Mattayo 20 - Sumu Yedi ya Isa Masiya 1906 Kitamo 1897 Malumbo 1905

¹ Amu ufumwa wa wanga wafwanana na mundu mwenye nyumba, efumie marekero kuhakua waimi ghati ya mizabibu yakwe.

² Ekinaidiwe kuteta na waimi hena denari puti, akawaingija ghati ya mizabibu yakwe.

³ Na ekifuma sa saa ya katatu, akawona wengi wekiimuka kichindeni wesina ndima,

⁴ Akawawurra, Tongeni na unywi ghati ya mizabibu, na kila kiwe ninemuinga. Wakatonga.

⁵ Ekifumawa sa saa ya katandatu na ya kenda akaketa huwo.

⁶ Na sa saa ya ikumi na mwe ekifuma akawona wengi weimuke; awawurra, Nikini mwaimuka puti musina ndima?

⁷ Wamburra, Amu tehena mundu etuhakua. Awawurra, Tongeni na unywi ghati ya mizabibu.

⁸ Ikinaoke chamagheri, mzuri wa mizabibu akamburra mwimuki wakwe, Waitanga waimi urewaiha mshahara wawo, ukiwoka na wa kuidiwika mtano wa kuwoka.

⁹ Na wekiza wala wa sa saa ya ikumi na mwe wakauhia mundu ose denari.

¹⁰ Na wekiza wala wa kuwoka wegheshijie ti weneingwa nyingi: wakauhia nawo mundu ose denari.

¹¹ Wekinauhia wakamnunuwikia mwenye nyumba,

¹² Wekiteta, Awa wa kuidiwika wahira saa mwe, nawe wawaringanyanya na uswi tugumirie wukiwa wa hemusi na nduwuri.

¹³ Akatalwa akamburra mwe wawo, Mbuyaa, sikuketa owiwi: toutetie nami hena denari?

¹⁴ Tika kindu chako, uretonga. Nakunda kumwinga uu wa kuidiwika sa we.

¹⁵ Si chedi hangu kuketa sandu nikundie na vindu vyangu? Ijiso lako iwiwi, amu ya kuoka mi wedi?

¹⁶ Huwo wa kuidiwika eneoka wa kuwoka, na wa kuwoka eneoka wa kuidiwika.

¹⁷ Ekinaoke Yesu ekikwea na Yerusalemi akatika waanalosha wakwe ikumi na weri mbai, nzieni akawawurra,

¹⁸ Yoa, twakwea na Yerusalemi, na Mwana wa mundu eneng’olwa ha wakohani wabaha na watami; na wenemchilia kufwa,

¹⁹ Na wenemng’ola ha mbare hena kusola, na kubigha, na kuwanika: na musi wa katatu enewushwa.

²⁰ Wakamzia mee waana wa Zebedayo na waana wakwe, wekimwinamia na wekimwomba kindu.

²¹ Akamburra, Nikini ukundie? Amburra, Teta ti waana awa weri wangu waikae, mwe na kuume kwako, mwe na kumoso kwako, ghati ya Ufumwa wako.

²² Kake Yesu akatalwa akaghamba, Tomutisiwe nikini mukiomba. Mwaidima kunywa ndemwa nikundie kunywi mi? Wamburra, Twaidima.

²³ Awawurra, Ndemwa yangu kididi munenywa: kake kuikaa na kuume kwangu na kumoso si kwangu kung’ola, kake ni hawo wearehiwe ni Apa.

²⁴ Wala ikumi wekinasikie wakasikia oro na wandwawo wala weri.

²⁵ Kake Yesu akawaitanga hakwe, akaghamba, Mwatisiwa ti wachili wa Mbare wawatoria, na wabaha wawo wawaketia zinya.

²⁶ Si huwo ineoka henyu: kake ula ekundie kuoka mbaha henyu eneoka mwindi.

²⁷ Na ula ekundie kuoka mfumwa henyu, aoke muzoro wenyu.

²⁸ Sandu mwana wa mundu tezie kuindiwa, kake kuindia, na kung’ola moo wakwe lukombolo lwa weingi.

²⁹ Na wekinafume Yeriko matorano mabaha wakamratera.

³⁰ Na yoa, webajikemeso weri wekiikaa mbai ya nzia, wekinasikie ti Yesu eokie ekivetia, wakaloza wekiteta, Mzuri, utusarie, mwana wa Daudi!

³¹ Matorano wakawabohia, wahuje: wakaneta kuloza, wekiteta, Mzuri, utusarie, mwana wa Daudi!

³² Yesu ekiimuka akawaitanga, akaghamba, Nikini mukundie nimuketie?

³³ Wamburra, Mzuri, meso metu mejughuke.

³⁴ Yesu ekiwasaria akamakuwara meso mawo: chwi wakawona, wakamratera.