wembonie kuoka mroti.