Mattayo 2 - Sumu Yedi ya Isa Masiya 1906 Kitamo 1897 Malumbo 1905

¹ Ekinawonwe Yesu ghati ya Betlehemu ya Uyahudi, magheri ma Herode mfumwa, Mamajusi wa ngaghenya wakafika Yerusalemi,

² Wekiteta, Eohohi ye ewoneke mfumwa wa Wayahudi? amu twaiwona ndondo yakwe ngaghenya, na twaza kumwomba.

³ Ekinasikie ivi Herode mfumwa akaitalwa, na Yerusalemi pia naye.

⁴ Akawunganya wakohani wabaha wose na watama wa wandu, akawawujanya Masihi awonekahi.

⁵ Wakamburra, Ghati ya Betlehemu ya Uyahudi, amu huwo itamiwe ni mroti,

⁶ Nawe Betlehemu, isanga la Uyahudi, si mdongo ghati ya wafumwa wa Yuda, amu ghati yako enefuma mchili enewaitoria wandu wangu Israeli.

⁷ Na Herode, ekinawaitange mamajusi hena mbiso, akawawujanya muno magheri ani ndondo iwoneke.

⁸ Akawaingija Betlehemu, akawawurra, Tongeni, muviende muno vindu vya mwana; mtano mkimbona, munietie mburi, nami nize nimwombe.

⁹ Wekinamsikie mfumwa wakatonga; nayo ndondo weiwonie ghati ya ngaghenya, ikawarongoria, mtano ikaza ikaimuka wanga ya handu eoho mwana.

¹⁰ Wekinaiwone ndondo wakaizihirwa luizihirwo lubaha.

¹¹ Wakaingia nyumbeni, wakambona mwana na Maryamu mee, wakagwa wakamwomba, na wekinaidiwe kuchungua vindu vyawo, wakamng’olia suli, thahabu, na uvumba, na manemane.

¹² Na wekinawondjwe hena ndoto wasimhundukie Herode, wakatonga hawo hena nzia ingi.

¹³ Wekinaidiwe kutonga malaika wa Mzuri akamfumia Yusuf ndotoni, akamburra, Wuka, umuhe mwana na mee, umatuke na Misri, uikae uko mtano ninekuwurra; amu Herode enemwenda mwana nesa amteshe.

¹⁴ Ekinawuke akamuha mwana na mee kio, akatonga na Misri.

¹⁵ Akaoka uko mtano ekinafwe Herode, nesa kifike kitetiwe ni Mzuri hena mroti, ekiteta, Kufuma Misri nimwitange mwana wangu.

¹⁶ Naye Herode ekinawone ti akengwa ni mamajusi akaregija muno, akaingija wandu akawakoma waana wose weoho Betlehemu na mihaka yakwe yose, too miaka miri na weduhuke, hena magheri ewurrirwe ni mamajusi.

¹⁷ Niho kikafika kila kitetiwe ni Yeremiya mroti, ekiteta,

¹⁸ Ighonda lasikiwa ghati ya Rama, ngunga, na kiiyo na wukiwa wingi, Rahel ekiwaiya waana wakwe, asikunde kudindijwa, amu tehenaho.

¹⁹ Ekinafwe Herode, malaika wa Mzuri akamfumia Yusuf ndotoni ghati ya Misri,

²⁰ Ekiteta, Wuka, uha mwana na mee, utonge isanga la Israeli; amu wala wafwa wewendie moo wa mwana.

²¹ Akawuka akamuha mwana na mee, akaza isanga la Israeli.

²² Kake ekinasikie ti Arkelao eitoria ghati ya Uyahudi handu ha Herode wawee, akaondoka kutonga na uko: na ekiwondjwa ndotoni, akatonga na isanga la Galilaya.

²³ Akaza akaikaa ghati ya kiongo chaitangwa Nazareti; nesa kifike kila kitetiwe niwo waroti, Eneitangwa Mnazarayo.